JADUNONG HINKHOA THILSOH KIDANG

1959805_720776421332516_7715722614109112692_n

Jadunong kitipa hi Zeliang Nagaho ahin, Manipur leh Assam gamgi vela ana cheng ahi. Hiche phat lai hi Christian hung lut til 1910 – 20 lai phat chu ana hi e. Jadunong nam mite ho jong hi eiho banga thingbul suongbul (animists) hou te ana hiuve. Tuni chan in jong hitobang hou ho hi gam khat khat ah aum nalai in ahi. Chutobang Nagaho kho neocha khat a Haosapu chapa chu Jadunong hi ahi. Jadunong pa hi Kho Haosa mai seh hilouvin doithiam tah a kisei minthang khat jong ana hi in, thil boltheina jat jat jong ana nei dan in akisei e. Chutobang haosa cha khat, nuomsa tah a adu du ne le don a aum lai chun a hinkho ah thil kidang tah khat ana lhung in ahi.

Ama, Jadunong sei bang in aban seijom tau hite :

Jan khat hi ka nungah hel jouva ka hung kile chu ka chol thim jeh chun ka ma ihmut in, hinlah jan laia chun ka jun aso val jeh chun ka hung thouvin, ka lupna a kona ka hung thodoh chu ka inkote jouse ana ihmu tan, jan sot thim lang ana hi dan ahitai. Polama ka pot leh lha ana vah hoisel in, lunghel jong um kasah lheh e. Ka leituol u chu mun lenthim tah hi ahin, a ninglang a chun thingphung boh phatah khat hi aum in, hiche muna chu jan leh jun ka thah ji ahi. Chutia lha vah chan set nuoiya ima ngaituo louva jun kathah lai chun ka jun thahna lhang lam, thim jep lama kon chun milen tah mi ni ka kom lam hin jon in ahung tou lhon in, avom lhon jeh chun a mel lhon chu phatah in ka mu chen thei pon… Ka kichat val jeh ham chun salam in ei that in, ka inkote chu kou ding tia hapen a ka pen vang chun ka pengdoh jou ta pon… Ka ti akithin val jeh ham la ka he pon jam ding ka ti vang chun ka keng chu a chat thei tapoi. Chutia chat theilouva ka dinden lai chun milien te ni keng a hung ti ding a jong lei chon pha lou, a leng ti dinga la lha la nei lhon lou chu tuol tongkha lou chun ka kom chu an pha lhon tai!!

A mel lhon chu avom let lut jeng in, a namset lhon dan dan chu haibut lou leuvin ka um e. Ima seilou chun khat in ka jetlam khat in ka veilam ban ah ei man lhon in ei lenpi lhon tan… Ka lenlai u chun ka invel u chu lhavah nuoi a chun kichenset in ka mu in, hinlah ka kam chu a kihuh bang in ka paodoh thei poi.Ol ol chun ka leng sang jep jep tauvin, ka kho uva kon chon ka gamlha jep jep tauve.

Chutia ka len lai u chun nah bing chahkheh hung kihong bang in ka um in, ka aw bom chu khatvei hon in ahung kihong in, ka pao thei tai. Ka pao thei phat chun, “Koi na hi lhon ham? Ipi na dei lhon ham? Ipi dinga janlai laia hitia hi nei bol lhon ham?” tiin dohna tamtah chu ka dong tai. Hichun ka jetlam pang a ei dompa chun, “Gimnei lhanga thilha lengpa sottol le ho ka hi lhon in… Na pa hin ka lengpau a kijolpi jeh a thil boltheina jat jat a nei ahi… Lengpa’n manna nuom ka nei e, ga pui lhon tan atia ka hung pui lhon nahi” ati tai. Hiche thu ka jah chun ka kicha lheh jeng in… “Ipi ka ti ding hitam? Ka kile kit thei na dem? Ei tha kigot u ham? Ka inkote ka mu kit na dem?” tiin ngaitona jat jat ka kingaito tai. “Nei lha uvin! Ka nom poi!” tia ka thei top so a ka kitom vang chun imacha la aphachom pon, kei sang chun ahat thei lheh lhon e.

Hitichun ka leng leng uvin, sot thim jen ka len jou u chun muol lenthim tah leh sangtah khat hi ka gal mu tan, ka jetlama pa chun “Hiche khu ahi ka umnau Gimnei lhang (Mizoram, Cachar leh Manipur gamgi vela um) chu!! I lhun vah diu ahitai” ati in… Chomlou khah chun hiche mun chu ka lhung tauvin… A muol sangpen lai don tah a chun kuo hom lien beh lou khat aum in hiche mun a chun ka chu tauvin… Hilai mun a chun thilha ho anu apa tamtah pi ana um khom uvin, khat chu ana um kimvel uvin, hiche pa chu adang ho jouse sang chun a lien in kichat mel jong a um dehset e. Koima seipeh lou chun a Lengpau ahi ding chu ka hethei ngal tai. “Na hung lhun u hitam? Na hung nau a gamlha in chol in na te, ga kichol in lang jingkah lam leh kimu kit taute” ati in, hitichun thilha dang ho chun ka mutna ding chu ei ko peh uvin… ihmut malah chun kichatnan ka dim in, ka lunggel a chun ” Jamdoh thei ahi dem? Jam ding dan kigel leh iti jong leh ahet doh tei diu ahin, ei that doh jeng diuvem? Ki jamdoh ta jong leh ka kho umna don la ka hetthei tapo’n, ki gam mang tei in tin, ei mat kit tei diu ahin… hitia moh um jeng ding la ka det thei po’n?” tia ka kingaito lai chun ka hetlou kah chun ka na ihmu tai.

A jingkah ka hung khahdoh chun jan a ka thilto chu ka janmang ham tin ka ngaito in, hinlah ka umna chu atah ahi ngal kit in… Chomkhat jou chun thilha khat chu ahung in Lengpan ei mu nuom thu ahung sei tan, ken jong ka jui phei tai. Lengpa chu kichat aum lheh in, thilha dang ho jong chun ave ngam pouve. Hichun, Thilha Lengpa chun, “Na pa toh hin ka kijol ji lhon in, ka soh phatah ahi… Hijeh a chu ka hungpui sah nahi. Ka thu louva na jamdoh pou pou leh na thi ding ahi. Amavang, keiho koma phatecha a na um leh keiho thil boltheina jouse jong ka peh ding, keiho mi le sa a na kisim ding ahi” ei ti tai. Kingaito dan jong aum thei ta pon, jamdoh a thi ding sang chun amaho lah a um a hin ding chu ka gel tan. Hiche a pat chun alah uva ka khosa in, a thil boltheinau jong ka nei tan, Gimnei lhang vel a chun ka nop nopna mun ho ah ka leng le le jiuve.

Ni khat hi Thilha Lengpa’n ei koukhom uvin, “Gamsa a ikiso diu ahi! Ipia na kiso nom uvem? Na nop nop in kisoh uvin.” ati tan. Hitichun Sakhi a kisoh loi, Keipi a kisoh loi, Sajuh, Vompi, Sampi, Gulngan leh sa dang dang chun ka kisoh tauvin ahi. Mihem lou kon ho leh gam leng a che ho chu sa ham jatchuom chuom in ka lhem jiuvin, meithal a kap ding ei hin got jiu teng leh ka doi u mang chun ka kidal jiuvin, ei kap kha thei mong mong ji pouve.
Mihem hon ei mu theilou na diuvin ka kisem jiuvin, lou kon ho le numei thingpo ho chu husan jat jat in ka lhem jiuvin, a kah teng jong leh ahung kona a het theilou diu chun suong neo cha chan ka sep jiuvin, a kom uva thingna leh nangbom ho chu hui nung lou beh chun ka suling jiuvin… Kicha leh ti kithing pum chun ajam jiuvin, ka nui nasa ji lheh uve. Thengtah a sei ding chun, amaho lah a um chu nop nuom ka sah lheh tan, mihem ho sanga thil boltheina ka nei chu nop ka sahna lai tah chu ahi. Mi bol theilou bol thei dan chun ka kigel in, mihem hon ei kichat dan hou chu Lengpa chu ka hil jiuvin, ama lah chun “Na nop nop uvin mihem ho chu su genthei uvin! A lu u, a oi u nat sah uvin lang, natna jat jat in engbol uvin” ati ji e.
Melse tah leh kichat chat um a kisem in mihem ho ka su kicha jiuvin, chutia ka mihem chanpi ho engbol chu kidang tah mai chun nuom ka sah lheh tai. Ol ol chun amaho lungthim le hina chu ka nei hitam la ka hethem tapon, nikhat chu Lengpa koma chun, “Leiset chunga hatpen leh thil bolthei pen ihiu vem? Eiho sanga hatjo thilha dang um em?” tiin ka dong tan. Hiche lai tah chun thumop, nidanga asei ngailou chu ei seipeh tai. “Na dei dei engbol un, ahin mai vah set ho lah ah vang chingthei uvin. Na mu mu uleh akin thei pen a na kisel ji diu, a gamlha theipena na lenmang ji diu ahi” ati tai. Hiche ho thu chu thil dang ima a seikit ta poi.

Hiche a thusei chu kidang ka sah lheh in ka na ah aging den tai. Ginchat louva keiho sanga hatjo leh thil bolthei ana um leh ka Lengpau chu thilha lah a ahatpen ding a ka na gel chu ama sanga hatjo chu koi ahi tadem? Lengpa thusei chun aguh in ka lung asuna lheh in… Kimuto pi a ka boltheina ho vetsah ding chu ka tha aja ten tan, kimu jong leh lengpa sei banga kisel leh len mang ding chu ka gelthei ta poi. Hinlah, hiche thilha mai vah ho chu atam lou jeh ham khat vei jong ka toh kha pon, chihtheina dinga asei mai mai hi ding in ka gingmo tai.
Amavang, nikhat chu ka thil mu jouse lah a ka kichatpen chu ka mu tai!! Nilhah langa nupiho thingpo inlam jona kile chu dai chatvai din ka chang tauvin, gamlha thim apan hin ipi ham khat hi ka mu tan, mihem ahi chu la ka hen hinlah a mai chu avah set jeng in; avah dan chu nisa vah bang bang hi ahin, vet ding ka ti vang chun ka ve ngam tapoi. La khat hi ahin sa phei in, hiche a lasah chu ka la het lah a ngai hah pen in ka hen, ka nachang chu pohkeh ding abang jeng e. A masanga kana kigin dan leh ka ngaito dan chu ahi tapon, ei hin nai jep jep phat chun a mai vah leh a lasah chun ka mit leh ka nachang chu pohkeh ding akigo tan… Dai chatvai je jang chu ahi tapon, kei sanga hatjo leh thil boltheijo chu ka kitopi tai. Jam mang lou chu ima dang bolthei ka nei tapon, agang a gang chun ka jam mang tai.

Hitichun phat le ni chu a che jing in, a kum kum ahung hi tan, thilhaho lah a chun kinel tah a ka um jeh u chun nuom jong ka sah lheh tai. Hiche sung hin khatvei jong ka inkote leh ka khosung thu hi ka loiho kom a chun ka seidoh ngam poi. Hinlah, nikhat chu ka lung ahel tan, ka inkote leh ka khouva ka loi le pai ho chu, i ati ta diuvem tiin ka ngaito tan, ka mu nuom lheh jeng phat chun thilha lengpa koma chun, “Lengpa, lungset tah in phat chomkhat ka inkote ga vil ing e, ka hungdohna jong asot jep tan, ka inkote ka ngai e, ka hung kile pai ding ahi tai” tiin ka tao tai. A lah uva ka umsot jeh leh ei tahsan phat u chun ka thusei chu ei ngaipeh tan, hung kile na ding phat ei teppeh a hung kile dinga ka nop jeh chun lengpa chun ei phal peh tai. Hinlah, mihem ho lah a ka che ding jeh chun ka thaneina leh thil boltheina ho chu a lah mang ding thu chu ei hil tan, ka thilto chu koima koma seidoh lou ding in thu ei sap khum in, ka seidoh pou pou leh ka hinna kisan boi thei ding ahi dan ho chu ei seipeh tai.

Kile dinga ka kigot chu ka loi thilha chun ei ngai thei lheh jeng uvin, a tila i hung pui te ni chun ka khopam chen u chu ei hung thah kit lhon in, khopam a pan chun keng in mihem lim le mel chun kum sottah ka dalhah ka khou chu ka lhung tai.

Ka kho-u ka ga lut chu mi jousen vetnom um tah bang in ei ve sou sou uvin, mit lhamang deh deh in ei ve uvin, kidang asah dan u chu koima seipeh lou chun ka hetthem jeng e. Phat sottah hoiya ka vaitham ham? Khothing in eihol thu ho, gamsa ham migilou ho ham in ei tha ahi sah dan hou… thu tamtah donbut sen lou chu ei dong leh seipeh ding a kichu tauve. Imacha seilou chun mipi lah a chun ka che pai pai in chomkhat set jou chun ka in u ka ga lhung tai!!

Kanu in ei mu chun kidang asah val in, a tiphe leuvin, a kipa val jeh chun a mitlhi ahung luongdoh in, chu in ei hung koi in, “Boi, hoiya hitih chan pi chu nei dalhah u ham? Ka ngai ji dan na hetphah lou ham? Na man jou chun khothing in asun ajan jom in ka hol uvin; ka mu joulou phat uvin athi dan a kagel u na hi tai!” tiin kap pum pum chun ei seipeh tai. “Gamlha tah khata ka ga jin ahi” ti kal val chu ima dang la ka seipeh thei pon, guhthim chun ka pona lheh e!!

Ka va mangna asot thim tah jeh chun ka kho u chu ana kikhel lheh jeng tan, chutobang ma chun ka inkote jong… kapa ngaitah jong chu ana um tapon, kanu meithai ahi ka hetdoh chun ka lungthim a tongkha lheh e. Thilha ho koma ka umsot jeh chun mihem ho lah a lhat chu ka them tapon, ima jouse chu athahbeh a ka jil ngai in ka he tan, niseh a neh le chah holna a natoh hahsa tah tah toh chu mihem ho hinkho man hahsat ji ei mudoh sah in, ka umna lui lam ei geldoh sah jin, ka lung ahel ji lheh e.
Chutia mihem ho laha ka va le lai chun nikhat hi ka kho kom uva kho khat ah hin ka loiho to ga che ding in ka kigo tauvin, chu che kho chu keiho kho sanga lenjo ahi jeh chun thil them ho gachoh ding katiu ahi. Hiche kho a ka cheu chun thil jouse a kikhel sah tan… Ka ginchat lou beh thil chu a lhung tai!!

Ka chenau kho a chun ka loite toh khosunga ka vale lai u chun kidang tah in inn khat a kon chun masanga thilha maivah pa in la ahin sah chu ka ja kit tai! Thilha banga ka umtah lou jeh chun ka nachang pohkeh ding tobang chu a um ta pon, ahinlah hiche la chu hetchen nuomna nasatah mai ka nei tai. Ken jong hiche in chu ka jon tan, a la chu mi khat seh in asah hilouvin, japi’n asah u hi ana hi tan, kidang kasah lheh jeng tai. Ka lungdon man chun kholaia vah mi khat chu ka dong jeng tan “Sopi, hichea a lasah u khu ipi la ham, koi ho ham asa khu? Thilha mai vah ho ham?” tiin ka dong tan. Ka thudoh chu hiche pa chun kidang asah lheh jeng in! Mi sat lap lap chun hiti hin ei donbut tai, “Hiche miho khu tulai a pawl thah Kristian kiti ho ahiuve… I nam lah uva jong lut atam thim lheh tan hijeh chun nasatah a doudal ding dan kingaito ahi. A kikhopnau in khu Hou-in atiu chu ahi. A lasah u khu a Pathen u a vahchoi nau la ahi.” ati tai.
Ei donbutna chu kidang ka sah lheh vang in, a thusei chu ipi kiseina ham chu ka hethem chom deh poi. Hichun ka dong kit in, “A Pathen u chu koi ham? Hoilai thilha lengpa ham? Hat lheh jeng a ham?” ka ti tan. Aman jong “Ahi poi, thilha lengpa ahi poi, amaho Kristian te Pathen Chapa, amin chu Jesu Krista ahi atiuve” ati tan, kidang sah tailou chu ima sei ding ka he tapoi. Thilha Lengpa ham ka na ti chu Pathen Chapa joh ana hi ham? Jou ti ding in la thilha ho lah a ka umlai in a mai vah dan ho ka mit tah in ka mu chen tan, jou thubuh chu hi lou ding ahi!! Ka lungthim chu nasa tah in a boi tan, a thusim u leh a Pathen pau thu chu het nomna ka lungthim a chun a dim tai.

Hichun kei jong ka kitim jou tapon, jachat jong hetalou chun a kikhopnau a chun ka ga lut jeng tai. Mi tam beh lou hi hou-in atiu a chun ana um in, kimkhat chu vaichat melpu tah jong aum uvin, hinlah ka neilou ipi ham khat chu anei ngei uve ti hetna khat nei in, mihem kampaova seithem jou lou kipana chu anei uve.

Jahcha pum pum chun “Na Pathen u thusim hi nei hil tem uvin! Ka hetnuom lheh e” ka ti jeng tan, ei houset diu ham tia ka gel lai chun, mai lhaisel leh nui seu hin mi khat hin “Lekha na simthei leh hiche lekhabu a kisun hi ana sim in… Hiche ah hin na hetnom jouse a kijih e. Na hetchen nuom leh ama Jesu komah tao jeng in” ati tai. Hitichun tao ding dan ho ei hil jou chun ka pot tan, chulai a ka lungput chu ima ka hethem pon, ka thilbol chu adih adihlou jong chu ka he poi.

Haosa cha khat hina jal chun ka khouva lekha sim thei lhomcha lah a khat ka hi jeh chun hiche lekhabu ei peh chu ka sim thei ding ka he in ahin asunga kijih chu simthei he simmo ham ti chu ka boina ahi tai. Ka sim leh Gimnei lhang a thilha lengpa ka dalhah tina ahi dem? Hin hedoh leh ei that nuom dem? Dohna tamtah chu kei le kei ka kidong tan… Hinlah ka thil hetnuom na chu ka kitim jou ta pon, Jesu Krista atiu chu ka hechen nuom lheh tai.
In ka lhun lhun chun hiche lekhabu chu ka keovin ka sim tan ahileh vannoiya ka het ngailou, ngailutna leh lungsetna a dim Pathen thu chu ka simdoh tai. Amasanga ka thilto leh lekhabu a kijih chu lei le van abang jeng tan, mi kana suhgenthei ho chu adihlou dan ka hin hedoh tai. Jesu Krista chu ei damsahpa leh lungdong genthei ho kingaina ahi dan chu ka hin hedoh tan, akidang in loupi ka sah lheh e!! Thilha lengpa toh chun sun le jan abang jeng tan, ka lekha sim sung chun masanga ka het ngailou, kichatna leh lungdongna lhagao hilou, tuni chan a jong ka hetthem jou lou lhagao khat hin ei umpi hin ka he tai. Ni danga kana bol ngailou beh ka kholai lenna a Kristian pan ei hil bang bang chun Jesu koma chun katao tan ahi!!

Mi chonse ho lah a jong chonse pen, thilha ho toh kivop a mihem ho sugenthei a engbol ji pa chu Pathen ngailutna khen tum umlou chu ka chang tai! Hiche hi ahi ngailutna chamkim chu!! Ama chun ka chonsetna bang in ei lethuh pon!! A loupi ta ngei e!! Kana pengthah tan, Krista ah ka hinna kana pelut tai. Hiche a ka penthah jou chun ka hinkho chu nasatah in a kikhel tan, ka khomi ho muthei leh kidang sah thei khop chun ka hinkho chu a kikhel tai.

Kholai dung a chun Pathen ngailutna thupha chu ka seiphong le tan, kichatna imacha jong ka nei tapoi. Ka thusim kidang tah chu ka lhangsap le in, Pathen galjona loupi chu ka phong doh tai. Ka khouva chun tahsan mi a pun be cheh cheh tan, ka kipah lheh ji e.

Chutia ka penthah phat chun thilha ho jong chun ei dalhah u hitan te tin ka na gel in, hinlah ana hi naisai poi. Jankhat hi Pathen thu ka seijouva ka kile nung hin ihmu ding ka kigo in ahileh masanga ka na hetkhah sa, phat sottah ka het tahlou, ui namse tah, thilha nam ngei chu ka he kit tai!! Ka ning ka lai akihel jeng in… Masanga mi ni hung ji chu mi gup mi sagi jen ahung tauvin, a mel u chu lunghan melpu leh phuba la dinga hung ahiu chu ka hethei ngal tai. “Ipi ham na dei u? Na kom uva umthei ka hi tapoi. Leng dang ka bel tai… Nei dalha jeng tauvin” tiin ka peng jah jeng tai. Amaho lah chun “Chuti mai in jam doh thei pon nate… Ka masang uva na kihasel ahi tai. Ka lengpau in ga pui dinga ei hinsol u ahi. Na hung nuom lou leh na thi ding ahi” ati tauvin. Ken jong “Ka tahsa chu na suhnat thei diu ahi, ka lhagao vang ima lo thei chom pouvin nate. Ka kicha ta pouve!” ka ti tai. Chutia ka sei lai tah chun alah uva khat chun ipi ham khat hin ka keng chu ahin jep tan, ka gu bong chu ka he ngal tai. A nat dan chu seijou lou hin ana in, hinlah ka kicha chom deh pon… “Nazareth Jesu min in hilai mun akon hin leng mang tauvin” tiin ka peng jah tai. Ka hinna chu ei lahpeh thei chom pouvin, amaho jong a jam gam tauve. Chu che nia pan chu ka loi luiho chu ka mu ngai tapoi.

Ka hinkho lampi a hin mi in ato khah lou thil tamtah ka pal galkai in, a chaina chu Pathen in ei ngailutna seijou lou vang a huhhing a um ka hi tai. Ka keng thilha hon ei voh jeh u chun tuni chan in kengbai in ka um lo in hijeng jong leh khoh kasah poi, a suhnat theilou u ka lhagao vang hi, ka thi teng leh lhamong sela Pathen koma choldo ding ahi tai. Pathen chu loupi jing ta hen!!!

PS : Hiche hi atah tah a thilsoh ahin, mun min ho vang ka hetchen chet lou jeh a ka sah thu ahe. Christian hinkho loupi dan a thahbeh a i geldoh cheh diu i kinem uve. Hichen hin akichai tai.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: