SUCCESS STORY : IRA SINGHAL

(Mihingmo IAS Topper umsun chu)

2015 kuma UPSC Civil Service Exam 2014 result kiphon chun kidang tah maiin nungah hingmo, a pen apat tingbonga a dei banga jong chatle thei lou, Ira Singhal chu a lhing bouseh jong hi louvin khatna-ah a hung pangin ahi. India sunga exam hahsa pen ho laha IAS Exam-a nungah hingmo khatnaa a hung jeng chu, mi tam tah datmah lou thei ahi ta pon, a phat laia mi kihoulimna nasa tah khat jong ana hi mong e.

16427795_1067403336704669_8774885529106392576_n

Ira Singhal hi tingjang gu kito lou jeha tingbong, feet 4.5 bep-a sang, a dei banga jong chatle thei lou ahi in. Hijongleh chuti pum chun lungdong chuom louvin a pang in, school a kai sungin jong record hoi tah tah a nei in. A chaina chun India gam sunga ‘lekhathem leh mithem ka hi’ kiti lakh 5 tobang laha a bol pha pena pang in, IAS Topper a hung hi tan ahi.

PROFILE
Ira Singhal hi Pu Rajendra Singhal leh Pi Anita Singhal teni chanu hi din Meerut-ah a hung peng in. A pa hi Engineer hiin a nu hi Insurance Advisor ahi. A pen apat chomkhat jouvin a natna chun a hin suboi pai in, a damsunga mi pha jou ta lou ding ahi tai tiin a nu le pa jong chun a hethem pai lhon tai. A lungthim beh chu a vah lam kopeh tei a, a lungdon jeng louna din jo chanin a hin vekol tou lhon in. Lekhasimna lama jong ama’n a jo chana simsah ding ngaitoin bolthei chan a bolpeh lhon in ahi.

Sophia Girls School, Meerut-ah school a hung kai pan in, chu jouvin Army Public School, Delhi-ah a ban a hin sim kit e. Hiche school tenia a kai sung hin topper-ah a hung pang tou peh e. Class-XII hoi taha a hin chai nungin Netaji Subhas Institute of Techonology-ah B.Tech a sim kit in, pha tahin a hin chai in, campus recruitment-a jong na pha tah tah a mu e. Hijongleh, natoh ima jom ta louvin Faculty of Management Studies, Delhi-ah MBA a sim jom kit in. IIM-a lut theina chance nei nama jong leh, a nu le pate’n Delhi dalha louva lekha a sim theina ding joh tiin IIM-a chun a lut ta pon ahi.

IRS-a lhing, Govt. in dei lou!
Kum 2010 chun Ira hin UPSC Civil Service Exam ana bolin lhing jong ana lhing e. Amavang, a rank hoi beh lou jeh chun a third choice, IRS chu peh ahi. Pha taha training a jo jouvin, posting-na mun ho suhtup ahi lai chun Ministry of Finance akonin a ginchat phah lou lam tah lekhathot khat a mu ta in. Penphunga hingmo ahi jehin post khatcha jong tuh thei ahi poi a hin ti jeng tauve. Finance Minister leh Commerce Minister ho komah lekha a thot un, medical report leh fitness certificate ho toh tho puma iti a sei vang u chun, donbutna ana mu ta poi. India gama mihingmo lakh tam tahho dinga model kisonpi thei tah khat chunga hitobanga Govt. thilbol dan hi a kidang lheh in, a chungchang thu hi media lama jong nasa tahin seikai ana hi in; hinlah, a hahsatna chu ima suhlhap ahi ta poi

Amavang, hitiho jeh chun Ira chu a lungkham chuom naisai pon, tompanna johin a la in. Central Administrative Tribunal-ah thuboi a lhut in, Govt. thilbol dan chu a complaint in, hatna jong ana chang ngei in, kum 4 nungin posting a hin mu thei tan ahi. Hiche sung hin UPSC hi ni vei a tou kit in, vangsetum tahin a lolhing jou ta poi. IRS chu a jom in, na a toh nungin jong IAS-a lhin tei ding a go in, Exam-a din ha tahin a kigo jing peh e. A chaina chun a tup pen chu a hung lolhing ta in. Physically Handicapped laha UPSC Civl Service Exam-a topper masa pen a hung hi tan ahi.

Ira nu le pa, Rajendra leh Anita Singhal teni lungthim leh lunggel jong hi pachat lou thei ahi pon, a loupi lheh jeng e. A chanu lhon Ira a hung peng in, phat chomkhat jouvin mi toh bang lou ahi chu a hung kilang pai ta in. A chanu lhon, mi hingmo chu imacha deimona leh pampaina um louvin a hin vekol lhon in, a tum beha boipi ngai ahi tah jeh chun cha dang jong nei thei ta louvin aum lo lhon in ahi. Ira IAS Topper ahi ti a het phat chun a pa jong mitlhi luong jah jahin kipa jalin a kap jah jahin ahi. Hitobang taha chate dinga kiphal ngam nu le pa a nei hi Ira lolhinna lampia thil poima tah khat jong hi tei in te.

COACHING or NO COACHING?
Ira seidan in, a lampi ima a het lou jehin 2010 kuma UPSC exam a bol masat pen ding phat chun coaching class ana la in. Chuche phat lai chun internet material ana tam beh lou jehin coaching a lah hi a phatchompi lheh e. Tunungin vang internet-a material a tam tah jehin coaching lah khoh khoh hi poimo tah hiin a gel ta poi. Hijongleh, mihem ngaichat a kibah lou jeh leh ama changa lekhasim hahsa saho din vang coaching kilah sanga pha um in a he poi.

“Ka insung uva hin mihingmo hi jeha hahsatna ka tuo u hi kilepna lhing ahi poi. Midang hon target a kisem bang bangin target ka sem in, miho sanga nasa joa ka pan ngai ahi ti ka he e. Eima kitahsanna hi nei angai mongin ahi. Eima I kitahsan phot leh imachan ei dal thei poi,” a ti e.

PREPARATION Strategy of Ira Singhal
* “Thil danga kisahboina um thei jouse akona kikangse ding”

* “A basic apatin pha tahin ka sim in, NCERT syllabus leh lekhabuho phatchompi thei tah ahi dan ka mudoh e. Pha taha sim tei tei ding ahi.”
* “Online material ho-ah ka kingam nasa lheh e.”

* “Topic khat hetchenna din lekhabu chuom chuom ka sim ji in, ka lekhabu sima a poimo lai ka underline ji e.”

* “Ngaidan jat chuom chuom um theiho het ka nop jehin ka loiho toh thil ka seikhom nasa lheh jiuvin, hiche hin thil hetchenna lamah ei kithopi lheh e.”

* “Nilhum lhuma lekha sim thei ka hi lou jehin, study plan ka kisem thei dan chu pungkal bituh lam hi louvin course khat pha taha hetchet masat phot ding hi ahi.”

* “Thil danga ka thanopna ho bolna phat ka nei theina din phat-ong ka kisem ji e.”

BOOKS referred by Ira Singhal for UPSC CSE Mains
– Old NCERT Indian History
– Spectrum Modern India
– New NCERT Indian History
– New NCERT – India Since Independence
– Old NCERT World History
– Laxmikanth – Indian Polity
– Wizard – Science and Technology
– Lexicon – Ethics

A thusei loupi tah khat hi a chaina in…
“Hiche gam hi ka gam ahi in, a khantouna ding ngaito hi ka mopohna ahi. A ning khata tou touva seise jing jeng din ka kihe poi.”

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: