THADOU-KUKI PAOVA THU JIHDAN

Pao kiti hi leiset mihemte dia poimo tah ahi ti chu kinelna bei ahi! Nam tin hin eima eima pao i nei cheh uvin, nam ching leh khangtou jousen a nam pao a ngailu in, a gelkhoh in, a ja thiem e. Linguist or linguistic expert vang ka hi deh pon, hijongleh, English medium school hung kaia High school hin chai thei khat chun grammar i hin sim soh kei diu ahin, hichu iti manchah thei ham ti leh ei paova thu jihdan themkhat ana ve u te.

THUJIH TENG HET DING :
*Thucheng chu a kijoma jih ding ahi
*A tam thei pen a tuma jih got ding ahi
*Jih jomna ding a jeh i het bou chu a kijoma jih ji ding ahi
*Thucheng laha khenkhat chu jih jom lou phat aum ji e.
*Thucheng jih jom ding het dan : Hiche hi i buoina pen u khat leh hiche post hung kibol lona pen jong ahi in. Hiti mong hen ti thei ahi lou jehin lam chuom chuomin ana ve u te.

PARTS OF SPEECH:
Thadou-Kuki simlaibua parts of speech iti kihilchet ham ti lam vang chu ka he deh pon. Anuoiya hi English a ana kisim parts of speech umdan chu ahi.

1.MIN (Noun): mi ham, thil ham MIN seina ahi.
Vetsahna :Thangboi, Motbung, chapa, leiset, in, etc.
2.MIN KHEL (Pronoun): Mi ham, thil ham khela kimang paocheng hi ahi.
Vetsahna: a, i, ei, ka, kei, nang, u, etc.
3.MIN HILCHETNA (Adjective): Mi ham, thil ham khela a hina hilchetna thucheng ahi.
Vetsahna: hoi, lien, neo, ngol, sang, etc.
4.THIL BOL (Verb): Mi ham, thil hamin thil a bol seina paocheng ahi.
Vetsahna: bol, don, che, poh(nao poh, bag poh), sah(in sah), sol, etc.
5.THIL BOL HILCHETNA (Adverb): Mi ham, thil hamin thil a bol hilchetna ahi in; min hilchetna(adjective leh thil bol hilchetna(adverb) ma ma kichen joa hilchetna ahi kit e.
Vetsahna: cheh, jep, joh, lheh, nasa, pen; Double Adverb – cheh cheh, jep jep, pi pi (pasal pi pi), etc.
6.THU NUNGJUI (Post Position): Thucheng kimkhat, a masanga thucheng dang toh pang khom seina ahi.
Vetsahna: achun, adin, -ah, -in, etc.
7.THU JOPNA (Conjunction): Thucheng leh thucheng ham, thujih che lai jom dinga paocheng kimang hi ahi.
Vetsahna: chuleh, chun, ham, leh, jongle, etc.
8. THU THONG (Interjection): A pha lam ham, a se lam hama pho louva thil hung lhung, lungthim khoi dot thei thu gah het leh nasa joa seina ahi.

THU BEH (AFFIX) CHU:
Thadou-Kuki hi hen lang English hijongleh thucheng belapna, ‘thu beh’(affix) kiti hi jat ni, thu ma beh(prefix) leh thu nung beh (suffix) aum in. Chuche thucheng chu thu i jih teng a chunga kisei parts of speech a khu hina a nei em ti hetchen ding ahi. Hichea hina nei lou chu prefix ham, suffix ham tina ahin, a nung leh a maa thucheng toh jih jom ding ahi.

(Anuoiya thuchengho hi a lhingset ahi deh poi.)
THU MA BEH (Prefix):
a, ki, suh, kisuh
a = a i mandan u hi pha taha jil ngai khat ahi. Thadou-Kuki paova ‘A’ a tam jo hi minkhel (pronoun) ahi, ahinvang thu ma beh (prefix) bangin i jih gam tauve. Prefix a hina hi paocheng lhom cha bou ahi, hijong chu thu ma beh (post position) ti thei ahi nalaiin ahi. Vetsahna: achun, adin, ahi, etc.
ki = kinah, kikhop, kisil, kichep, kidei, etc
suh= sukhel/suhkhel, suhset, suhmang, suhto, suhlunghang, etc.
kisuh= kisuhset, kisuhkhel, kisuhkhah, kisuhlunghan, etc.

THU NUNG BEH (Suffix) : Hiho hi a masang cheta thucheng toh jih jom ding ahin; hiche ho chu:
a, ah, cha, dan, ho, in, na, pi, sah, san, te, um
a= motbunga peng, chema sat, hichea kisei, hiche group-a hi
ah=motbungah ka che, hicheah hin, hoilaiah em
cha= Mihem leh thil dang mina cha ti a pan teng jih jom lou ding ahi; naocha, themcha, chemcha, ahcha, vohcha, etc. Amavang, thucheng nasa jo cheha seina (emphatic particle – khat cha jong, hiche chapang cha hi, etc) chu adverb/adjective ahi ji jehin jih jom lou ding ahi.
dan= sandan, letdan, nasatdan, thuhdan, tuidan, ngoldan, etc.
ho= Michingho, boubolho, chapangho, nangho, etc. (Noun/Pronoun khat sanga tam i sei teng plural suffix ahi in, a masanga thu toh jih jom ding ahi.)
in= dingin, tahin, inn sain a kon e, molin a jep e
na= thujih kijilna, chenna, gena, kinahna, kiletsahna, phatna, hoina, kilungsetna, kiseingaina, kilungkhatna, etc.
pi= chepi, lhonpi, kineppi, phai che khompi, jan hapi, etc.
sah= hisah, jachatsah, kiboltheisah, etc.
te= loite, chapangte, pate, tute, chate, gentheite, chagate, etc. (Noun/Pronoun khat sanga tam i sei teng plural suffix ahi in, a masanga thu toh jih jom ding ahi.)
um= deium, ngaium, ngalelum, etc.

Het dinga deium chu, hichea hung kitah lang thucheng ho hi hen lang itobang thucheng hi jongleh i thu jiha chu a pan ding teng, parts of speech laha a jao louva leh affix (prefix leh suffix) ahi tina ahin, het khen them got tei ding ahi.
——————————-
NGAITO JOM DINGA PHA…
1.Thadou-Kuki paova, IE, UO, H, R, adh.(adangho) lahlut dan ngaito a ngai e.
2.Nidan, Nikho, leh Lha minho eima paova man ding.
3.Eipao i man teng eimi jouse, chapang pen apata tehse pen chanin a hetthem thei dia man ding.
Ka gah sei nom chu, mi kimkhatin thucheng spelling chu a thugola het doh ding ahi tiin a pang chahkheh uvin, thugola hetdoh thei chu koiman a kihai poi. Vetsahnan, bailam taha ‘lien’ kiti chu a neo hi lou leh nga matna ‘len’ kiseina ahi poi ti het doh thei ahi laia, ‘a len chu’ gah tia nga matna len ha, hoi lang vahcha leng (modified form of ‘len’ or vice-versa) kisei ham tia kicheh lou taha thu sei sanga ‘IE’ spelling hi lahlut ding ahi. Chutobanga sei ding chu tam tah aum e.

A chainaa ka sei nom chu, group-a thujih leh post kibol jouse hi, ken ka he e tinaa kisei ahi pon, phatchompi thei aum khah leh phatchompi u hi te ti deisahna jala hung kibol/kisei ham ham ji ahi.

11694887_710045952440411_6567257473264154971_n

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: