WHAT GOES AROUND COMES AROUND

10409199_804763042933853_660677652390218658_n

Nikhat hi buh khe nasa tah nuoiya chun nupi khat hi a gari kang set jehin lampama hin ana ding in, vot asah lheh e. Ajeh chu, dahkal khat val adin nung jong chun panpi ding him him amu jou pon, lungdong tahin khovot nuoiya chun ading ding tan ahi.
Chomkhat jou chun pasal khat hin ahin mu tan, chutia buh khe leh khovot tah nuoiya nupilhing, teh lam mano, khat gari sunga jong um louva, a car pama lunggim mel taha ding den agah mu chun, “Ipi hahsatna ato hi tan tem? Panpi ngai hin te…” ti chu ahethiem pai jengin. Hitichun nupinu chu anaiphei tan ahi.

Chutia panpi dinga anaiphei chu, hiche nu chun ana le kichat joh tai. Ajeh chu sottah nunga jong koiman panpi agot lou jeh leh miphalou dia hiche tobang phat chu phat kilem tah ahi kit jeh ahi. Chutia nui sil sel puma chuchepa hung potdoh chu akichat lo tan ahi.

Chuchepa chun amel agah vet leh a lunggel ding chu a hetthiem pehin, a kicha ahi tijong a umchan akonin ahai poi. Nupinu koma chun, “Kicha hih tang em, Pi. Kithopi dia hung ka hi bou ve. Kho avot vot toh na gari sunga chun ga um lumin lang, ken ka bolthei dan danin nan bolpeh tange. Ka min chu Bryan Anderson ahi.” tiin aseipeh tai.

Gari kang setna chu imalou cha, akang set jeha khel ngai mai mai ana hin, akhelna ding akang khel jong a car nunga umsa ahi. Hijongleh, hiche nupinu, teh lam nai, dia chu thil bailam tah ahi pon, lunggimna kham set chu ahi. Hitichun Bryan chun a gari kang chu kisalel tah chun a siemphat peh in, avon anen angai in, akhut jong aki suhkhah lo in ahi.

Bryan in a gari kang akhelpeh jou chun nupinu chun a gari kotneo akon chun ahoupi in, St.Louis apana hung ahi thu leh chulai mun chu ahin jotpa angai thu chu aseipeh in. Phat sottah sung panpi ding jong amu jou tahlou nunga chutia ama panpi dinga ahung jeh chun achunga akipana thuho chu aseipeh e. Bryan chun nui heo pumin gari kang se chu a car nunga chun akoiphat peh kit tai. Nupinu chun paisa ijat apeh ding ham tiin adong in. Hung kithopi talou hileh itobang taha buoina ato ding hi tam? Achunga ipi asoh ta dem? ti ngaito pum chun ijat thum jongleh kilommo in agel poi.

Hijongleh, Bryan chun chutobang lam him him ana ngaito pha pon. A thilbol chu ipi tong injong akigel pon, panpi ngaiho apanpi ahi ti ahen, chubanah, a phat chesahoa jong mi tamtah panpi angai naa ana panpi jing ahin, imacha chuomin jong agel pon, hitiho jouse hetpeh Pathen aum e ti jong ahechen lheh in ahi.

Bryan chun hichenu koma chun, “Nei lesah nanop tah tah ahi tah jongleh, itih ni ham khata midang panpi ngaia aum na mu teng, na hi thei dan danin ana panpi mai tan, chuteng kei jong nin geldoh jin” tiin adonbut tai. Nupinu chu vangpha akisa lheh in, ading chun ni deium lou tah hijongleh lelamah vangpha akisahna pen jong ahi kit e. Hitichun kipah tah leh vangpha kisah tah pum chun ajotna lama chun alhai kit tan ahi.

Mel tamtah alhai jou chun lampia hotel khatah chun, in lhun masanga chomkhat kicholpa toh gomin, ipi pi ham nehthei thei chu ane in, hichelai mun hi ana kichol khah louna mun ahi.

Waitress khat chu akomah ahung in, amasanga a gari set laiya pama aum jeha alu kot chu ponin ahin theh got pehin, waitress chu lha 8 velah naovop gaihamset ahi ti chu hetdoh thei ahi. Amel vetin chutia gai keng kung ta jong hotela chol taha ana kilo dan akon chun, ‘hahsa lheh u hin te’ ti chu ahethiem ngal e. Hitichun, chuche waitress gaipoh ham set sut leh chet thei lou, amel vet a jong hahsa hiuvin te ti het thei in, maljin mai mai, melhet jong hi kitlou, chutia alu kot ho theh hul peha phatecha ana lem chu a detmah lheh jengin, hichun Bryan chu ageldoh pai ngal tai.

A nehding ho aneh jouvin, chuche waitress koma chun $100 apen, waitress in paisa noi le dinga ache kah chun apot tai. Waitress chun hiche nu chena lang ding chu holin ave le len, hichun table a thil kijih khat hi amu e. Chuchenu thujih asim lai chun amitlhi kisan ahung luongdoh e:

“Paisa chu nin lepeh angai tapoi. Ima bat na nei poi. Na dinmunah chun ka ding kha tan, hia chun mikhatin ka panpi bang hin eina panpi e. Nei sah ding na nop mong mong ahi tah jongleh hiche hi ana bol in : Hiche ‘ngailut kipanpi tona’ hi nangma ahin kichai da hen,” tiin lekhajih nuoiya chun $100 note dang li jen ana koijin ahi.

Natoh ding dang um ho atoh sunjom in, hijongleh nidang bang lou tahin hiche ni chu, hiche waitress nu chun kipah tahin a mangchai tan ahi.

Nilhah chun kipah tahin inah akile in, lupna a lum pumin, suna nupinu’n a panpi dan ho a ngaito to in, a lekha nuse ho chu a mitlhaah acham den in, “iti dana hichenu chun, a nupa lhon sum ngaichat dan ho, lhakhat jou leh cha ahin tah ding jeha a lungdon dan ho chu a hetthei hin tem?” tiin angaito nasa lheh e.
Ajipan midang banga lo anei tamlou jeh leh acha pien ding jeha nasa taha na atoh ji ho, chuleh a lungkham ji dan ho chu angaito in. Hichun, ajipa, akoma mu chu deisah tahin achalah achop in, “Ijouse hung pha pha nan te, lungkham hih in, ka lungsetpen na hi, ka ji deitah Bryan Anderson…” tiin alhamuon tan ahi.

Hiche waitress chu Bryan Anderson jinu ahin, chuleh ajinu hin panpi nupinu chu atila Bryan Anderson in apanpi nu chu ana hi in ahi.

Sapte thuchih in “What goes around comes around” kiti, mi chunga i thilbol bang bang chu ei chungah ahung lhung kit ji e, ti hi eihon jousen jong bol jing u hi te!!

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: