KHANGTHAH LAMVAI

Kum 25 a lhinin ji a nei in, a vanglaini mang pan pan dinga a kigel laiin mipa lhing set khat chu ahi jeng tai. Chapa changkhat ahi in, a nu le pate’n jong a lungset lheh uve. A khangthah til apatin a loi le gol ho bol bang bang, guhthima judon leh nungah kop le le ho chu a thanopna lam tah jong ana hi kit in. Mi mit mua miphamo ti thei jong ahi kit pon; amavang, a hinkho mandan chun lampi dih a doi thei ta pon ahi.

16265241_1068820693229600_6786671991465399923_n

Sum le pai lama a hahsat lou jeh u chun hinkhonom a mang nasa lheh in. Numei chuom chuom a kop in, phat khat kom leh ni le thum cheng thakhat in a kop jin, chomkhat jou a chim nungleh a dalha kit ji tai. Lungthim na tah taha a koi jong tam ta ngei in te. A hinkho mandan chu ama leh ama jong a kidei deh pon, phamo a kisah kom jong aum ji mong e. Hijongleh, a hina chu khel hahsa a sa lheh in, a hinkho mandan chu a kideimo lheh jeng e.

A dongmaho laha a lunglai kuoi pen chu toh phat chomkhat a kilungset lhon nungin a hung kicheng lhon tai. A jinu chu Pathen mi, mi pengthah pha tah leh umchan kitup tah ahi. A nu le pate jong chun a deipeh lheh uvin, hiti chun a kilungset lhon apata lha 6 jou chun a kicheng lhon tai. Chutia ji a nei tah phat chun ama jong a kipah thei lheh in, a jo chanin kisemphat ding a gel nasa lheh in, a hinkho jong chu nasa tahin a kikhel in. Ju le sa leh numei dang lah akonin nasa tahin a kidalse in, a jinu pangah a beh chah jing tan ahi.

A kichen lhon apat kum khat leh a keh jou chun chanu melhoi leh deium tah khat a hin nei lhon in, a kipah lheh jeng uve. A chanu mel a mu masat pen chung, nao neina room apata nurse hon a hin pomdoh lai chun kipa val jehin a bengah mitlhi a va chut chut jeng in. A hinkhoa a thil tuo jouse laha a kipana pen hi tei in te. A pu’n naosen min chu Ngainunnem a sah in. Nal a sah lou vang chun, Pathen akona hetsahna neia sah ahi ti a het jeh chun khel ding chu kilomin a he pon, chuche min chu a pu den tai. Hijongleh, ngailu tahin Boinu tiin bou a kou jin ahi.

Vangsetum tahin cha dang a nei thei lhon ta pon. Doctor a kivetsah jing lhon vang chun imacha a phachom deh ta poi. A jinu dammo jing chu toh a lungthim a boi lah lah jing e. Hijongleh, a insung khosah dan u vang chu lungkhamna ding aum sam pon, solkal natoh jachatpi um lou tah khat chu a tong in, a hahsa val pouve. A natohna jehin mun chomah a kichon uvin, hiti chun a jinu leh a chanu chu toh ochat leh deichat val nei louvin a khosa tou peh uvin. Boinu jong chu cha neisun a hina jal chun lungsetna a chang thei lheh in, insunga kipana pen jong ahi e. A office kikhen khen leh a jinu leh a chanu mel mu kal ngahlel tahin in lam jonin a kile pai ji in; amani sanga lhalel ding a nei pon, khat teni’n jong a ngai lhon lheh e ti chu a hai deh pon ahi.

Hiti hin a insung thusim u hi kichai thei hi ta ngai leh koi jouse din kipa um lheh in te. Amavang, a kipan pan pan ana hi kit e.

Kum leh lha a chal in, a gollhan lai hina chu ana pai mang deh lou ana hi e. Khatvei chu office-a a loiho toh nehkhom a bol uvin, a loihon a tep nasat val jeh chun phat sot tah ana dalhah sa, ju chu a hin don kit tai. Ana don jing sa ahi jeh chun a tuina jong a he pai tai. Chuche jana jukham puma a kile nunga a jinu leh Boinu tijat melput chu vet ngam san san ahi ta poi.

Penthahna tah tah a nei lou jeh chun nisehin ju chun a hen-oh cheh cheh in. A til chun ngol pai thei din a kigel in; hinlah, a khoh cheh cheh jo tai ti chu a hai deh poi. Chuleh, ju chun kilhadahna leh kitimlelna a pe in, a gollhan lai apata pha louva a het, numeia kichep jong chu a hin bol pan kit tan. A sum lahlut jouse jong chu ju man leh numei chungah a mang chai hel ji tan, a insung dinmun u jong a nisimin a khe suh suh tan ahi.

Niseh kham pumin a kile in, khatvei kom leh office apat in lam jon louvin jan sot tah tah gei nungah a kiloipi in. Mipalhing chun gollhang hinkho a mang jing jeng tai. Ju a don nasa cheh ceh in, a lunghang jing in, a kitom jing kit e. Thil neocha cha a lunghanpi jing tan. A limdoh teng le chun a pha dom ji in, kisih pumin kisemphat ding a nom ji lheh in; amavang, a phachom jou deh poi. Chuleh, a ju donpi leh numei kikoppi ho sangin a hin dan tongkha pen leh genthei thoh pen chu a jinu leh a chanu chu ahi.

Jan khat chu a boldan ngaiin pung 11 don chun kham pumin a kile in. Jingkah langa a jinu’n, “Tu nilhah vang hung kile mat ding hin ngaito tei tei o. Boinu kum 8 lhinna penchampha ahi in, an beh ne khom ute…” a ti chu ana haimil mang hel tai.

A kot u gah hon ding a got lai chun insung lamah ana kikam in, hi chun a jukham lungchang chu a choh thou kit tai. Poh leng lunga chum chum pumin a jinu chu a kou jah jah in. A jinu chun tija kithing det det pumin a hung hon e. “Boinu pa, na hung kile hi tam o. Hui hat vala kana kha hi chu o…” kamdam selin a hin ti in. Hijongleh chutia awnem taha a hin houpi chu lunghanna lang johin a la in. A jinu sangkhol om a chun a man in, kampao ngei lou tinchenga houset pumin a maia chun a beng poh lah lah tai.

Chutia husan a jah phat chun, Boinu imu jong chu a hung thou in, “Hepa, ipi ti ham?” tia tijat ka pumin a kikah lhona chun a hung kijep in. A jukham lunghan khomu lou chun a chanu chu a son lhu in, banga chun a ga kitat kha tai.

Ni dang phat danga a jukham lunghan kom jong leh thil le lo ho chungah a chu jin, a kisen jah jah in, khut lom vang a lha ngai poi. Chu tobanga a um bouseh jong chu kicha tahin a kithing det det ji lhon e. Insung mipa, insung vengbit ding pen chu ama kichatna joh in a jinu leh a chanu chu a um ji lhon e. Hiche jan vang chu ama jeng jong bol val a kisa lheh e. Hinlah, a lunghan kitim jou ta lou chun a jinu chu kot langa chun a no phei in, “Potdoh jeng in, ka mu nom ta poi. Hiche ina hin hung kile kit tahih in,” a ti in, kot a kam khum pai tai.

Polama chun a jinu ka gin chu a ging mang jep jep in, chomkhat jou chun jah phah in a um ta poi. Boinu chu a ga ve in, a lhuhna koma chun ana tou in, a luchang a kisip in, kicha tah leh kap pumin a hin ve ji ji e. Sen pumin, “Ki-imut doh teh chapang…” a ti lai chun kinuh nuh pumin a pindan lang chu a jon tai. Husan jong a dai lha tan, a imut lhuh lai jong chu a he pha pon, janmang ana nei e…

A janmanga chun, kol sang tah khata hin a kitol lha go in, a tija lheh jeng e. Hinlah a khut langto chu a jinu leh a chanu chun ana tuhpeh in, “Ha pan o… ha tahin pang o…” tiin ana til jah jah lhon e. Hijongleh, achaina chun a tuh jou mong mong lhon ta pon, kitol lha din aum tan, chutia tija taha aum lai chun a hung khang doh tai. Lupnaa jong imu louva sitting room touna sao chunga ana imu chu ahi. Banga pung kikhai chu a ve in, jingkah lam dah 4:05 ana lhing tan. A lim thet ta in, jan lama a thilbol phalou jouse chu a hedoh pai in. Gang tahin a thou doh in, Boinu rooma chun a ga lut in, ana um ta poi. A nu a jui hi din a gel in, polamah a pot doh in, kot jong kihong sa in ana um e.

Kho a hung vah lha go tan, go a ju nasa lheh e. Insungah a lhai lut kit in, vaipho leh torchlight a la in, a jinu leh a chanu hol din go nuoia chun a lhai doh pai tai. A til chun a ngat ngatna lang chu a pheng hol in, hijongleh hoi lang jona che lhon ham ti jong he louva chutia pheng hol jeng chu pha pen din a gel pon. Chomkhat chu hainem dom din a kichol in. Chutilai chun kidang tahin a lungthimah aw khat a hung ging in, “Houin langah che in,” a hin ti tai. Hitichun chena ding dang he chom ta lou chu, kino tahin houin lang chu a jon tai.

Houin a ga lhun chun a kiphatlam thim lheh e! Kum ni lang jen kikhom ta lou ahi chu a hung kigel doh in; hijongleh, a lungthima aw chun lut dingin a no kit e. Chuleh, a jinu leh a chanu chu houin sunga chu um tei din hetna a nei kei kit in, hiti chun ama jong a lut tai.

A ga lut pum chun a mit a hei le le in. Maicham phunga a jinu dilsu puma tao chu a mu in, a koma chun Boinu ana imu in, a luchang chu a kitom pom hen hun e. Ga del lut pai ding chu a nom lheh in; hinlah, kineosahna tahin a gel kit in. Ol cha chun a nai phei in, a husan a jah phat chun a jinu chu a hung kihei in, a mel chu a dang set jeng e. A tahsa ho chu vetkol tup lou ahi ti hetdoh thei jeng din a gong king keng in. A nungah laia nungah melhoi leh deium, sen am pih peh ji, chubang taha a kikhel tah jeng chu a thah behin a gah lungset lheh jeng e. A hin mu phat chun a ginchat lou leh a kineppi lou tah ahi ti chu a mel akon chun a kilang in, a kom lhon a phah phat chun, “Hilaia na na um lhon ham?” ti bep-in a gah hou e.

A jinu koma a chanu, luchang kitom puma imu chu a ve in, a mitsin jeh chun imu mai mai hi din a gel in. A kom lhona chun a ga tou lha in, Boinu pang chu a khoi in, a ti chu ana sa lheh in, a khosih sang lheh jeng e. Jana a sot lhuhna lama chu ginchat sanga kitat nasa lheh hi ding dan ahi. A pa imut lhah nunga go nuoia a nu a ga holdoh a, suhna ding he ta lou chun, houin mun chu ana jot jeng lhon dan ahi.

Chutia Boinu a ga toh khah phat chun, a chanu jong ol cha’n a hung hah doh in, “Hepa, nei ngaidam o,” a hin ti pai in. Ama’n jong nuhbing pumin, “Boinu, ngaidam na thumna ding ima a um poi, kei joh hi ngaidam ngai ka hi,” a tipeh in. Boinu chun mitlhi val tit tet pumin, “Hepa, ka nu toh hin ka ngai lhon lheh in, nanga din ka tao jing jeng lhon e. Hinlah, na… hepa…(a gah kinuh in) na lung ka toh jou mong mong lhon pon, nei ngaidam lhon tang, na?” a hin ti e.

A chanu leh a jinu chu a ga ve jin, sei ding a kivai mo hel jeng in, a lungthim vang chu ama le ama kideimona in a dim e. Ipi hamkhat gah sei ding a go in, a op a bing chah kheh in, hi chun Boinu ma ma chun, “Hepa, ka thi nung leh koiin ka nu hi a hin vetkol ding hi tam?” Chuche thudoh chun a khong lap jeng in, chutobang khop-a a chanu’n ana lhamonpi tah lou ahi dan a hetna chun a lungchang chu thih tula kisun bangin a sun na lheh e.

“Boinu, thi hihbehin na te, na dam pai ding ahi tai. Thi ding thu chu sei hih hel in,” tiin ka aw thim chun a donbut in. A jinu jong chu kitim jou louvin a hung kap jah jeng tan ahi.

Chutia lhisoh leh kap puma a um lai u chun, Boinu’n a khut a hin chel in,
“Hepa, thil khat nei tep o…”
“Henge, Boinu, ipi ham? Sei in.”

Boinu’n a nu khut chu a tuh kit in, a pa mit don tah ve pum in, “Ka nu hi midang toh kop ta hih in lang, ju jong don ta hih o. Chule… vangama na hung tei tei ding ahi ti nei tep o, lungset tahin!”

Chuche tepna, lungtheng tah leh thomhao tah a jah phat chun a lungthim a jun lha tan. A jinu chu a ga ve in, a mitlhi luong jin jen kaha ngailutna mit-ha chu a mu in, a jinu leh a chanu hi nama jong leh, jum leh ja a kop e. A dinga mitheng teni ahi jal chun!

A mit a sing in, a lungthim pumpi’n a taovin, a hinkho Pathen khutah a lhan doh tan ahi. Hichun, a chanu chu a ga ve in, “Boinu, ka kitep e!” a ti in. Boinu chu kipah tahin a hung nui sel in, “Hepa, inah che taute,” a hin ti in. “Heng e,” ti pumin Boinu chu a gah pom doh in, a jinu jong chu a koi e.

A lungthim chun louin lang jot pai chu pha din a gel in. Kho jong a vah lhah tai. Boinu chu a pa op-a beh pumin ol cha cha’n la khat a sa in, a neo laia a pa’n ana hil la chu ahi…
Insung maichama vahchoi la sa ute;
Insung maichama Pakai hou ute,
Insung maicham chunga vangam kigalmu thei;
A loupi dan seiin insung maicham chungah.
… ti lai a sah jou jou chun a joi lha in, a chatlha pai tan ahi.

A phatlou jehin a chanu nei sun Ngainunnem chun hi leiseta genthei thoh kit ta lou din Pa komah ana che masa tan ahi. Mi hon vang dem in tin, seise lheh uvin te; amavang, chuche Houin maicham phunga insung kima pui khom Pathen chun, a keng bula a puikhom kit diu ahi ti chu a tahsan leh kinepna umsun chu ahi tan ahi.

“Pathen hin kipana mangin olcha chan ei hil jiuvin,
Hahsatna mangin jah kham bep din ei houpi jiuvin,
Natna ho mangin vang, ging tahin thu ei seipeh jiuve.”
-CS Lewis

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: