SOCIAL MEDIA CHINGTHEI TAHA MAN POIMO DAN

16708270_1076938345751168_1806692723307038330_n

Facebook leh Whatsapp ho hi thil phachom tah ahi in, chuti lai chun i man khel thet leh sum le pai tam tah bana jum le ja taha ei sem thei ahi kit e. Internet gama hin mi lheplhah ding hol jing ho, gucha ho, numei suhset ding hol ho, chuleh thu phalou leh thil dihlou bolnaa mang nom mi a kivat kit pon ahi. Chu tobang miho chun mi lhepna ho, suhbuoi, suhkichat, suhminset, gih, thu dihlou manga mipi lungdong leh lunglinglaova koi, chuleh mi identity guhpeha thil phalou bolnaa mang aum jing e.

Smartphone pha tah tah manga internet leh social networking dunga kichem thei chu themkhat eima jong smart jep ngai ahi. Mi limlah, a se lai ho, jamo kilang lai ho, mi mah thei thu leh limlah kiti phot chu totna leh eima thanop mana moh the thang thei ahi poi. Chutobang thil chu khat dingin thanopna tah hi nama jong leh, koi hamkhat chun ama kisuhminsetnaa ana lah khah thei ahi in, chutobang chu dan (Cyber Law) dungjuia gotna peh thei tina ahi.

Tulai internet khanga hin computer leh mobile phone ho hi thil phachom leh khantoupi thei tah ahi gol in, man khel thet chu songkula tan, paisa tam tah choi leh kumkhoa mi melmaa ei sem thei ahi jehin chingthei taha man hi apha pen e. Hijeh chun anuoiya thu hi midang ho jong hila seipeh din i kitem uve.

FB MAN DAN PHA LEH POIMO THEMKHAT:

1.Privacy setting mang them in. Facebook-a limlah, video leh information ho hi mi jouse mu thei louva, na tahsan ngam ho bou mu thei dinga privacy settings sem hi apha pen e.

2.Na chungchang thu kim keiin social networking site-ah koi hih in. A jeh chu, na chanchin kim keia na koi chun mi phalou hon bailam taha lheplhah thei na hina lai a hetdoh diu ahi.

3.Mi na hetchen lou komah na chanchin kim keiin hil hih in. Na hetchen lou mi chun na chanchin apata na lhahsamna lai a hetdoh ding, chulai chu manga na hin le lhep thei ahi. A dehin numei chapang chingthei louho hin imchep nei louvin thu a sei lha jeng jung jiuvin, hichu ama ana chang jing mi phalou hon gomkoma a lah thei u ahi.

4.Na limlah khonunga na jachatna thei kiti phot chu tahdoh hih in. Khamna thei jeh ham, a pet taha thanop val jeh hamin limlah duhdahlou ho pou i tahdoh jiuvin, hitobang hi bol lou apha jo e. Midangin second 5 sung bep-a jong ana copy thei ahi in, delete jongle chun mi khuta aum nung leh a suhmang je um ta pon te.

5.Eimi tailou midang na hetchen lou friend-ah sem hih in. Mi kimkhat chun jat dangho friend-a sem hi khantouna tah bangin a gel uvin, amavang hiche hin thil phalou leh hahsatna tam tah a sem thei e. Hitiho jeh hin adeh setin Northeast numei ho mi lheplhahna toh a tam lheh tai.

6.Midang suhminsetna thei thil jouse bol lou apha e. Hitobang thil jeha court case nei leh songkul lut jong tam tah aum tai ti het apha e.

7.Social networking manga midang kihetpi hi a bai lheh in, hinlah a taha kimu ding na got lhon tah jong leh, midang jaona leh jalhanga kimu ding apha e. Hitobang akon hin numei suhsetna tuoh tam tah aum tan, chuleh chutobang case police-a report kibol lou jong dim set in te.

8.Na password khel jing in. Password dinga pha pen chu, alphabet jemlen leh jemneo +number +character(!$&#). Password hi na jinu/jipa tailou koima dang hetsah hih in, na dongmaho hom in.

9.Na account chungchang user id ham password ham email, sms, phone call, etc. manga miin a hin doh tah jong leh koima seipeh hih in. Company apatin jong chutobang thudoh chu aum ngai poi.

10.Facebook BLOCK mang them in. FB mangho laha na doumah sei jing, message ham limlah duhdahlou ham hin thot jing ho chu bailam taha na block thei ahi. FB user khat na block nungle chun ama’n jong na um lam hepha ta pon tin, nangin jong aum lam hepha ta pon na te. Hijeh chun mi block khah hi ding hi tijat um tah jong ahi kit e 😀

SOCIAL MEDIA MAN KHEL JEHA GOTNA PEH THEI DAN

*Computer akon thu, limlah leh video, internet leh mobile phone ho manga thu phalou leh dihlou, mi lunghanna leh mah thei thot doh leh the thang.
Gotna: Kum thum chan songkula tan leh paisa choi (IT Act, 66A)

*Mi identity guhpeh (password leh adangho)
Gotna: Kum thum chan songkula tan leh dangka lakh khat chan choi (IT Act, 66C)

*Midang min manga mi lhep.
Gotna: Kum thum chan songkula tan leh dangka lakh khat chan leuna thei (IT Act 66D)

*A nei ho phalna louva midang jamo limlah/video the jal leh tah lan.
Gotna: Kum 3 chan songkula tan ham dangka lakh 2 chan choi ham, a ni ni ham(IT Act, 66E)

*Jamo lampang thil the thang.
Gotna: Khatvei suhkhelna chu kum 2 apata kum 3 chan songkula tan leh dangka lakh 5 chan choi. A niveina leh a ban chu kum 5 chan songkula tan ham dangka lakh 10 chan choi ham, a ni ni ham (IT Act, 67)

*Sex video ham chutobang lampang thil video leh limlah the thang.
Gotna: Khatvei suhkhelna chu kum 5 chang songkula tan leh dangka lakh 10 chan choi. A niveina leh a ban chu kum 7 chan songkula tan leh dangka lakh 10 chan choi. (IT Act, 67A)

*Chapang kumlhing lou chungchang, sagoh keo ham jamo lampang, chutobang lampang thil download, sei phat, lah khom, hol, kithot to leh the thang.
Gotna: Khatveina chu kum 5 chan songkula tan leh dangkha lakh 10 chan choi. A niveina leh a ban chu kum 7 chan songkula tan leh dangka lakh 10 chan choi (IT Act, 67B)

*Social media-a midangho, sakho, pen dol, hina, phung le changa, etc. manga dou leh seiset.
Gotna: kum thum chan songkula tan leh paisa choi (IPC Sec 153A).

*Social media manga mi gihna (tha, suhset, etc.) leh chutobang thu the thang.
Gotna: Kum 7 chan songkula tan leh paisa choi (IPC Sec 506, 507).

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: