HOTEL A THILSOH GIMNEI CHU!

Khopi khat a hin Hotel thupi tah khat hi aum in, Hotel neipa chu Christian ahi. Sum le pai lama hahsatna a nei lou jeh chun houbung sunga thilpeh leh thilto lama jong chun mi het khat ahi. Amavang, a lungthim lo pen leh a tha le jung sen tamna pen chu a Hotel chu ahi jing tan ahi.
11235044_717839094994430_3463595938204331334_n
Khatvei chu kholjin danglam tah khat hi anei in, hiche a maljinpa chun rock star ho bangin a sam chu a kihoi sao in, migong thim, a mel vet a jong miphalou tah mel pu ahi. A kivonna ho jong chu sop peh ding neilou bangin amel toh kibang chet in a chop deh e. Hotel sung a hunglut chu koima ana lem ding jong aum pon, phat sot thimtah houpi ding jong um louvin a ngah in, hotel kot bula chun a ding ding e. Chutia sot tah a din nung chun Hotel neipa chu ahung in, a thusimho, a lhun nom jeh ho chuleh a umsot leh umsot lou ding thu ho chu a dong tai.

Hiche pa chun jan ni a ge nom thu leh hotel chu gena ding bouseh a a man kigot thu ho chu kamdam tah leh kilhang tahin hotel neipa chu a seipeh tai. A mel leh a kisiem dan tobang chu ana hi pon, hotel neipa’n jong a ngamsum pai tan, a lungthim in, “hiche pa hi ka maljin ding mong mong ahi, a umdan leh a kineosah dan ho hi ka lungthim a khoi lheh e” ati tai. Hitichun, Hotel neipa chun a chapang ho komah, a maljin thah pa chu vetup ding leh single room ong khat a umsah ding leh a ngaichat jouse vet lhah peh din a hil tai.

Hitichun janlai ahung hi tan, maljin jouse jong chu a imu tauve. Amavang, jan dang bang lou tahin, jan sot nung hita jongleh, hotel neipa chun a chapang ho chu ground floor a common room achun a koukhom in, hotel a thil ngaichat leh lhasam ho chu a sei khompi in ahi. Chuti lai tah chun phulou helou in, hui leh go nasa tahin ahung kitho tai. Hotel room jousea kotcha leh kot ho chu ahin sem hong in, hui a hanun jeh chun maljin ho chu imu thei jong aum ta pouve. Hiche nia maljinpa vang chu koiman a umna lam jong a geldoh pha ta pouve.

Hotel room kotcha jouse chu huipi nasa tah chun a sem hong soh tan, go in a gena u room jouse a the kot phat chun maljin tam jo chu innuoi langa common room a chun a kum lha soh tauve. Van kithin gin jong chu kichat leh tijat um khop in a ging lah lah in. Hotel neipa chu a lungkham lheh in, ima bol thei la a nei kit poi! Hui leh go jong chu ban ding sangin a khohse cheh cheh in, gimnei tahin hotel sunga kot leh kotcha kikhah tup jouse jong chu hui nasa tah chun a sem hong soh tan ahi. Maljin tam jo chun chutobang a thil to u chu kidang a sah uvin, a kicha gam tauve. Kimkhat chun hotel-a chu thilha um hi tei din a gingmo uvin, kimkhat kit chun a lungthim uvin, ‘Hiche hotel-a kana lhun khah khel khel tah chu aw!’ tiin a kisih lheh jeng uve. Hotel neipa chun bol thei imacha a nei lou chu a kihet kit in, kicha tahin kithing det det leh dap sah pum chun a maljin leh a naote ho chutoh hiche huipi leh gopi gimnei leh tijat um tah chu a thoh khovah tauvin ahi.

A jingkah in jing anneh phat don ahi tan, maljin phabep chun janlhah langa hui leh go kitho gimnei dan chu lungdong tahin a sei khom mel mul uvin, hotel neipa chu receiption counter a chun chol tahin a kitung thip chah kheh e. Hiche lai tah chun janni sun a maljinpa chu counter lang jonin ahung kihot suh lap lap e. Hotel neipa chun ana ve jing in, janlhaha a thil to u chu a ngaito kit in. A lungthim in, ‘hiche pa hi janlhah thil so lai chun ka mudoh hih beh e…’ tiin a gel in. A kom ahin phah phat chun, hotel neipa’n, “Na imut chim toh na e? Janlhah thilsoh chu na hetlou ngap ngap ham?” ati in. Maljinpa chun, “Ipi thil lhung ham? Ka imu nom selin, imacha ka hepha him him poi” tiin ahin donbut in. Hotel neipa chun kidang a sah lheh in, “Chubanga huipi le gopi kitho gimnei laha chu iti kho helouva na imut thei mong mong ham?” tiin lungdong thim tah leh detmah pumin a dong kit tai.

Hichun a maljinpa’n jong hotel neipa koma chun, a lunggel a khel thu ho, jankhat ni geh dinga kisei hijongleh jan khat bou a ge angai thu leh hotel dalhah ding a nop thu chu a seipeh in, jankhat ge man jat chu peh ding a go tai. Ahinvang, hotel neipa chun a geman chu a lah nom ta pon, “Jankhat bouseh na geh in, neh leh don lah ima na ne doh kit pon” ati peh tai. Hijongleh, a lungthim tah vang chun hung lhun kit da ta leh a dei ahi. Hitichun, maljinpa chun manbei a a lhunsah jeha kipathu a sei jou chun hotel chu a dalha tai.

Chomkhat jou chun, janlhah a hui leh go nasa tahin hotel a suhset ho ve lha din hotel neipa chu inchung langah a kaltou in. Room khat, maljinpa lhunna room agah lut chun, gimnei taha room jouse kot leh kotcha ho hui in a sem hong a, lupna ho leh room sung jouse gotui in kot deha a the lai chun, hiche room vang chu imacha ana ti kit pon ahi. Hitichun, room sunga thil umho chu a ve le le in ahileh, table chunga lekhapeh a thu kijih khat hi a mudoh tai. Aman jong lekha chu a la in, hitia kijih hi a simdoh tai…

“Ka chapa,
Janni in na hotel ah nei lhunsah in, na maljin dang jouse chu room pha pen pen na peh laiyin, kei vang chu room ningchong pen, room laha nommo leh se pen chu nei phal peh e. Na hotel sung ngei ah ka hin jon lut in, jan in huipi leh gopi in na lhun khum in, ka umna lam jong na hepha pon, ka kithopina jong thum ding na gel pha poi!

Na sumkolveina bouseh na ngaito in, na hotel room ningchong pen ka chan bangin, na hinkhoa jong a ningchong pen bou ka chang pha e! Ka umna mun, Houin a hung sangin na hotel a phat suhmang nuom na sah jo in. Ka mite toh kihoulim sangin na maljin ho kam lhum thei pena lem leh houpi ding bou na gel in, na lungthim sungah mun ka chang lhom val tan ahi.
Na Pathen.”

Hiche lekha jih a sim doh phat chun hotel neipa chu a dilsu pai in, lungthim kisih tah pum chun a kap jah tan, “Pakai, polam hoithona din na na kana tong ji in, ka lungthim pumpin vang kana ngailu pon ahi. Nei ngaidam in, tu apat vang ka hinkhoa maljin mai hi ta louvin, ka hinkho pumpi leh ka nei jouse hi nanga din phal tang e. Nei ngaidam in!” tiin a taovin, hinkho thah nei teina din lungthim thah a keng tan ahi.

Hiche thusim tobang hin, eiho jong polam hoithona ding bouvin Pathen ina hou jiuvin,i hinkho a Leng le Lal ding chu i lungthim ningkoi khatah ina sel doh ji tauve. Amavang, Pathen Lekhabu Theng in, “Na lung pumpi’n, na lungthim pumpi’n, na thaneina pumpi’n, na Pakai na Pathen chu houvin” ati. Amen!

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: