CHEMTATPA LEH KAIKUONG

16507930_1076229792488690_1787760798014600476_nChemtatpa thusim hi i het cheh diu ginchat a um in, hin vel sei da mai tang ka tin; hijongleh, hiche thusima hin thu kiselguh gil tah tah aum in, chu ho chu themkhat ana sut khom ute

Chemtatpa min tah hi Chemtatpa ahi poi! A thusim akon hin ama hi mipa lhingset, a ji le chate kingaina leh kihinsona, mi pontho tah hi tei din ginchat aum e. A pen til chun a pi le pute’n min ngei tah khat jong ana sah uvin, hinlah, vangphatum tah ti ding hamin chuche min chu koiman a hepha ta poi. A thusim hung kipat dan hi, “Masanglai chun mipa khat hin vadungah chem a tat tat in.., chutia a chem tat akona hiche thusim hi hung kipan ahi jeha a min jong Chemtatpa thusim kiti ahi tai,” tina hi tei in te.
A thusima a ‘heropa’ min put dan hi a loupi lheh jeng e! Ama min put sa khel jou thei khop setin a natoh leh a thil bolah a kipe jouvin, mi pontho leh gutchu ahi dan jong a chem hem dan akonin hetdoh thei ahi. A chemtat thep leh a natoh kicheh sela jou jou mi ahi jeha ama min tah khela Chemtatpa tia hung kihe tou ahi tah ding jong ginchatlel aum poi.

Chemtatpa hin a chem hi a tat hem nama e! A kihinsona ding leh a ji leh chate lolvahna dinga a natoh masa pen chu a kihet kiu keu in, hi chu a chem hem seta koi chu ahi. Kaikuongin a hin che phat chun a lap masat pen chu a chem ahi in, a chem hem jeh chun gova jih jeng jong bailam tahin a ban tan theiin ahi.

Leiseta hin tonggim, gutchu leh kihambol taha thil bol jing ho hi Pathenin lolhinna jong a chan tei ji mong in, phattheina hi van akona hung khe ding koiman a ngah ngai poi. Ipilam hi jongle, mi lolhing leh mi loupi ho chungchang hi i khol khol teng lolhinna dinga thil hahsa tam tah hin toh lou aum beh pon, Chemtatpa tobanga mi pontho jeng bou ana hi ji e. Mi lolhing hina din miin ‘kal khat’ a ti chu ‘kal ni’ beh ti tei ana ngai ji e.

Gam le nam lamkai ho, houbung leh kho lamkai ho, insung leh mimal jenga jong hin bol tah taha bola Chemtatpa min pu jou ding aum lou teng lolhinna loupi tah mu ding aum jou ji poi. Tulaia gah sei din, Tripura CM Manik Sarkar ho, Gujarat CM ana hi laia Narendra Modi ho, Bihar CM Nitish Kumar ho khu a gam leh nam adia Chemtatpa ngan ahi uvin, kitah leh tomngai taha a gam leh nam natong ahi uve.

I chenna u gamsung, democracy gama hin Kuki politician leh lamkai luboh i nei hou hin Kuki chate makho, khantou leh machal theina dinga a chem u a kitat hem jou lou khat u ham? Tohma a chal mo lheh jeng e! Election campaign laiin policy pha tah tah leh hoi tah tah, gam le nam ngailutna kamcheng ngei leh kineppi thei tah tah ei seipeh ji uvin. Hijongleh, election a hung kichai a, a ngaichat pen u Vote a mu nung u leh, koima a hepha ji ta pouve. Kitahna a bei in, ngailutna a lem mangthah ji tan; a toha toh sangin a neha neh doh ding joh a khosah jo ji tauve.

Hou lamkaiho chem jong hi tat hem ngai tah khat hi tei in te. Christianity-in gam leh nam jouse a kikhelsah a, a khantou tou jing laia ipi ati leh ei society sunga hi ling leh khao lah bang jing jeng hi tan tem o?.Chem mol sa manga a kelngoite, lhagaova gilkel leh dangchah, neh khop ding an ne pha lou leh oiva louva vah ding ei got jing jeh u hi tei in te. Gammang laha lou vat ding chun chem hem tah a ngaicha ji mong e. Jah jing sa a vel vela kisei hi ngai chim um thei in; amavang, chutilai chun Pathen Thu hi hinna thu leh thu hing ahi kit e. Nitin hinkhoa jui leh hinpi thei dinga a sei je leh kihil dan thah thah ngaito ngai ahi.

Simlai leh natong hon jong i lou ma cheh gunchu leh pontho taha Chemtatpa chem sanga hem joa eima chem cheh kitat hem a ngai e. Loi le gol nung del jinga um hi jachatna len tah ahi in, mi mit veta hoi jol sel sul sanga sunggila mi kholchil thei hi got ding ahi.

KAIKUONG PHILOSOPHY

Hiche thusima ‘a kaikuong’ pen chu Kaikuong hi ahi. Tuni chana thil dihlou ipi hamkhat mosona ding a kihol ji teng ‘a kaikuong’ tiin kampao jong a kimang ji e. Hichun thil dihlou hung kipatna leh a sumo pen chu tina ahi. Kaikuong chun a thil che ding leh che lou ding, a pha leh pha lou a het lou jeh jong hi nan te, hijongleh a thil bolkhel chunga mo a poh ngama, gotna jong a chan ngam hi kihilna thei mong ahi.

A thusim hi kaikuong phat lou jeha mihem leh ganhing, sa laha a lenpen Saipi apata ganhing laha a neopen Chenai (sihmi) chana buoina nasa tah hung soh ahi. A sukhel masa chu a hin hol tauvin, a chaina chun Kaikuong ahi kichen tahin a hin hedoh tauve. Hichea hin kaikuong kitah leh hansan dan a kilang in, a thil suhkhelah themmona a chang ngam e. Kamthem manin kilepna ding hol nom hi leh Chemtatpa hi ngoh son kit in tin, ama leh ama them kichan tei in te. A kam a kehin, hinlah themthu sei louvin ama leh ama themmo a kichan e. Kaikuong tobanga mi kitah, mi thudih leh mi hangsan i nam sung uva hin i ngaicha lheh uve. Kaikuong leh a seijuiho dam sot hen!

I society sunga hin gam le nam dinga thilphalou leh suhkhel tam tah a lhung ta in, lhung jong hung lhung jing nalai ding ahi. A kaikuong hilou hon ‘jong thohna dinga ngao thoh’ a lo jing uve. Lamkai luboh themmo jeha a nungjuiho thina ijat lhung tan tem? Haosa leh thunei vaihom ho thusei lasah khel jeha milhamin genthei a tona ijat um tan tem?

Christian ina hi masang peh uva pata i pi leh pute’n hitobang Chemtatpa, mi Pontho leh mi Kicheh tah thusim akona Kitahna leh Hansanna chungchang thua kihilna leh chutobang hin dan chu ana chepi peh u ahi tai ti jong hetdoh thei ahi. Tulai Christiante laha vang kichen taha i thil suhkhel khat jong chu kithemchan bouseh jong hi louvin midangho a kingoh son go tei kit jin, kaikuong banga kitahna nei i tam pouve. A themmo chun a thepmo ga jong a lo ngam ding dol ahi!

Mitin hin eima chem ken cheh kitat hem a ngai mong in, a kaikuonga i pan khah tah jong leh midang mopuh ding hol jing louva kitah leh hangsan taha themmo chan ngam ding ahi. Chemtatpa banga pontho leh kihambol cheh a, kaikuong banga kitah leh hangsan cheh din, a sim jouse deisahna ka hin lhan e!!

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: