THINA TAI LOUVIN EI KHEN DA LHON HEN!!

Ka office kikhen chu nidang bang bangin ka kile gei lheh in, ka jinu chun anneh ding siemsa in eina koipeh e. An jong tam neh louvin ka jinu khut chu ka tuh in, ama chun thip chetin an chu a ne a ne e. A mit-ha akon chun a lungthim noplou dan chu ka hethem pai ngal e. Gah sei pat ding dan chu hahsa ka sah lheh in, hijongleh seipeh chula ka nom lheh kit in… “Kikhen ta hi te, kikhen ding ka nom tai…” ka moh ti jeng tai. Chutia ka sei jeng chu phamo sah lheh jongleng seidoh ka nop ahi. Ama chu thipchet in a tou in, a mel chu lunghan mel jong a pu chuom poi. Chomkhat jou chun kap tobang thim hin, “Ipi jehin em?” ati in. Kei chun donbut chuom lou chun ka kihetmo sah kit in, an chu ka ne kit tai. Hichun a ding doh in, pindan lama chun ei dalha pai tai. Hiche jan chun khatvei jong ka kihou kit lhon ta poi.

Jan khovah a kap ahi jong chu ka hen, hijongleh ka ngaisah deh poi. Kikhenpi ding ka dei jeh ho chu seipeh ding ka nom in, hijongleh “ka lungset ta poi, nang sangin Jenny ka lungset jo tai” gah ti ding chu ka ngam jep kit pon, ka khoto thim kit in ahi.

Kithemmo tah pum chun kikhenna lekha chu ka jih pan tan… Tua ka chenna u in, gari khat leh inmun khat chu a chan din ka jih in, ama chu ka pe in… Lekha a mu mu chun a botkeh pai tan ahi.

Ka nunlui phat chesa jouse chu ka geldoh in, kum 10 masanga ka kichen ni lhon ho chu ka lungmit ah ahung kilang e. Pathen leh mipi masanga ka kitepna thucheng ho, hitobanga khen kit ding chun ipi jeha kana kichenpi khoh khoh hin tem? Ana kichenpi lou hileng ji dang pha tah nei in tin, ama jong a damsung nikho ho chu kipah tahin mang tei in te, ti ho chu ka ngaito to e. Kei le kei ka kithemmo lheh vang chun Jenny ka lungsetna chun ka se leh pha hetkhenna jouse jong a thaimang hi tan tin, a melhoina leh a kamthep chun ei suh-ngol chai ahi tai.

A jingin jong, angai bangin ka kile gei lheh in. Ka jinu chun pindan ah lekha ana jih jih in, a mitlhi chu a kitheh jin ahi. Tu masanga a mit akona mitlhi vat khat jeng jong mu ngam lou pa chun tun vang a mitlhi luong ka mu jeng vang chun imachan ka lungthim a khoi khah lou chu kei le kei jong ka kidetmah lheh e. An jong ne lou chun lupna ka jon pai in, nilhum a Jenny toh ka vale na lhon chu ka chol thim jong hin tin, ka imu lha pai tai.

Jingkah ka kitho tho in ka jinu’n kikhenna lekha chu ei hung pe in, detmah pum chun ka la in ka sim pai tai. Hiche kihenna lekha peh achun a thil deichat ho chu a jih in, hiche ho chu ka suhbulhit peh thei a ahileh kikhenna lekha a chu lunglhai sela a sign ding thu chu ei seipeh in. Ka chunga a ngaichat ho ka gah simdoh chun kidang ka sah lheh e. In leh lou, sum leh pai a thum pon… “lha khat sung i kichen til lai lhon bang banga kipah tah leh kilungkhat taha um ka nom in, i kikhen ding thu hi i chapa lhonin a hetlou tei angai e, ajeh chu tu lha leh exam nei ding ahin, a exam laia i kikhen ding thu a jah leh lekha phatecha a sim theilou ding, fail lo ding ahi.” Ka sim doh chun ‘hiti ho hi ipi hahsa ding ham’ ka ti in, hijongleh thil dang ngaichat ana nei kit in, “i kichen til laiya i bol ji lhon bang banga na office che ding teng niseh lha khat sung i room lhon apata kotbul chen nei pom ji ding ahi” ti hi ana jaosah kit e. Ka lungthim chun ka nui a ja thim lheh e. Itobang in masanga ka kilungsetna lhon chu ei geldoh sah go jongleh ka lungthim chu a kikhel tah tah ding ka tahsan lou ahi. Hijongleh ka kikhen thei ding lhon ahi phot leh tiin ‘henge’ ka ti tai.

Office a Jenny ka mu mu chun ka jinu’n ka chunga a thil ngaichat jouse chu ka seipeh pai in, ama jong a nui a ja lheh e. Jenny vang chun ka lungset a het jeh chun imacha khohsahna jong a nei deh poi.

A jing nikho in, office ka che ding phat in ka jinu chu pindan apat chun ka pom doh tai. Ka ni gel lhon chun ka himo lheh lhon in, phat chesa ho chu ei geldoh sah e. Kum 10 masanga hitobanga ka pom ji lai chun hi leiseta ka lungset pen leh ka dei pen chu ana hi in, hijongleh tun vang imajouse a kikhel soh hel tai. Ka chapa in ei mu mu lhon chun kipah taha khut beng pumin ‘papa in nunu a pom e’ ahin ti in, anu ka pom jeha chutobang khopa ka chapa a kipa ka mu chun ka lungthim a khoi lheh e. Ka jinu chun, ‘Lungset tahin Boipu chu i kikhen ding thu seipeh hih in aw’ a ti in, kei jong ka khasu jah jah e. Kotpi chen ka pom nung chun ka koi lha in office lam jon in ka che pai tai.

Ni ni na a vang chun amasa ni tobang lom chun ka himo lhon ta pon, ka pom lai chun ka op-ah a kingai in, a sam nam ho chu angai ngai ana hi jing in, masanga ka jut le le ji a sam ho chu masang sangin a lhom lheh tai. A chal, a muh leh a mit ho chu ka gah ve jin, ana chuai lheh tan ahi. Hitobanga a chuai vah dan chu kidang ka sah lheh in, a lungthim ka suhnat jeh hi tei in te…

Hitichun niseh in kotbul chen chu ka pom jing in, ni somlenga nia a ngai banga ka pom lai chun ka kingaito to in, hiche numei hin kum 10 sung jen kei din kitah tahin a um in, ken vang midang dang ka kop in, ka kile kal ngahin kitah tahin eina ngah jing jin ahi. Kei din vang mi manlu tah khat vang ahi!

Ni somni naa chun ken jong ka le lungset doh kit kigo tai. Ka gah pom lai chun ana jang chuom lheh danin ka he in. Niseh exercise a bol jeha a tahsa chu jang chuom ham, ole a lungthim ka suhnat val jeha a tahsa kisan in a thohlel hin tem?

Ni somnilenga naa ka kisah jouva room ka gah lut chun ka jinu chun von ho chu ana phet thang deh in, “Ka gong lheh jeng tai, ka von ho jong khatcha ka ah thei tapoi…” tiin ana phun bel bul e. Hiche pet tah chun ka hung khang dot in, jang ka sahna jeh chu ana gon val tah jeh chu ahi e. An a duchat louna jeh jong chu keima jeh ahi ti chu ka he e. Ka lai ana lheh in, a dah achun ka khut ka gah ngam in, hiche pet tah chun ka chapa lhon chu room ah ahung lhailut in, “Papa, nunu na pom doh phat ahi kit tai’ ahung ti e. Ama ding chun apa in anu niseh a ka pom doh ji chu a vetnom leh a munom pen ahi. Ka jinu’n ka chapa lhon chu a kai nai in, ngailu tah leh lungset tahin a koi chah kheh e. Ka lungthim a khoi ding dei louna jeh chun ka ve ngam pon ahi. Hitichun ka jinu chu angai bangin ka pom doh kit in, a ban chu ka dah chunga a ngam in, a ban langkhat chu ka ngong ah ei koi e. Ken jong det tahin ka pom in, ka kichen ni lhona ka pom bang bang chun ka kipom to kit lhon tai.

A kichai ni, ni somthum naa chun ka pom kit in, thanom tah ding chu kal khat jong ka sep thei ta pon ahi. A mel chu pha tahin ka ven, nidang sangin a gong cheh in a lhasam lheh jeng tai ti chu ka he e. Det taha pom pumin a koma chun, “I nupa lhon hinkhoa hi KINGAILUTNA i lhahsam lhon ahi” ti bouseh chu ka sei thei in, office lang jonin kino thim tah chun ka lhai pai kit tai.

Office ka lhun chun ka room ka jon pai in, Jenny in kot chu eina hon peh e. Jenny ka mu mu chun, “Jenny, ka jinu hi ka khen thei poi”, ka ti pai jeng in. Jenny jong chun detmah thim tahin ei hin ven, ka chal khoi pum chun ‘Na kho sih ham?’ ei tiin, ken jong a khut lahdoh peh pum chun, ‘Jenny, nei ngaidam o. Ka jinu hi ka khen tah tah thei poi, ka kikah lhon a khu kipana leh thanopna um lou ham ka ti ahin, ka jinu hi ka lungset lou ham kana tin, hijongleh ana hi poi. Ka jinu hi ka lungset dan ka he doh kit tai. Niseh ka room lhon apata ka pom doh jing bangin ka damsungin a khut chel jing puma, nopna hi hen, gentheina hi jongleh, thina tailou imachan ei khen lhon hih hen tia Pathen leh mipi masanga ka kitepna ho chu ka geldoh jing e” ka ti tai. Jenny jong kap jah pumin ka pindan akon chun a lhai doh pai tai. Kei jong chu inlang jonin office chu ka dalha pai in, ka kile lam chun ka jinu pahcha dei pen pen rose pah tam tah chu ka cho pa in. Pahcha joh nu chun card a ipi jih ding ham tia ei doh lai chun, nui selin, “Thina’n ei khen lhon masang se a jingkah seh ka pom jing ding na hi” tia jih din ka sei e.

Rose pah ka peh laiya a kipa ding dan ka mitlha a kilang pum chun inlam chu ka jon in, in ka lhun lhun chun, kipah leh thanom tahin pindan lam chu ka jon pai in, ka jinu kipa ding dan bouseh chu ka ngaito e. Pindan ka lhun chun kotkha chu olcha’n ka hong in, amavang, room sunga chun leiset chunga ka munom lou pen thil ka mu tan ahi. Ka kipana jouse chu haikhat kahin kichatna in a dim tan ahi. Ka jinu chu khohe louvin tuol-ah ana kithalse jeng tai. Ka lunggel chu tijatna in a dim in, imacha ka gel thei ta poi. Doctor ka kou pai in, ama jong ahung lhai lut pai tai. Hijongleh ima bol thei a nei chuom ta poi. Ka lungdon suhna ding hetlou man chun, “A hithei poi, ka jinu hin ei dalha thei pon te, ka tahsan mong mong poi….” tia ka pen jah jah vang chun ka jinu chula hung dam kit thei ahi ta poi. Nat leh genthei um louna mun, tonsota kipah taha kelngoi nou vahchoina mun vangam jonin eina dalha tan ahi.

A nunga doctor in ei seipeh dan chun, ka jinu chu phat sottah sung cancer vei ana hi tan, kei chula Jenny ka boipi val na lama ka jinu cancer vei jong kana het phah peh lou ahi. A thi ding a het masat jeha kikhenna lekha jong chu ana jih jeng ahi. Chuleh, niseh ka pom ding a deina jeh jong chu ka he tai, midang kop in ka jinu chu lungthim na tahin siem jongleng, ka chapa lhonin a nu ka pom doh lai a mu jinga, a pa hi gilou lheh jongleng, ka chapa lhon mitmu a a jipa hi mipha tah, jinu ngailu tah leh vetton thei tah ka hi ding a dei jeh ana hi e!!

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: