PAHCHA NUKHAH PEN

May lha kichai lam ahin, ka kholai uva inn se thim tah khat chu tehsepi leh numei chapang, kei sanga chapang jep khat chun ahung luo lhon e. Kumkim lang hita jongleh, ahung kilhoh lut ni lhona pata kal khat jou chun, chuche numei chapang Chichin chu ka school uva keiho pawl(class) a chun ahung kai pan tan. Anung penah ama changin a tou jin ahi.

11265090_689478837830456_4960132041748719160_n


Numei chapang jahchase tah, gong king keng, sam pha lit let, thip khin khen hi ahi. Mi thah ahi jeh leh a mihina jeh jong chu hin tin, koiman kivoppi mitin ka ve pouve. Ama vang chu numei chapang nunnem leh kipah jing thei tah ahin, koiman ka houpi lou u vang chun mailhai sil selin anui jing thei in ahi. Ahung umna u inn chu ka school lampi ahi jehin ka kilhon khom jing lhon tan, ka pawl lhon kibah kit chutoh, ol olin ka hung kiloi tou lhon tan. Hiche jouva pat chun ka komah ka tousah in, ka kinel lhon tah jehchun ka loi dangho jong chun an kiloipi tou tauve.

A pha in, a kipah jing jeng thei in, chuleh milim jih hi ana thiem lheh kit e. Kei vang chu pasal leh numei lim jong jih khen theilou khopa thiemmo kana hi e. Limjih chu a thep lheh jehchun ka lekhapeh hoa chun ka jihsah jin, ka loi dangho jong chun ahin hedoh tauvin; gam limho, inn limho, chapang kichem lai limho, nisa le lha limho chanin a jihsah sou sou jing tauve. Alien jep leh gilou jep ho vang chun a jihsa naltah tahho chu a lahpeh un, achang leh innlanga jihsah din lekhapeh ho chu a pohsah jiuvin ahi.

Home work a hao leh hao lou ho, test ding ka nei leh neilou u jong ngaito louvin limjih din asol jing jiuvin. Ama vang chu ima jong ada ngai pon, a seise ngai poi. Nui sil selin a lekhapeh u chu a pohpeh jin, ajing leh kipah tahin milim chu ape kit jin ahi. Koiman a seipha ngai pon, kipathu cha jong asei ji pouve. A deibang uva an jihlou tengle a house uvin, a seise uvin, adang a jih phatsah kit jiuvin, hijongleh Chichin vang chu aphun ngai poi. A chol ding dan ho, a picha lhon bou ahi jeha tohding leh thamding a hao ding dan ho, kumkim laia school hung kai pan ahi jeha lekha sim ding a hao chuom ding ho chu koiman kana ngaito phah lou u ahi ti chu vai khonunga ka thil hin hetdoh ahi tai.

Sun teng leh sun-an ka ne khom jiuvin. Chichin chun niseh hin ankam changpah me bou hi ahin kipoh jin. Eima kipoh chu neh jeng din kana gel uvin, ka me kipoh tuitah tah ho u chu gah hop ding lam jong ka ngaito pha pouve. Niseha me ngai ngai, ankam changpah bou ahin kipoh ji chu ajeh umlam jong kana geldoh pouve. “Ipi jeha hitobang bou hi nan kipoh ji ham, tui na sah toh nah uve?” tiin totnopna bepin kana mang jiuvin. Hijongleh, koiman ka me tuitah tah ho u chu gah hop nachang kana he pouve. Ahtui leh aloo kikang ho, maggie leh dal kikang ho a duchat ding dan jong chu ka ngaito pha pouvin, a vaichat jeh uva me tuitah tah an kipoh theilou ahi ti chu ka ngaito pha him him pouve. A koma chun tui sah tahin ka ne jiuvin, ka nehmoh u chu achang leh kichep nopna pouvin ka nei uvin, kisetona ho pou chun ka nei ji tauve. Hijongleh, ima helou bangin aum jin, khatvei jong a thum lam kana he kha poi. A chanbep chu tui tah leh lunglhai selin ane ne jin ahi.

A school form ho jong chu mi danga laha chun achul lheh tan, miin a deimo sa ho apeh ahi chu a kihedoh thei jeng e. A jachat ding dan ho, keiho banga uniform pha leh thah lih leh chu adei tei ding ahi ti jong ngaito peh louvin, kimkhat chun totnop nan aman khum jiuvin. Muhthiem jep ho vang chun, ‘Na kengkoh chu sepai hi leh saplien tah hitei in te, a kibeh tam lheh tai,’ ati jiuvin. Kei chun panpi ding lam jong kana gel pha pon, ka loiho totna chu a hanuipen penin kana pang kit jin ahi. Hijongleh Chichin vang chun ei vetda ngai pon, ka chunga jong a lunghang kha poi. A nuoise ho chu milim jihsah hatpen pen ho ahi kit jiuve.

Lha thum tobang bep school a hung kai man in, nikhat chu nu le pa tamtah hi schoola chun ahung kijot lut uvin. Lunglhai lou tahin school office a chun alut tauve. Chomkhat jou chun jilkung khat hi ahung in, school kichol ding thu chu ahung phong tan. Chichin chungchang thu angaito diu ahi lam chu hiche phat lai chun koiman kana he pha pouvin. Kipah tah chun inlamah ka kile tauve.

Monday jingkah ahi in, nidang bang bangin school kai din ka che kit tan. Kisiem jong kisiem louvin a innlhang u, ka school chena lampia chun ana ding in. A mel chu angui lheh in, a mita chun mitlhi amom doh tit tet e. School kipat phat hita a, kisiem louva ana um ka mu chun ka detmah lheh in. Hichun aman ei hin jon in, ima jong ka doh masang chun lhase tah hin, “Guolpa, tunia pat school ka hung kai lou ding ahi tai,” ahin ti in. “Ipi jehin em?” ka ti pai in. “Kei hi AIDS vei chapang ka hi e. Ka phatmo jeh jong hi louvin, kanu leh pate jehin AIDS ka vei in, amanin jong ei thi san lhon ahi tai. Ka umna masaten ei musit un, ei thet val jeha na kho uva hung kichon lut ka hi e. Friday nia nu le pa tamtah schoola ahung u chu na het em?” tiin ei hin dong in. “Hi e, school jong i kikhen mat u chula,” ka ti pai in. Ama chun, “School chapang nu le paten ei hehse uvin, ka natna hi a chate u kai khah ding a kicha uvin, school ka kai jing di leh a chate u schoola kona haisah ding ati uvin, hijeha chu kei joh ei haisah u ahi tai. Hijongleh, koima ka vetda pouvin, i kikop thei tahlou diu hi ka gel leh ka lung ahel val e. Ka dam phot leh school kai dia na hung kana galdot jing di na he,” ei ti tai.
Chuche lai chun AIDS chu ipi natna ham ti leh itobanga kikaison ji ham, a veiho chu itobanga ngailut leh kithopi ngaicha hi u ham ti jong chu kana he pha pon. “Hiti ho mai mai chu, tuni hi drawing subject i lah ding u ahin, jilkungpun ka lim na jih di u ahe ati chu na hetlou hi tam, anop nop di toh,” i jong sah lou tah chun ka tin. Ama chu tuol lang vein akun pai in, a sangkhol ap bit beta chun a mitlhi a kitheh theh tai. Sei ding ka he tapon, “Dah ging di ahi tai, kei che tang e,” tiin ka golnu lungthim na tah, school kai nom ma ma chu lhep ngai ahi ti jong he pha louvin ka dalha tai. Khonungin ka kigel leh GOL ti dia lhing jong kana hi pon ahi.

Setna nei louva kigel a, noti nu suonga seplih kigo ho cha leh tute vang chu angai bangin school ka kai jing peh uvin. Jingkah seh hin ka school kai ding chu Chichin chun a kotcha uva kon chun nui sel hin eina galdot jing jin. A inn jon ka lhun phat le chun pahcha leh thingna kikanbeh neocha, lekhapeh a kituom hi ei hin se lhah peh jin. Pahcha kituomna lekhapeh chu ka hong loi jin, hia chun milim naltah tah hi ana kijih jing jin ahi. Jingkah seh hin pahcha thah leh milim thah chu ei hin se lhah peh jing ji e. A mu phahlou ka lhung tengle chun pahcha nal lou, damlou natna thoh puma a pahcha mu thei sun, deisah taha eina holpeh ji ahi ti kana geldoh phah lou chu lam lhanga chun ka pai jin, milim joh chu ka lhep tup jin. Hitichun schoolah Chichin in milim ei jihpeh chu kihisah nan ka mang jin, rubber leh marble toh kilhepi ho, mithai leh nehthei dang dang toh kilhepi ho, theipi leh haithei ho toh kilhepi nan ka mang jin. Ei jihpeh nu chunga vang khatvei jong kipathu ka sei kha poi!

Ka school u kum 10 lhin champha ahi in, schoola inkote toh phat mang khom ding ka hi uve. Ka nu le pa kiman lou jeh chun kapi in ei pui in, ol tahin ka che lhon e. Chichin te in kom ka lhun lhon chun angai ngai in pahcha thah lih leh, milima kichun chu ei hin se lhah peh kit in, kapi chutoh ei hin nui khum lhon e. Ka gah la in, milim chu vet pai ding ka ti in. Kapi in ka thil choi chu gang tahin ka khut akon chun aphet lha pai in, Chichin mu lai lai chun lam lhanga chun a paimang tai. Ei kai pum chun, “Khatveicha a thilpeh la kit ta hih in. Nai jong kinaipi ta hih in. I kho uva mi jousen AIDS vei ahi ati u na het phah lou ham? Hijeha chu a school kai ding jong a phallou u ahi tai. A natna na kai ding ahi, na kichat lou ham?” ei ti jah jah tan. Kapi aw agin gin chutoh, Chichin jong chun a jah tei ding ahi ti ka he e.

Kapi koma chun, “AIDS chu ipi ham? Kichat um tahbeh ham?” tiin ka dong in. Kapi chun, “Na ngol ngol toh, AIDS kiti chu leiseta natna tijat umpen, a veiho chu kisudam thei talou, a damdoi jong kisiemdoh nai lou ahi. Na kai pou pou leh ka kom uva jong na um theilou ding, na thi pai pai ding ahi,” tiin ei house jah jah tai. Kei chun ima kana he kit pon, chutia ei suhkichat jeh chun ka tija lheh tai. Ka kai khah ding chu ka tija tan, pahcha ka lahna ka khut jong chu kapi puona chun ka theh pai in. Lungthim tija leh kicha det det pum pum chun school chu ka lhung lhon tan. Hetlouna jeh chun kapi thusei jouse chu kana tahsan tan ahi.

Ajing chun ka golnute inn jon jotpa di chu ka da lheh tan, lampi dang chula aum kit poi. Lungthim nuom lou tah chun ka che kit in, a inn jon u chu gang taha lhai pel ding ka ti tai. Angai bang bangin ka golnu chun a kotcha uva kon chun eina galdot jing in. Lhaimang di ka ti lai tah chun pahcha boh leh milim chu ahin seplha kit tai. Hijongleh, ka pi’n ei thuhil jeh chun ni dang ka bang ta pon. Himo sa sa leh natna khohse pen thoh puma ka dinga a bolthei sun, deisahna sangpen thilpeh chu ka gal vet tho in, chuche pahcha leh milim chu thil thet um leh kidah um, a tongkha jouse val lhum jeng din ka gel in. Ga lah chu sei lou, ka moh kichat jeng tai. Nai jong nai nom louvin, kihetmosah tah chun ka dalha pai tan. Ka chemang kon chun ka gah kinunghei in, Chichin chun eina ve ve in, a sangkhol a tuh dan chun a mitlhi a kitheh ahi ti chu ka hethem ngal e. A lungthim nat ding dan chu ngai jong ka ngai ngam pon ahi!

Niseh school kai in ka che jin, a kotcha uva chun ka golnu chu ahung dah doh ngai ta poi. Hijongleh a innlhang u lampi panga chun jingkah seh hin pahcha leh thingna kikanbeh, milima kichun chu ana um jing jin ahi. Ka mel mu ngam ta hih jongleh, ka golnu chun a deisahna thilpeh chun eina galdot jing e ti chu ka hen. Hijongleh, kapi thusei jeh chun lah mit in ka mu ngai ta pon, nilhah school hung kikhena ka jotpa teng jongleh pahcha chu vuai chet in ana um jing ji e. Chuti pum chun jingkah seh hin kei din pahcha thah leh milim chu ana um tei ji in, hijongleh a mel vang khatvei cha jong ka mu ngai ta poi. Chuti lai chun, a deisahna thilpeh ei peh chu, ka lah ham ka lah lou ham tiin kiphatlam tah leh kicha det det pumin bang ong leh kotcha kaha konin eina thim vet jing ji e ti chu kana he pha poi.
Hitichun lha thum lai chu jingkah seh deisahna thilpeh, ka lah nom lou seh hi louva, vet jong ka vet nom lou chu ana um jing jin, nilhah chanin vuai lha ta jongleh eina ngah jing jin ahi. Chichin vang chun khatvei cha a mel ei kimusah ngai ta poi.

Jingkah khat hi school kai din ka che in, pahcha thah leh milim chu ana kikoi ta poi. Ka lah nom ngai lou vang chun, jingkah seh kei dia ana kikoi jing jeh chun angai danin ka gel tan, chutia ana um tahlou jeng chu ka lungthim anom thei ta poi. Ajingin jong aguha ka kineppi pahcha chu ana um chuom ta poi. Ajeh jong ka he pon, pahcha ana umlouva pat chun ka school lampi chu nom talou thim tah hin ka hen, ipi ham kim lou khat um hin ka he e. Hichea pat chun pahcha chu khatvei jong ana um ngai ta pon, Chichin mel jong ka mu ngai ta poi. Ka lah nom lou jeha a koi nom tahlou hi din ka gelin, a lungthim ka suhnat jeha a dammona khohse cheh ahi ti vang chu themchan jong ka ngaito pha him him pon ahi.

Kal khat jou nung chun jingkah khat school kai din ka chen, Chichin te inn jon lampia chun gari khat hi ana kinga in. Ka gah lhun kon chun Chichin chu api in a inn uva konin ahin po suh in. Nuommo ka sah thim jeh chun gari panga kon chun pel ding ka go tan. Hichun api chun ei hin kou in, a tunu loiho ka hi leh hilou chu ei hin dong in. Ken jong ngan chetin, “Schoolah kana kiloi jiuve,” ka ti tai.

Tehsepi chun a tunu chau tah chu gari sunga chun agah dom lut in. Chichin khut gong cheta pahcha boh neo khat, milima kichun a sip chom deh chu a lahpeh in, ka komah ahung phei in, “Boinu hi kal masa a pat chun a hanat lheh in, nang ding pahcha lahpeh a, milim jihpeh di nom lheh jongle, ajou mong mong ta pon. Tujinga chu damdoiina pui ding ka ti ahi tan, hijongleh achaina ding beha na school kai dia na hung ana galdot a, a bolpeh thei nukhah pen pahcha leh milim hi peh tei ding adei in, kana nga nga jeng u na hi. Hijongleh ajo jepa ahung lhahsam cheh kit banah, aman apeh ngam lou jeha ken ka hung peh na he. A chunga na phatna ho leh, na kiloipi ji jeh chun a kipah lheh in, a lunghelna jong na ngaijangpeh jing jin, na chunga kipathu seipeh din ei hil hil jeng e. A lhahsam val tah jehin aman la asei thei ta pon, ka sei hi ama sei bangin ana gel mai tan,” ati in. Pahcha leh milim kinot deh chu ei pe tai.

Chuti lai jong chun kapi thusei chu ka lungthimah ahung kilang masa penin. Natna khohse, suhdam theilou, ti chu ka lungsunga chun ahung gin lah lah in. Chichin pi in pahcha ei peh jong chu lah lou jeng ding ka nom lheh e. Hijongleh, ka vela umho chun ei vet sou sou jeh leh, lah lou thei ahi tahlou jeh chun tija det det pum chun ka sang in, khut kithing det detin ka khut muh chun ka tu tho tai.

Gari-a a kipat doh kon u chun ka golnu lui Chichin chu ka ga ve ham ham in. Numei nunnem leh kipah thei tah, midangho kithopi dia iti laiya jong kiphal jing, nui sil sel jing chu mu tei ding ka gon, ka thilmu chun ka lungthim akhong na lheh jeng e! Gari-a chun mithi ha mihing ham ti het theilou khopa kichaisa tobang, vunin gu lhang atuom bang jenga gop lha, mitkhuh thuh lha jeng, sam kol chaisa, thisen neilou jeha dang lha jeng ta, leh tha nei tahlou jeha mit jong hah doh but talou chun ei hin ve kiu keu in. Khosih in amat bang jengin ka kithing det det in, ana ding sot jep leng ka lhuh tei ding, ka jum tei tei ding ahi. Gari kipatdoh nung chun deisahna lutaha ei peh, ka pahcha choi chu lampi pama chun ka pai gangchal in. Hi e, a golpa ti din vang kichat umtah kana hi e!

School kikhena Chichin te inn jon ka jotpa lai chun mi tamtah hi ana phu mel mul gam tai! Koima seipeh khoh ngai lou chun thil umdan, ka golnu Chichin chu hi leiset natna leh khoisatna, kana le lungjinna gam dalhan, angai tah anu le pa leh Pa kom jonin ana che masa tai ti chu ka hethiem pai tai. Hitichun, a kimkhatin inn chu a hetup uvin, gollhang kimkhatin touna ho ahin pu uve. Damdoiina konin a luong jong chu a hunglhung chet kit e. Ka golnu, ka koma ana tou ji, deisah taha ka dinga imacha it ngai lou Chichin luong ngei chu, plastic a kituom chahkheh in gari a kona ahin jon doh lai chu ka ga tohkha tan. Chuche thil ka mu chun ei khong nasa lheh jeng e. Ka lungthima chun thil khat bouseh ahung lut in, ka golnu chu kei tha ahi ti chu! Dan jou louvin ka mitlhi chu ahung luong lha jen jun tai.

Ama chu nu le pa jong neilou, api bouseh toh um, numei chapang vaicha leh genthei tah ahi in. Hiche bouseh chu hi louvin, leiseta natna vangset umpen khat vei lai ahi kit e. Loi le gol a ngai in, kithopi ding a ngaicha in, ngailu ding a ngaicha lheh e. A hinna chu AIDS natna seh hi louvin, lungdonna, vaichatna, lunghelna, kana leh gentheina tinchengin abop jing ana hi e. Chuti pum chun a dinmuna chun a lunglhai in, a phun ngai chuom poi. Panpi ding leh lungset ding ngaicha jing jeng chun ama tobang khata khat jong ana mu jou pon ahi. A thi ni chanin midangho deibol leh midangho dia kiphal jing pumin thina lhan thim chu ana galkai tan ahi. Damlou leh lhasam pum puma ei ngailutna leh deisahna pahcha leh milim ei peh jouse chu, ka lah lou seh hi louva, thet leh tija puma ka pai ji chu ka nung ngaito kit phat vang chun, ka golnu ka lainatpeh dan chu thi jeng ding ka nom e. Ka mitlhi luong pum chun school kai dia ka che langa Chichin in ei peh, pahcha leh milim, miho chotpha sa, lampama nen deha um chu ka chom in. Ka golnu te inn jona chun ka op toh sipbeh in, “Chichin, nei ngaidam tei tei in aw. Na gol ti din jong ka lhingjou poi; imajouse eina pe in, natna leh lungdonna tilou chu ima kana le peh ta poi. Lungset tahin khatvei bouseh hijongleh milim nei jihpeh kitin lang, pahcha khat beh nei pe kit aw, pai kit ta ponge,” tiin ka kap lha jeng tai. Kipah taha nui sil sela ei hin ve ve ji nu vang chu aum ta pon ahi…!!

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: