THU LEH ATAH : KA LE HAGELNA LAMPI

“Tujan vang hung len da mai ta’nge, ka bike ka siemsah e” ka ti jong chun, “Auto in hung jeng o!” ati jeh chun auto ka la in, Salbung lam jonin ka lhai jel jel tai. Angaina bangin ka leng sot kit lheh tan, i deiho koma um vang chu pung jong hi a kipei gang chuom lheh jin, ache hilouvin alhai a lhai tho abang in, het manlou kah chun jankim dah 12 ana ging kigo tai.

Kile ding ka got phat vang chun 12 aval tan, a inmai uva chun Auto ei nga pi in. Hijongleh, jan asot tah jeh chun ahah lheh tan; ahah seh hilouvin, aum tapon ahi. Ei hung pui din ka melhet ho chu ka phone le in, koiman jong phone chu a la ta poi. “Mmmm… lut mai o, kengin che mai tang e, lampiah khat beh kimu nan te,” ka tin. Ama chu insungah ka sol lut in, lampia auto mu tei ding kinem in kengin Molnom lang jon chun ka che phei tai.

Khomawi ka lhung phei in, auto hung lhai aum khah leh tiin chomkhat jen chu ka ding den in. Minute 20 tobang ka nga nung jong chun bike ni hat taha hung lhai tilou chu gari dang khatcha mu ding aum tapoi. ‘Tuibuong beh ah um tei nan te’ ti lungthim pumin ka che che kit in. Tuibuong ka ga lhun jong chun auto mel mu ding aum pon, gari dang him him khata khat jong aum tapon, ka lungdon man chun Hmar veng lam jonin ka kihot phei det det kit tai.

Bijang ka phah phat chun ka keng akham lheh tan, ka kengphang chu ka kengkoh sunga chun asa vut vut in, ka kong jong chu akham lheh in, ka chol kit chutoh, ka lung ahung moh han tai. Ka nungahnu chunga chun ka lunghan tan, ‘Hung len da mai inge’ ka ti nungin jong, ‘Hung leng ham ham o’ ati tei tei chu ahi in. ‘Ama ding bou a kigel in, Salbung apata D.Phailen chan kenga kile ding hi leh…’ ka lungthim chun ka ti in, ka kihot phei phei in. Hiti lai chun ahin phone in, ka lunglhai beh lou jeh chun ka lah nom pon, ahin call jing in, ka chol kit chutoh ka reject pai pai jiin. Som vei val jen ka reject nung chun, “I dia na reject hm, hoilai n phah tm?” tiin message ahin thot in. Hiche jong chu ka reply nom lou jeh chun ahin call kit tan, hijong chu ka reject kit phat chun, “Ipi ti ham, na lah nomlou, reply kit lou, hoiya na um ham?” tiin message ahin thot kit in. “KENGIN KA CHE’N, LAMKA KA LHUNG TAI” tiin lunghang thim tah chun ka donbut in. Ahin call pai in, ‘Ka lahpeh jeng di tam aw…? tiin ka kingaito to in, a ring kichai kuon don chun ‘green button’ chu lunghang pum chun ka gah meh in, “Ipi hammm…???” ka gah ti in. Ama chun ei khoto thu leh nopmo asah thu chu ahin sei sei in, kei vang chun kamcheng khatin jong ka donbut poi. Achaina chun, “In ka lhung teng na’n hil nang e” tonglot chun ka ti in, ka off pai kit tai.

Ka keng ho chu akham val tah jeh chun adul soh bang hin ka hen, ka kengphang jong chu apeh lha gam tai. Phalbi lai hijongleh, ka ulsa in ei chup kigot phat chun Zou Veng ka lhun chun ka jacket chu ka moh sut tai. Old bazar apat Phailen lang jon dia ka gah kihei tou lai chun Auto khat hin ei hin lhaipel jot in, ka masang jepa chun a kinga in, ei hin kouvin, “Koih pai di?” ati in. ‘Salbung apatin auto ka hin hol phei peh in, hichan chan kengin ka hung tan, tua ka lhun kigot phat a “Koi pai ding… de de de…” hung kiti, na paina nom nomah ga kipai in’ tia gah houset jeng ding chu ka nom lheh in. Hijongleh, ka kitim ham ham in, athu a gah sei tahbeh jong chu ka ngap tapon, ka khut jap chun ‘ga kipai loi loi thimin’ tiin ka sol in, songchang khata gah se ding chu ka tha aja lheh e. Salbung apata “Auto khat beh ana um tei nan te” ti kinem puma hung kihunga khata khat jong mu phah ding umlouva, Old bazar chan keng pom leova hung kiho phei det det nung vang chun lunghan a le-um jo tan ahi.

Auto chun ka lunghanna chu ahin kaithou kit in, nilhah tila kholaileng dia nungahnun ei kou laiho chu ka geldoh kit in. Ka lungthim in, ‘Hichan chan kenga ka kile ding ana he masa leng, kaga len tah leh… ei kou kit jongleh kenga kile kit ding sangin ga leng tapong e…’ tiin ka kitem jah jah in, achunga ka lung ahan jong chu kei le kei chu ka kioimo pon, a message ka donbut lou leh a call ka lah nomlou ho chu bol pha lheh chun ka kihen, phate tea ka houpi nomlou jong chu thiem ka kichan lheh e. Phalbi khovot nuoia Salbung apata D.Phailen chan jankim janlaia, i guotsa jeh jong hilouva kenga gah kile jeng vang chu lunglhai chu ‘kahase’ ahi jeng e. Kipah leh lunglhai taha chomkhat kaha kana kilena lampi “Lunglhaina Road” hi ji chu tujanin vang ‘Ka leh Hagelna Road’ soh jou ta danin kana jot lhung tai.

In ka lhun chun ka chol valin ka lupna chung se nan ka kinei in, ka lhun thu jong hil nom louvin ka kengkoh ka sut lha in, ka mu pai tai. Ka mut lai chun ka phone kithing jing jeng chu he kiu keu jongleng ka don nom pon, chomkhat kah chun kana imu lha tai.

MESSAGE EI JACHATSAH CHU
Jingkah ka hung tho tho in ka phone chu ka ve in, ’20 miss call’ leh ‘1 unread message’ ana um in. Message ka gah hon hon chun ka kinlap jeng e! Masanga ka message thot ma ma chu ei hin le thot in, ka thot ni jong chu pha tahin ahin jihlang in – ‘Even if you want me to, I would walk 100 miles for you, my love!’ Kum kipat langa ka thot chu ahi ti ka hechen pai e. Ka lungthim chun ama dinga mel tamtah jong jot ngapcha’n ka lungset thu kana thot in, hijongleh, atah tah ahung lhun phat vang chun kana jou mong mong tapoi. Mel 100 jong jot ngapcha dana kisei chun Salbung apata D.Phailen ka jot phat chun ka lunghan dan leh ka vetda dan chu, mel 100 tahbeh jot ding hi taleh… aw kaden! ‘Sei abai in toh ahah e’ kiti bangin thu kisei ho hi ataha toh doh vang ana hah lheh ding dan hija hi o, i bol theilou ding pi hi ana moh sei sei lou ding hija hi o, tiin ka kigeldoh in, ka message thot chun ei jachatsah lheh jeng e!

Ka lungmit in ka loipa Letpu ahung kilang jot in. Masang jepa a dongmanu’n a khen jeha kikhailih agot dan, ka nuijat dan dan hou chu ahung kilang doh in. A dongmanu’n a khen jehin ‘Kei din hin lo aum ta poi’ tiin lhase leh lungkham tahin khaogui toh a huon uva lamkhong phungah kikhailih din ache in. Lamkhong phung alhun masang in gul khat amu in, a kicha valin gang chalin a kihei in, a khaogui choi chu apai in, ‘Gul… gul… gul…’ tia peng pumin ha tahin inlangah a lhaitou in, a inkote komah ‘Ka thina ding themkhat bou a kivat e…’ tiin gul a kichot khah dehchet leh achuh man dehchet thu chu hai the thu pumin ana sei in. Aphat lai chun kana ha nui dan u chutoh, keijong ipi ka hi chuom em? Ama dinga mel 100 che ngapcha chun mel 10 jong lhinglou ka kihot det det in, ka lunghan jehin kana houpi nom pon! Ka lungthim chun ‘Jachat jong na he mo e…’ ka kiti ti tai.

NA SEI MA’IN GEL MASAN
I inmaia electric khoma jong kaldoh thei louvin, ‘Nang din vang ahsi jong lahpeh ding ka ngapcha e’ gah kiti jeng ho hi, pha taha i gah gelchet leh nuijat aum lheh e! ‘Nang din vang thi jong ka ngapchat ahe!’ ti pum pumin, thi chu seilou jumna neo khat jong i ngapcha kit ji pon. Jum sang chun tiin a guha toltha (na hetthem em!) i lheng jo ji tai! Sappao kithepsah taha, ‘I’d do anything for you’ tia lungsetna thu sei chimlou chun ei ngaichat lai lai leh “KA BUOI E’ ahi kit dapveh ji ho i le ngaito teng jachat aum lheh e.

Hitichun a message hin thot chu donbut je dan jong kana he tapon! “Ka bol thei ding leh ka bol ngam ding valin ima sei tapong ting, ka sei jouse vang bol thei leh bol ngam jing ka got ding ahi tai” tiin ol chan kei le kei chu ka kihou hou in, chomkhat jen ka kun den in. ‘Na thusei ding jouse na sei masangin kichen tahin gel masa jing ji in’ ka kiti in, lungthim thah put tei ding gelin ka lupna apat chun ka kithou doh tai.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: