LUNGSET MITCHO, CHO KIT LOU

11011774_722827497828923_7271625625839846282_n

Khosunga pa haosa tah, Pu Chunglen’in building hoi tah khat hi a sa in, keiho tobang khut natoh tailou thepna nei lou chu, kola nisoh sim pumin nikhotha ka kilo jin ahi. Khosungmi hi jeh chun ei deisah in, sun le jong cha san leh nehthei mai mai bouseh sanga tui jep chu ei nehsah jin, mun danga kithalo sang chun nuom jong ka sah lheh e.

Khosung mi bouseh ka hi pouvin, kho dang akonin jong mi thum lang ahung kithalo uve. Chuho laha mikhat chu mi neo thim, mel upa thim tah, kei sanga tah jo ding khat hi ahi. A mel vet sangin apha in, a kamtam lou vang chun mi houpi a thiem in, a pontho in, mi a phatbol lheh in, midang jouse sang chun ka nel pai tai. Nisehin na chu ka tong khom jiuvin, a chipse hen hun kit pon, kuva leh dumchep hi jongleh, a neilou joh joh ka kikop ji lhon e. Chutia lha thum tobang ka toh khom nung u chun ka kiloi thei lheh lhon tan, loi pha tah ka hung hi doh lhon tai.

Natoh hahsa jep se chu ka jou tauvin, neocha cha mi khat le ni bep toh kham aum tah jeh chun mi pha bep chu haisah ahung ngai tai. Nilhah khat chu in neipa chun ei hin kouvin, “Natoh ding atam ta pon, nang chula bang thei na hi pon, na tohpi ding mikhat kilhen in lang, a dang jouse jing apat kichol tauvin te,” a ti in. Ken jong ka loipa chu ka kilhen tai.

Ni khat chu septic tank umna ding ka lai lhon in, natoh toh kop chun insung thu ho leh nunlui thusim ho chu ka sei lhon tai. Ka loipa chun hiti hin a hinkho thusim lungset leh lhaset um tah chu ei seipeh tan ahi.

Ka loipa kamcheng in…

Ka insung u hi mi thum, ka nu leh ka pa bou toh ka hiuvin. Ka pa chu sepai ahi in, a pension jouvin Tuibuong ah inmun neo khat a cho in, chenna thei ham ham in khat chu ka tungdoh tauve. Kapa sum kholsa akonin Auto khat jong ka cho uvin, hichu ka tol jin ahi. Miho bang lom lomin sum kila lut hih jongleh, ka inko u neh kham bep chu ka lo doh jin, koima otcha val lou chun ka khosa uve.

Amavang, vangsetum tahin ka pa chu cancer ahung vei tan, jochan so in ka vekol uvin, phai ah nivei jen ka umpi uvin, a pension sum jouse chu ama kijen nan ka mang chai tauve. Hijeng jongleh ima bolthei aum ta pon, kum 21 ka hi in ka pa’n eina dalha tauve.

Ka nu bouseh chutoh ka um lhon in, auto chu ka tol jin, hahsa val lou chun ka khosa tou jing lhon tai. Chuti lai chun ka nu bouseh hi louvin, ka insungmi jouse jong chun ei khohsah lheh uvin, ji nei din ei no jing tauve. Ji nei ding chu ka thaset val jong ahi deh pon, hijongleh ka deibang numei, ka lungset leh ka nucha lhona ei ngailu thei ding chu kana mudoh lou jeh ahi. Ka vaicha uvin, ka nu tehse chatmo ahi kit toh, numei phalou nei khah ding chu ka kichat pen ahi.

Phat ahung chal jing in, ka dei bang numei khat chu ka hin toh tai. Kidang na sah maithei ahi, mi dang hon jong kidang a sah uvin, tuni chan hin ngol val, kichai deh ei ti lo jing tauve. Hiche nungahnu chu mitcho ahi.

Ka mu masat pen chun Lamka old bazar, police station koma footpath ninga khun khutdo pumin la ana sa in. A touna jon ka phah lai tahin traffic jam jehin ka tang den in. Nungah khangthah, tumging thah set ana sai puma ngei taha lasa chu ka gah sih vet in. A mel ka mu mu chun ka eu jah in, ka dinga Pathen got chu hi tei din ka pom chahkheh tan ahi.

Midang ho mit a chun numei mitcho khat mai mai hin tin, kei ding vang leiseta numei dei um leh melhoi pen ahi tai. Nungah til ahi in, a ngou thim lheh in. A mai chu abem lang thim hi ahin, mitbeh vom a beh jehin ka mu chen thei beh poi. A sam jang pet chu a tuhkhuhah a som in, second hand T-shirt kang a kiah in, puonchen pah thim khat hi a cheng in. Gah gal vet akonin jong incheng leh neijou tah insung apata hung kuon doh ahi poi ti a kichen lheh e. Hiche ho tah chun ei khoto sah in, khotona leh lungsetna ahung pan khom tah tah phat leh, imacha hin a khen thei ji ta pon ahi.

Hichea pat chun ka gel jing jeng tan, ka lungset doh chu ahi jeng e. Niseha ka sum lodoh masat pen chun pahcha ka cho in, ka pe jing jin ahi. A til chun a lungdong lheh in, kei jong chun ima ka sei ngai kit poi. Ka min tailou koi ka hi ka kihetsah pon, koi hiya hoilai a cheng ham ti jong ka dong ngai poi. A khutdona mun ka jotpa teng ka mu ji ho, pahcha ka peh phatleh a nuimel hoi tah ka mu ho chu ka kipah khop set jin ahi.

Dih tah chun het chen chu ka nom lheh in, amavang, a dinmun leh ka dinmun ka ngaito khom in, kicheng thei dinmuna ding thei din ka he mong mong pon ahi. Miho bangin kinei hen lang ka nu vekol thei ding jinu nei ngai lou hileh; ahi lou jongleh ama bouseh jenle thei ding umpi lahna ding sum ho chu kinei hileh, jia nei jeng jong chu ka da hih beh jeng e.

Ka hetchen ham, ka gelkhoh val jeh hama ka lut thuh cheh cheh ding, lunghelna leh lhasetna ei lhut khum mai mai ahi ding chu ka kicha kit e. Lungsetna lilai a ka lhahlut masanga, kikhin kang ham ham chu ka got ahi. Chuti pum chun kipah taha umsah vang ka nom in, pahcha ka peh laiya a nuimel hoi tah mu ding kal ka ngalel jeh jong chu hin tin, niseh pahcha peh chu ka lhaso ngai chuom poi.

Angai bangin ni khat chu ka auto ka nga in, pahcha peh ding ka got lai chun ka kin dot jeng e. Ni dang phat dang le chun a sum boma cheng 10 ho, cheng 5 ho, cheng 2 ho chu ana um sou sou ji in, hiche chung vang chun cheng 1 thih khat bouseh hi ana um e. Aman vang a sumdona boma chu sum ijat um ham a he pon, a bol thei chan leh kipah tahin midang ho din la chu a sa sa jeng jin ahi.

A dinmun chu ka chanah ka gah kingaito in, ka lainatpi lheh jeng in, ka sum poh jouse chu ka pe tan ahi. Ama chun a he pon, a het jong ngai ka sah poi. Hichea pat chun ka nei lemchan dungjui in paisa jong ka peh tha jing tan ahi.

Bolthei chanin peldoh tei ka go in, gamlhat ding ka gel in, kijoppi lou tei ding ka go jing in, hahsa vang ka sah lheh e. Khoset ni ham, ipi ham jeha a mel mu ding um lou ni leh chun lunghel aum jin, Lamka tolpi chu hom chuomin ka he ji e. Mu lou ding he nama jongleng, lampi pang lhung kei chun ama holin ka dah le le jin ahi. A jinga a mel ka mu kit tengle chun, ka kipah lheh kit jin ahi. Hiti chun kum 2 sung tobang chu deimo puma ka lungset chu ana hi pen tan ahi.

Kiginni jingkah khat chu, New Bazar ah pahcha nal tah khat hi ana joh uvin, a nal leh nal lou a mu thei chuom lou ding vang chun, ka cho jeng tai. A thah laiya peh tei ding gelin, thanom tah chun ka lhai suh in. Miin eina kham sou sou vang u chun, koima ka la pon ahi. A khutdona mun ka ga lhun chun a mel mu ding him him ana um ta pon, lungdong tahin ka lhai pai tai.

Sempatni jingkah chun kinem tahin a mel chu mu tei ding ka go in, hijongleh a touna mun chu a ong kit tai. Leisemni’n jong a tou deh poi. Vahchanni a chemang in, Vanghomni’n a jui in, Gansemni jenga jong a thip mang jel phat in, ka lungdong lheh tan, a chunga thil phalou tah lhung hi tam tiin ka ngaito tai. Hol doh din a min ham, a kho min ham la ka he kit poi. A masaa kana doh lou chu ka kisih lheh jeng e.

Thil dih thei din ka he ta pon, Kiginni chun a touna khel jepa kolchu tui joh ji, pasal khat chu ka moh doh tai. Vangphat um tahin ama chun a min ho, a kho min ho chu ei hil in, kipathu ka sei pum chun ka che kit tai.

Pathenni nilhah lang chun ga holdoh ding ka go tan ahi. Mi doh pa le le pum chun ka hol doh thei tai. A in u umna chu veng ningkoi khat, gari neo, keng ni nei tailou lutna thei lou khat hi ahi. Vakom pang khata hin, lhambuh tobang tuol in, achung chu tinpeh tuieh kai ap chet, gotui lut louna dia plastic a kikhu a suong ki del khum le le hi ahi. A bang jong chu chipeh vong se su khat ahi.

Kotpi lui deh ta chu ka kiu kiu in, koima’n ei hin donbut poi. Ka kiu kit in, ei hin donbut deh poi. A um lou hi diu ham ka ti in, hijongleh kotpi chu a kikam kit poi. A inkomte chu doh ding tia ka gah kihei lai tah chun, insung langa mi husan chu ka ja in, chomkhat jou chun ka aw ngei sah pen chun, “Hunglut aw!” ahin ti tai.

Kiphatlam thim tahin insunga chun ka lut in. A insung u chu neocha khat hi ahin, bang lai a chun puonjal lui thim tah khat hi a kikhai in, anhonna koma chun touna sao khat hi a um e. Kuong le bel ho vang chu a val sit set thei lheh e. Bang sah langa chun thing a kisem thilkoina bom khat hi a kitung in, hiche chunga chun pahcha vuai dih deh phabep hi a kikoi in, ka chopeh ahi chu ka he pai tai.

Pindan akonin Boinu chu ahung thou doh in. A mel chu hung kithou til ahi a kihe in, a sam ho jong chu a chop deh e. Mitbeh a kibeh pon, hijongleh a melhoina chu a selmang chuom poi.

“Koi na hi’m o? Ipi ham na ngaichat?” ahin ti in.
“Boinu, ka aw apata hi nei het thei em?”
“Aaa… U Lalboi na he. Dih em?” ati in, a aw jong chu atil sang chun a navah lheh tai.
“Umm… na dih e, nei hetlou ding hi tam ka tin, na nungah lheh e” ti in, ka gah nui in.
“Na nop nopna a chun tou jeng aw. Na fel val jeng e, ipi thu hita ka in uva na hung len lut jeng hi tam aw? Ka umna u hibang a ningkoi a hi!” tounaa tou pum chun ati in.
“Na mel ka mu khah ta hih a, ka ngai val jengin tin, ka hung holdoh jeng na hi e. Phamo na sah em?”
“Na jou jou sei hih teh? Nei ngai jeh ahi ding chu ka tahsan naisai poi, ka veng uva nungah na hung hel dan ham?”
“Tah taha, na mel ka mu ngai tah hih a, ji na nei khat tou hi tam tia, ka lungdon mana ka hung pheng hol jeng na he.”
“U Lalboi ji tah jong hi. Keiho tobangin hoiya ji ka kimu ding na sei ham aw? Govt. in a hop tho ahi ngal lou leh…”
“Ahileh… ipi thu ipi la um hi tam?”
“Ih na, hapta masa apat chu ka dam beh hih in tin, kho phat lou jing toh, office jong ka hung kai ngap lou ahi,” numei kipah thei tah, tot nuom ti ahi chu a kichen lheh e.
“Hi ham, tua la ito na bah em? Na imut nop lai ka hung suhkhah dan ahe na? A khoh lheh e” ka gah ti in.
“Ahi deh poi, bol ding ummo val a, ka imut mai mai ahe. Ka dam tai, jing apat natonga ka hung kon kit ding ahi tai.”
“Cha hin om ing e” dingdoh pum chun ati in.

Mitcho cha gah omsah ding chu ka kiphatlam lheh in, ka suhboi khah ding ka kichat ahi. Hijongleh om tei ding chu a go in. “Hin om teh. Nungah melhoi ho cha omsa don khah louna jong het phah ahi ta poi. Hiche hi, a mepi ding themkhat ka hin choi e,” tiin nehthei ka poh chu ka pe in.

A chaloh dan chu pha tahin ka ve in, a insung u achun ima jouse mu thei banga kimangcha in ka hen ahi. Cha khon ni hin dom pum chun, “Tulai bongnoi jong kichai doh kit a, cha san tailou ka nei lou u ahe. Tui lum mai mai hijongleh, inchalsoh a na don ding ahi mai e,” tiin ahung nui sil sel in. A mel chu ka ve chim thei poi.

“Nang om ahi phot leh, thina ding hijongleh, don ngam nang e,” ka ti in.
“U Lalboi tah hi aw! Na kamthem val e, nungah dai je na thep toh val e.”
“Hoiya vang. Hiche ka sei mana chu, keiho tobang amin mai mai a gollhang ho hi, numei hon mitsih a vet kham jong ei sah pouve.”
“Ipi khoh ham, leiset chunga ipi kilungolmo pi ding ham, na ti lou ha? Kei bang hin mu jou lou beh in um jing in lang, kivop jing thei le hen, nuom pen in te.”
“Nei kivoppi nom phot leh, nei theichim chanin na kivoppi nang e”
“Tahbeh a, ken la ka mu thei pon, na thusim ka het dinga lom ho nei seipeh nom em?” a ti phat chun ka thusim lhangpi chu ka seipeh peh in…
“Nanga la?” ka ti in…

“Kei vang chu na mu bang bep hi ahi jeng e, sei thei ima jong aum chuom poi. Hijongleh, na lungtheh lou nan, hin sei him him ing e. Kapa leh ka nau pasal khat toh ka hi uvin. Ka pien apatin ka mit hi a cho pai in, doctor hon tu chan hin khomu kit na thei chance ka nei e ati uvin, hijongleh sum le pai ka nei lou jeh uvin ima bolthei ka nei hih lai uve.

“Kanu chun mitcho a ka um hi ei khoto lheh in. Paisa khol a, phai langa ka kivetsah theina din, bolthei chan a bol in, gim tahin paisa a hol jin. Amavang, tupna leh deina hi mihem got mai mai ahi in, a lolhinna vang van lam thu thu ahi ti hi ka hechen tai. A sumholna lamah khuola a chena ah, gari accident in eina dalha tauvin ahi. (A mit a mitlhi hung mom doh chu a benga chun a luong lha jin jen e) Hiche phat lai chun kei chu kum 11 ka hi in, ka naopa chu kum 9 bep ahi nalai e.

“Hitichun kapa toh ka hung khosa tou peh uvin. Kapa hi a lou vatnaah a kong a kisuhheh khah in, hichea pat chun na ham kiti him him a tong thei ta poi. Kanu’n ei dalhah nung u chun, kihinsona ding a ngaito tei tei angai tan; natoh jangkhai jep tiin lekhabu leh magazine ho hi a joh jin ahi. Ka naopa hi school a kai ta pon, kum 17 tobang ahi apatin a nikhotha ho pou a kilo thei tai. Amavang gollhang ahin, chep le muom a bol banah, ju don jap ho ahin he doh in, a lodoh hi ama kham bep ahi ji tai. Ama ding beh a kilo doh thei phot leh apha e tia ka gel u ahi mai e.

“Masang chun Chandel langa mitcho school ah kana kai jin, hahsatna jat chuom chuom jehin kana kai jom thei ta poi. Insunga toh leh tham neo neo ho hi ka mopohna pen ahung hi tai. Hijongleh kapa teh lam mano leh damthei lou tah, neh hola gim taha a toh jing jeng chu ka lungset in. Tua ka bol banga, bazar-a khutdo lasa ji aum thu hi ei seipeh uvin, themcha beha kapa ka ngai jangkhai thei khah leh tiin lasah hi ka natoh pi pen ahung hi tou tai. Tun vang nop ka sah mong mong tai.”

A thusim ka het phat chun ka khoto cheh cheh in, “Ahileh tumging sai hi iti na thep ham?” tiin ka dong kit in.

“Ka inhengte in nuoiah hin thinglhang langa pat ucha lekhasim ahung um uvin. Tumging a nei un, lekha a sim lou phat u leh, la a sa ji uvin. Ka in u hi ahung kholailenna mun pen u ahi ji e. Ka hung kihetchen phat u chun tumging tum dan chu ka kihilsah in, kum 2 lang ei hil nung u chun ka hung them tai.”

“Chutia lasah ka thanop dan ho, tumging ka dei dan ho chu miin ahin he in. Ka ginchat phah lou behin, kum masa christmas masang jep chun, inko khat in christmas present din tumging khat ei hin chopeh uvin. Hichete inko huongphalna jala chu hitia hi la ka hin sah thei ahi tai.”

“Ahileh thil chuom beh, na in u hi a ningchong lheh in, iti ti na hung ji a, iti na kile kit ji ham? Hahsa lheh lou ham?” tiin ka dong in. Ka kiphatlam lheh vang chun, het thei chan het ding chu ka dei ahi.

“A hahsatna chan chu aum thou e. Jingkah lang leh kapa lekhabu joh ding toh ka kilhon jin, phatkhat khat leh ka kile lhon kit ji lhon e. Ahi lou jongleh ka veng miho bazar-a thil joh leh natong ho toh ka kile khom ji ahi. Mi hi apha thei uvin, ei ngailu leh khohsah ding aum jing jin ahi.”

“Hijongleh mitcho ka hi jeh hin chatmo lheh din nei gel khain na te. Ka tenggol hi toh ka che jingna mun, ka veng sung u tobang ho bep chu ka dei deina mun ka phah thei ahi. Gari lah ahi tengle hin a buoi jep e ti thu ahi.”

Hitichun, ka kiman phot leh nilhah lam leh thah ji din ka kitep in, ka lungthim chun ka kipah lheh e.

“Ka luchang hi ana thim e, touna chunga hin imu jeng ing e, aw! Tou in lang, an jong na neh ding ahe na?” ati in. “An neh ka hat e, na neh khop lou diu ahe” ka ti in. Chuin nui hah hah pumin, “Ka pheichung hi na kikhop nom em?” tiin ka gah dai in. Ama chun, “Thanop um lheh jongleh, ka pa hung lhung kha leh jahcha valin na te,” ati in, ka nui lah lah lhon e. Hiti lai tah chun apa chu ahung lhung tahbeh in ahi.

“Boinu, na loiho kholaileng na nei dan ham? Nang chula nuom tahin na lum kit in,” apa chun ahin ti pai in.

“Hi e, ka luchang na thim a, koi chuom bon hi lou tia kiphatlam lou beha ka um ahi. E! Hepa, hiche hi U Lalboi, pahcha nal tah tah ei pe ji chu ahi e,” tiin ei kihettosah lhon e.

Apa chu a teh melpu lheh tan, a tohgim jeh jong chu hin te. “Na dammo thim kit toh, keiman an hin huon tang e. Damdoi ho chu na neh kit lou ham?” ati in. “Jingkah chun ka ne chai tai. Tuni Pathenni ahin, pharmacy la kihong kit pon tin, neh da mai tang e,” tiin a donbut e.

A sei jou jou chun a khosih chu ahung khohse lheh in, a ulsa in a chup soh tai. Apa chutoh ahi thei dan danin ka buoipi lhon in. Ka husan u chun inhengho jong chu ahung lhai lut sou sou tauve. Chutia moh um jeng chu phamo a sah uvin, a inhengnu leh apa toh chun, a gang gangin Civil Hospital lang jonin ka auto chun ka lhai tauve.

Hospital a chun hapta khat jen aum in, niseh ka vil jin, a nehding leh damdoi jouse jong chu ka chohpeh in ahi. Sum kholsa a nei deh pouvin, ka nei kham kham chu ka mang uvin. Hapta khat jou chun damselin ahung pot kit tai. Hichea pat chun ka kinai chuom lheh lhon in, ka kinel cheh cheh lhon tan, mi sei dinga a kingai chu ka hi lhon tan ahi. Nilhah seh ka thah pa jin, a kah leh an ho ka ne pai jin, jansot chanin ka kholaileng den ji tai. Hitichun kingailu tahin ka um lhon tai.

Mitcho ahi in, midang banga khosa thei lou ahi ding jong chu ka he nai. Ka makhoa itobang thil ka to ding ham tiho, itobang hahsatna chuom chuom ei lhut ding ham ti jong ka ngaito jing e. Hijongleh, hiche ho jouse ngapcha pum chun, ka lungthim pumpi’n ka lungset tan ahi.

Mitcho ahi in, mitbeh vom a kibeh teng ima a kihe doh pon, a beh lou jongleh a mit-ha akon chun hetdoh thei ahi deh poi. Mitcho dangho banga mit vun kimat ho, mitchang kang ho tobang ahi pon, midang bangin a hah hoi sel in, a mu thei poi ti bou chu ahi.

Hiti chun kipah tahin kum khat chu ka mang chai lhon tai. Dongma mitcho nei ka hi vang chun, leiset chunga kei sanga kipah leh nuomsa um chuom deh pon te. Boinu chu ka lungset in, ama’n jong ei lungset in, ka chan lhon chunga chun ka lunglhai cheh lhon in ahi.

Khatvei chu foreign doctor, mit lampang specialist hi Civil Hospital ah ahung tan. Phai langa kona doctor thiem khatin ahin kilhonpi ahi. Sum holna a hung ahi pon, kipehdohna mong monga hung ahi jeh chun, a thona kivetsah thei ahi. Mi kimkhat chu a at peh in, kimkhat chu a jen in, mi tam tahin dam nan a nei un ahi.

Boinu jong kivetsah din ka pui in. Doctor chun pha tahin a ve in, kinepna thah, lungkham um tah hi kit chu a seipeh tai. Boinu mit laidum chu a se in, chutobang pe thei aum leh a khel thei ding, phate cha kho amu thei kit ding ahi tai. Hiche thu chu kipa aum lheh e. Vangset umtah khat chu Manipur-a manchah leh thil dang ho chu a hoi jou lou jehin Kolkatta langa at ngai ding, paisa lakh khat tobang ngai ding ahi.

Foreign doctorpa chu hapta khat jou teng kile ding ahi tah jeh chun, kol doctorpa chun a address leh hospital min ho chu pha tahin a seipeh e. Nungah khangthah cha, melhoi tah khat, mitcho a aum jeng chu a pohnat jong hin tin, kithopi thei chana kithopi din a kitem tan ahi. Hitichun lungthim buoi khop set pumin ka kile kit lhon tai.

Hiche jan chun ka kingaito to in, Boinu te langa kon chun kinepna ding aum poi. Apa lodoh leh a khutdo akona a lodoh chu a neh kham bep u ahi jeng e. A naopa la tahsan thei ahi kit poi. A inko leh sopiho gah minphah ti thei ding jong, vaichatna leh hahsatna chun loi le gol a delmang e kiti chu ahi kit in. A dinmun u chu lungdon nan adim tai.

Thil dang jouse ka ngaito in, ka lungdon nungin ka auto joh jeng chu lampi umsun hiin ka he tai. Ka auto chu keiman pha taha ka vetkol ahi jeh chun a thah lheh nalai in. Lekhapoimo (document) kitup chet leh permit chu toh dangka sangsomkuo tobanga joh thei ahi ding ka kinem in, adang sangsom ni tobang chu hol thei dan dana hol din ka gel lha tan ahi.

Ka inko u neh holna pen, ka kingahna neisun u ahi jehin ka nu gah hil ding chu ka da lheh jeng in, jan ni khovah vaha ka kingaito nungin, nilhah khat chu anneh pet in ka seidoh jeng tai. A thipchet in, a mit phe lap lap in, a dingdoh pai tai. Chomkhat set jou chun, “Boi, kum tam tah na pa lo hung kikhol khol a, insung nehholna ding mong monga i choh u ahi. Hiche auto leh i insung u kijopna thuh dan chu na het hi chula em. Chuleh hiche hi joh ta le chun, nehholna ding dang ima la i nei pon, auto thah choh kit chula vana ga tobang hi tan tin. Amavang, a neipa na hi in, a manna ding la thilpha bolna ding ahi kit in. Imajouse na khut a um ahi,” ati tai.

Thuso ah ka so in, a so apata ni ni jou chun ka johna man jat chun ka lha tai. Ka nu vohcha man ka batpeh kit in, bank a ka kholdohsa chutoh dangka lakh khat leh sangsom ni chu ka suto thei tan ahi. Hiche sung chun Kolkata langa doctor chutoh ka kihou mat jing un, mit pe thei (donate) ding aum um leh hin hetsah din ka sei tauve.

Lha khat jou chun a kitopi mit pe thei ding chu ka mu tauvin. Keini jong ka che lhon tai. Kapa hi sepai ahi jehin kol pao jong man louna kham bep chu ka themin ahi.

Boinu mit chu ahin at tauvin, midang bangin kho ahin mu thei tai. Atil chun kichen beh hih jongleh, doctor sei bangin ol olin ahin muchen thei cheh cheh tai. Chutia a neo apat khomu thei louvin, kho ahin mu thei phat chun insah inlhang hon jong a kipapi thei lheh uve. Adeh setin keini kipana san dan chu van chan pha abang jengin ahi.

Boinu jong a mit in kho amu phat chun mi dukan hoa kilo in na atong thei tai. Khosung leh houbung a jong jo chanin a kimang in, a insung u jong nasa tahin a machal tou peh tan ahi. Ken jong mi auto ka tol kit in, khol ding leh nuomsa taha ka nu vetkolna ding vang ka nei ngai ta poi. Hijongleh, Old Bazar traffic point, Boinu khutdona mun ka phah seh leh, a touna jia a tou tah lou chun sei jou lou kipana ei pe kit jin ahi.

A melin a toh in, lasah ana thiem kit chutoh, houngbung sung leh khosunga function hoa jong chun la a sa jing tan, mi het jong a lo lheh tai. Hitichun, vangphat um ti ding ham, vangset um ti ding joh ham, a veng uva officer khat, pathoi kum tam lang thim khat chun a office uva IV Grade din ahin thun tan ahi. Masanga khutdo ji chu, tun vang niseh office kai jing nungah ahung hi tai. Hiche jou vang chun nasa jo chehin lasah langah a kimangcha tou in, mi het pen pen ho lah ah pang hih jongleh, TV a jong a lasah ho vet ding aum jing tan, music video jong ni le thum tobang chu a hin siem tan ahi.

Hichea pat chun ka kikah lhon ah sei them thei lou khi ahung um pan tai. Kei vang chun mitcho ahi laiyin jong ka lungset in, kho amu nungin jong ka lungsetna chu angai bang bang ahi jing e. Ama vang ahi ta poi!

A mitchot lai chun nungah milhinglou, koima dei lou, ui gammang tobang bou chu ahin, ka kibang chet lhon e. Kho ahin mu nungin vang nungah melhoi tah, lasathiem, office kai ahung hi tan, a ding chun ka nem val jeng tan ahi. Ka mel leh tahsa poh chula hiti bep hi ka hi in, kisonpi ding ka nei lou dan he’n na te. Ka insung dinmun u chu la a nem cheh cheh in; kei, mi auto tola sum kilo mai mai leh kanu tehse chet thei lou ka hi lhonin, ga bel leh chenpi ngam jong kihi lou mong ahi nai.

Sum le pai leh nehholna hin mihemte hi ei kikhelsah thei lheh dan u ana hi e. Boinu chu a khosah a sang cheh cheh in, masanga nungah nunnem leh kineosah tah, numei thet ahina chu a mang jep jep in, numei kiletsah tah leh kisong tah, kimanchahna sang leh loi hao tah, miho kiloipi nom leh Lamka tuolpi sunga jong ja-pi um lou ahung hi tai.

Sei tam louvin, ka kihou mo cheh cheh lhon tan, ka kikah lhon chu a kah jep jep tai. Mi laha guhthima ei japi ahi chu ka hen, ei lhimlhah in, ei ngaicha mo cheh cheh tai. Kholaileng din ei kou ngai ta pon, a chungchang thu apha le ase ima ei seipeh ngai ta poi. Ka houpi masat lou leh phone in jong ei houpi masa ngai ta pon, ei ngaichat tah lou hi penin ka he tai. A in u chu a jem hoi cheh cheh un, ka ga valut kom jongleh kei sangin midangho chu a khohsah jo ji tai. Ken la gari ka nei ta pon, ama vang chun gari a dei cheh cheh tai. Office gari leh bike nunga a tou la ka mu chim go tan ahi.

Achai chaina chun thua seitho hi louvin, natoh in ei khen lhon tai. Japi het in nao ahin vop in, amavang, kei cha ahi ta poi. Agai e ti ka het ni chun ka lunghang lheh in, ka lungthim ana lheh jeng e. Ka phone pai in, kimuto ding ka nop thu leh, ei lungset phot leh ka ngaidam thei ding thu ho, naosen jong chu ahung pien lhah lhah leh, ka cha tobang cheta ka san ding thu chanin ka seipeh e.

A donbutna vang chu lungdon um tah ahi, “Kei hi nanga din ka kilem ta poi, kei sanga phajo kimu din deisahna ka hin lhan e,” ei ti khum tai. Ka pohkeh jeng tai! Mi kamthem ka hi pon, pasal konkhat banga a lunggel sei lha jet jet ho la ka hi pon; thipbeh in ka thoh ham hamin ahi.

Anung lha ni jou chun, natoh holpeh, officer chutoh a kicheng lhon tai. Hijongleh ka dem poi. Numei chuom beh ham tia kana gel chu, numei mai mai ana hi kha tan ahi. Kei sanga kichenpi thei ahi mong in, a haosa in, kisonpi thei ahin, lhamuonpi thei jong hin tin, nuomsa taha umsah thei ahin, aji dinga a kilhen ahi tai. Ka nei jouse ka pe chai tan, peh be ding jong ima ka nei ta poi. Mitlhi toh kipathu thot a, ‘mangpha’ ti bou chu ka neisun ahung hi tan ahi.

A kichen ding u jan chun ka lungthim na val leh lungdong val chu ka umna lam jong ka he ta pon, ima jong ka gel thei ta poi. Jan sot nung chun ka thouvin, ka nu nam chu ka la in, ka intom lang uva chun kikhailih ding ka go tai. Kidang tah khat chu, hiche nam chu thah set ahin, ka gah kikhai chet leh ahung tan in ahi.

Tuola chun ka moh tou den in. Hi a chun thil kidang tah khat ka toh e. Ka mitlha ti dingin la a kichen set in, lhagao hung kilang ti dingin la ka tahsan tah tah thei kit pon. Ka umna khel jep lha vah nuoiya chun ka pa thisa mel chu ka mu in ahi.

Ama chun lhaset mel thim tah hin ei hin ve in, kichen tahin ka lungthima hin thu ahin sei tai. “Boi, lungsetna jeha hinna peh vang a loupi in, lungdon leh lungthim nat jeha hinna lah vang lungneo toh val na sah lou ham? Mi ga lungset hi hatmona ahi pon, i lungsetna ahin donbut lou vanga chu a kihatmo tai tina ahi deh poi. Thohnatna hi lungsetna in a ken tha ahi in, kipumpehna hi a pah doh chu ahi. Mi dangho phatthei channa dia thi hi manlu tah ahi, phatthei a chan theina diuva hin vang chu a manlu cheh e. Na thi leh nangma ngailu ho bou kap diu ahin, na hin leh vang na ngailut jouse na kipasah thei ding ahi.”

Hiche thu ka jah chun, ka hung kin khang dot in. “Nei ngaidam o hepa, nei ngaidam o. Na chapa hi pasal kana lhin jep lou dan ahe,” ka ti tai. Insung ka nung lut kit chun light ka vah in, ka nu imutna puonjal chu ka gah keu in. Ama chu ana imu nuom selin, ahinvang a benga chun mitlhi luonna a kot lha suh peh in, ka lim hi a op toh ana sip beh chahkheh e. Hiche thil ka mudoh phat vang chun, eima kitha ding kiti mong mong ka gel thei ta pon ahi.

Thoh hahsa lheh jongleh, kilhaset jingin phatchomna ima a nei poi ti ka hen; ka nu vetkol angai kit chutoh, hinkho lampi dih chu ka jot kit tan ahi. Auto vang ka tol ngam ta pon, ka haisan pai tan ahi. Ajeh chu niseh old bazar traffic point lampi khu jotpa jing ngai ding ahi in. Khuche lai ka phah seh leh Boinu toh ka kimuto dan ho, lungsetna pahcha ka kipeh to lai ho leh anunga ei dalhah mang jeng dan jouse chu, lungmit in ahung kilang thah kit jin ahi. Niseha lungthim na jinga um sang chun tiin kithalo hi ka kilhen joh ahi tai.

Hitobang thil hi kumsot hin a nem dam jou e ati jiuvin, hijongleh i dei pen pen hon midang cha ni le thum a pom nungin jong, ei nem jou thei tah tah pon ahi. Amavang, ka thilbol chunga vang khatcha’n jong ka kisih pon, ngol ka kisah pon, mimo jong ka kiti poi. Thumvei pieng kit jongleng, Boinu khomuna ding ahi phot leh, ka bol kit nom thou thou ding ahi ti hi ka kitep ngamin ahi. Ama toh ka kichen thei tah lou phat chun, gollhang nah sal nah nah chu hitia hi ka len jing ahi tai.” tiin ei seipeh tan ahi.

Ka loipa lei lai lai chu lunglut tahin ka ve ka ven, ka ginchat phah tobang ana hi hih beh e. Chutobang jena lungsetna haosa, mi dangho dinga kipe jou, mi dangho dem ngai lou, ka gel thupi mihem chu moh um kit ta pon te. “Ka tei o! A khoh lheh jeng e” tia, i dum chep ban tailou kei tobang mi genthei, niseha kithalo mai mai chun bolpeh thei ima la ka nei kit poi.

Ka natohna pa, Pu Chunglen chanu, chanu changkhat, melhoi leh deium tah, ngou sit set, nou chit chet khun hin moh lungset jeng hen lang, hin kichenpi jeng leh, ti chu ka deisah peh ahi jing jeng tan ahi.

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: