KHO TUINEH VEKOLPA

1936774_785397534905252_9028439210561112007_n.jpg

Malai chun, Himalaya muolsang panga kho neocha nahlang gammang laha chun changkhatpu khat hi ana cheng in. Hiche tehsepu chu khomite tuineh vadung vetup leh sutheng dinga kho lamkai khat in ana thalah ahi.

Hitichun, gunchu leh gingai tahin hiche vacha dung chu a chon jin, thingna leh thingkang ho chu a paidoh jin, tui kiveina a tuipan leh nen umthei jouse jong chu tui thengsela a luon lhah theina din a vetup jing jin ahi.

Hiche kho chu kholjin ho kingahna leh chotlutna mun pen a hung hi tou tan. Vadung chun jet le vei a huon hoi tah tah ho chu tui ape in, chuleh vadung lhung kei chun gam vacha jat namkim mu ding aum in, kho apat gah galmu thei lhang jouse chu vetnom nom aum in ahi.

Kum ijat hamkhat a hung che tan, nilhah khat chu kho vaipo ho chun kumlhun kihouna nei din a tou khom tauve. Chutia kumlhun tohgon velvetna a nei lai u chun, mikhat hin koima hetkhah lou tuineh vekolpa sum kipe chu ahin mu doh tai. “Koi tehse hetkhah lou, kum hitih chan hi sum i peh jing jeng u ham? Gammang laha cheng ahi tilou koiman la a lim leh mel a mu ngai pon, a natoh thilbol la a kihedoh pon, sum leosah bep ahi. Tu apat in hai ta hen,” ahin ti in. Hitichun kilungtoh tahin tehsepu natoh chu a suhai tauve.

Lha ijat hamkhat sung chu ima kikhelna a um poi!

Chavang lai ahung kipat phat chun thingna ho jong ahung pul tan, thingbah neo pul ho chun vadunga tui luong lai ho chu a ting den tai. Sun khat chu koi hamkhat chun tui laha tuipan eng ho chu ahin mu doh tan. Ni chomkhat jou chun tui jong chu a theng tapon, tuinen mu ding a dim tan, tui jong chu a namse lheh tai. Lou jaova tuikai ho jong a kisuh thei tapon, phabep jong chu a kang doh tan ahi. Vacha ho jong a lengmang gam tauvin, chutobang chun kholjin ho jong ahung kithah tapouve. Khosunga chun dammo veiset jong a pung cheh cheh tan ahi. Hiche phat chun kho vaihom ho jong chu gang tahin a kihou tauve. A thil suhkhel u chu ahin geldoh tauvin, tehsepu chu a natoh tong jom kit din a kou tauvin ahi.

Ni chomkhat kah chun vadung tui jong ahung kikhel kit tan, theng sit set in a luong kit tai. Gam vacha hon hilai mun chu ahin jon kit tauvin, chutobang chun kholjin ho mel mu ding jong a um pan kit tan. Loujaova tui ho jong pha tahin a luong tan, hinna thah chu hiche kho chun a le mu kit tan ahi.

Na hinkho leh natoh ho chu neocha leh ima louva na gel jong hi mai thei in tin, mihem khat mai mai a na kigel jong hi maithei in te. Hijongleh mihem khat chu na hi in, nang tobang midang aum poi ti hen lang. Thil jouse na bol theilou jongleh thil khat beh chu na bol thei in; thil jouse na bol theilou jeh chun, na bol thei chu gunchu tah leh kitah tahin bol jing jeng in. Thil neocha a na gel hijongleh na thil bol chun nangma leh midang dinga kikhelna leh lolhinna a chan ahi ti geldoh jing tem in!!

 

 

 

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: