Aw Gollhang!

Aw, Gollhang!

Kengkoh mantam tah tah se-a toka jum pit pet chenga bilba na hin kiba kit ji vang chu, kei Lanu samsao hin a gelin ka gel thei poi ti na’n seipeh tem inge.

Na sam kitung lit let leh iti ti hama na kitunsah chu, jou vakhu hon buh a kise lou u hinam? Cheho sang chun, eima nei kham kham theng sit seta kivona, sam jong ahi ding bep-a kivo a Pathenni leh Bible le labu jah kaha jep puma houin lam jon ho hi nang sangin ka chate pa adin ka dei jo e ti ana he mai mai tem in.

Tohdoh ima la na nei kit pon, lou natoh chulah ka jahcha e ka i e na ti kit in. Nilhum lhuma mi hotela touva lampia hung nungah melhoi thim na mu jouse na dai chatvai chun, itih in jong Kukite makho ding sempha sam pon te.

Ih na, gollhang! Dongma ho ka nei e na tia, inkote tohdoh sa manga a kipa pana ding na chohpeh ji chu bansan mai tan. Na khut taha na tohdoh sa chun man lhomcha hi jeng jong leh chohpeh le chun, numei pha leh ching chun nangma tohdoh saa na choh chu a kipapi joh tei ding ahi.

Lhan lai nikhoa don ding cha ka hin peh teng u leh lhan khuh sah langa lamkaipu dana theng sit seta na na touva; mihon na um kimvel uva, nang chula kiboltheisah taha na nui poh lah lah sang chun thipbeh cha lhan khuh sunga lei lai poh lah lah pa chu gamchengin ka star jo uvin ahi.

Khosunga thina aum kom jongleh mithite ina thiluong janhapi angai teng dah lap lapa hung lutin a ning lang lang na del in, lenkhom la thep lou chula jachat na’n jong na gel pha kit poi. Mi lasah laiyin na phun jol jol in, a nunga na hung nui kit vang chu… kengkoha hin se jeng ding ka lung ahi. Nang sangin na! Kho to langa gollhang toh thada nei lou, na musita noise taha na kiloipi ji, khongpua pang pa chu nang sang sangin keiho Lanuho hin ka moon jo uve ti he tem in.

Hoilamah, nang get chun ipi toh doh na nei mong ding ham? Na nu le pate nehguh mangin bike soh thah jouse na nei thei kit in. Topup thunna leh petrol man ding tahbeh jong na kithum kit in, chuteng khamna ding paisa na ngaicha kit in, na nu sumbom akon na satdoh kit e.

Miin Champagne leh Russian vodka a kham laiin nang chu ju johte voh-an tui khon ni khon thum bep kham pumin bike in thilha speed ah na lhai in, na pen lah lah gin gal khat akona ka hin jah vang chu… ka dip ka lai kana kidop ji tai. Ven, na gollhang chanpiho chun a dougal sat u jo tei ding go in a kimanlel lheh uve.

Kho leh houbung thakon nikho jongleh na tohma mu ding jong um louvin, a kamtam penin na pang kit jin, thunei pen hilouvin toh lama pontho tang em.

Aw! Kuki gollhang thahat laiho, khang uvin lang Kuki lanu ho kisonpi leh vetton thei din ma hin la thah kit tem uvin. I gam leh i nam lhu ding kon hi tungdoh kit taute!

Na kisonpi leh kineppi jing,
Kuki Lanu

Create a website or blog at WordPress.com

Up ↑

%d bloggers like this: