LUNGTHIM NATNA DAMSAH JESU LIM

(Nungah khat testimony)

Ka dongmapa toh hin kum thum tobang ka hung kingai lhon in, ka lungset lheh in, ka kipana pen jong ahi jin ahi. Ka tahsan lheh in, ei dalhah ding ka gingcha ngai poi. A din vang ka nei jouse jong ka phal in, a kipana ding ahi photleh hichu ka deilhen pen ahi jeng e. Hijongleh, ka ginchat phah lou behin eina joulhep in, ka het ding kicha khen pumin, ei khen ngam tah tah louvin midang toh ana kihou jing jin ahi. Kidah um tahin ka ginchat phah lou helin ana khosa in, ka hetdoh phat vang chun ei joulhep na ho chu simjou ana hi ta poi.
12063462_770793073032365_8137919478273975839_n

Ka lungthim hi a pohkeh in, lunggel kicheh jong ka nei thei ta poi. Hitobang loma na hin koiman ei siem kha pon, ka lungset lheh jeng in, a din imajouse ka phal jin ahi. Ama tah, ‘nang bou na hi’ tia ei kitep khum jingpa chun eina joulhep ahi ti ka het doh ni chun ka thin ka lai ana in, ka dip ka kidop in, ka mitlhi hi theh hul jou louvin ana luong in ahi.

Hitichun, a lou thei louvin ka kikhen lhon tan, hijongleh kana lungset jing in, ngaidam hin thum henlang, kisih tahin hung kile kit leh, ka ngaidam a ka san kit ding ana hi e. Hijongleh hung kile tah sangin ka doumah mah din a khosa jom jo tan, na ka sah dan dan chu ka dou jou pon ahi. A dongmanu chutoh ka dinga na thei pen din a um lhon in. Ka genthei dan chu dam ding kisan ka lhangai jou ta pon, ka lungdon dan chu imachan ka lungthim na chu a thoidam jou ding ka tahsan thei ta poi.

A guhin khamna thei ka bol in, a phachuom deh pon, a khohcheh cheh jon ahi. Ka inkote leh ka loiho detmah khopin ka umchan a kikhel in, mihon vang mimo leh hatmo ei sah uve ti jong chu ka he e. Hijongleh ka lungthim natna suhdam ding dan lampi ka mu jou pon. Pasal dang toh ka hou ji vang chun imacha a phachuom tah tah jou pon ahi.

Chutia keima changa ka thoh ham ham lai chun jan khat chu ka imut thei lou jehin Facebook ka kichem mai mai in. Hia chun kidang tah maiin ka lungthim natna thoidam thei chu ka mu tan ahi. Ka friend khat in Jesu lim a like hi a hung kilang in, ka mu apat chun ka lungthim natna jouse chu tahsan umlou khopin a dam pai in, kei leh kei jeng jong chu ka kidetmah in ahi.

Jesu mel achun ngailutna, khotona, kitahna, damna, kipana, thanopna, ngaidamna, lungsetna, lhamuonna ho chu kichen tahin ka mu in. Ka mu mu chun ka lungthim natna, chutobanga bing hen hun khatveia a dam pai jeng chu ka le tahsan lel in, hijongleh a dam chula ahi kit e. Ka dam bouseh chu ahi pon, chutobang lom loma lhamuong chun ka dongmapa toh ka kipa lai pen in jong ka um ngai pon ahi.

Dan jou louvin ka mitlhi a luong in, hijongleh tuchung vang kipa val jeha mitlhi ahi jo tai. Google ah Jesu lim ka hol pai in, ka tam mu chanin ka damna chu a sang cheh cheh in, a kidang lheh e. Masangin Pathen lam jong ka hol ngai pon, kikhop jong ka lhasam in, ka kikhop sunin jong Pathen nei nomna tah tah ka nei ngai pon ahi.

Hijongleh Jesu limlah khat bousehin jong, second chomkhat sung bousehin, ei kikhel soh sah tan ahi. Tuni chan hin Jesu lim hi ka phone ah ka koi jing in, ka print doh in, ka lekhabu kikah ho ah ka jep jing jin ahi. Ka lunghel ni teng ka ve jin, ka kipah jin ahi. Ka kichat tijat teng Jesu limlah ka ve pai jin, ka lungmuong jin ahi. Ka dongma luipa toh ka kimuto phat jongleh Jesu mel chun ka natna akonin ei huidoh ji tan ahi.

Tun vang ka inkote, ka sopiho leh ka loiho, ka dongma luipa jengin jong a detmah thei khopin ka kipa thei tan, Jesu limlah khat bouseh jalin ka hinkho pumpi hi huhhing in a um tan ahi.

Na nat a, na lungthim pohkeh a, na lungdong lungkham ji em? Na dongmanu/dongmapa in na dalhah jeha na lungthim na em? Khatvei beh Jesu limlah hi lunglut tahin ana ve patep in. A mel a damna, lhamuonna, khotona, lungsetna leh ngailutna na mu teng dam doh tei in na te ti ka tahsan e.

Kei vang a limlah bousehin jong kipana ei peh thei a ahileh A tahmel ka mu phatleh iti ka kipa ta dem! Hijeh chun ama toh kimuto a, ‘Jesu ka ngailu e’ ti thei din ka hinkho hi thenna hinkho in ka mang jing tan ahi. Dongmapa ho vang mai mai in suboh kit ta pong e!

Theng chamkim jou pong ting, pha chamkim jou deh pong e, hijongleh ka gotna hi ama’n vang ka thenna leh ka phat chamkimna in ei sanpeh tei in te ti ka kinem e! Amen!!!

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: