ACRES OF DIAMONDS

(A gam a leia songmantam…)

Inspirational, motivational, personal development, etc. kiti lekhabu ho hi kana sim sou sou in, ka simho laha ka lungthim khoi pen leh kihilna thei taha ka gel khat chu Russell Conwell lecture abu-a kisiem, ‘Acres of Diamonds’ kiti hi ahi. Anuoiya hi internet a chomlam (abridged version) joh chu ahi.

1978875_708062439305429_6212516747349914858_n

Malai chun Africa gamah Ali Hafed kiti loubolmi khat hi ana um in, a hinkho chu kipana’n adim in, a lunglhai lheh jeng e. A chan chunga a lunglhai thei jeha chu kipana jong anei thei ana hi e. Nikhat chu miching khat hi a komah ahung in, songmantam manlut je leh songmantam neiho thil bolthei dan chu ahung seipeh tai. Michingpa chun, “Songmantam na khutpi te hijongleh na nei a ahileh nangma khopi na nei thei ding ahin, songmantam na khuttum te na nei leh vang nangma gam(country) jong na nei thei ding ahi tai,” tia a seipeh jou chun a chemang kit tai.

Hiche jan chun loubolpa chu a imu lha thei tapoi. Suongmantam anei lou jeh chun vaicha tah danin a kigel in. A kipah thei tapon chuleh a lunglhai thei tapoi. Anei chunga a lunglhai jou tahlou jeh chun a kipah tapon, a kipa thei tahlou jeh chun a lunglhai thei tapon, hitichun hiche jan chu vaicha leh genthei kisah tah pum chun a imu tan ahi.

A jingkah in a lunggel jatchuom beh chutoh ahung kithou in, a huon nei chu a kijoh in, a inkote chu midang komah a dalha in, songmantam hol din a kipatdoh tan ahi. Africa gam dung leh vai a chon soh in, hijongleh songmantam chu amu jou tapon. Hitichun Europe gamah ache kit in, gamdung gamvai aga hol in, hinlah amu jou deh kit pon, a chaina chun Spain alhung in, a kinepna jouse, a thanei jouse leh a sum le pai jouse amang chai tan, a lungdong leh lunggenthei val tah jeh chun Barcelona vadungah a kichom lutin, a thi tai.

A inn langa kit chun, nikhat hi huon kichohpa chun a gancha ho tui donsah din huon lailung taha vacha neocha achun apui in. Jingkah nisa hung suoh chun va gal lama song khat chu ahin sal in ahileh, nisagui banga thil vah lih leh khat chu amu tai. Chuche song val lih leh chu hoi asah jehin inah a hin kichoi in. Nilhah lam chun michingpa chu a hung kit in, insunga song val lih leh kikoi chu amu phat in, “Ali hung kile hi tam?” tiin adong in. Huon kichohpa chun ahung kile lou thu chu a seipeh in. Michingpa chun, “Ahileh hilaiya songmantam kikoi khu hoiya kuon ham? Songmantam chu ka mu leh ka hetthei jeng ahi,” ati tai. Huon kichohpa vang chun songmantam ahilou thu leh a huon lailunga luong vadung pama adang tamtah aum thu chu a seipeh in. Hitichun michingpa leh huon kichohpa chun vakoma songmantam tamtah um chu aga mudoh lhon tan, hiche mun akon chun England lengte lallukhuh jepnaa kimang Kohinoor leh Russia-te lallukhuh jepnaa kimang Orloff jong ahung kiladoh tan ahi.

*I lungthim adih teng, thil jouse lah thiem dan jong a kihe in, haosatna kiti hi sum le pai bouseh ahi pon, damtheina ho, kipa theina lungthim ho, loi le gol pha i nei ho, midang toh cham dela lhat khom thei ho, mi hahsa leh genthei ho i kithopi nuomna lungthim ho leh chutobang dinmuna i din theina ho, neh le don leh sil le chen ding kingaito thei a i umna ho jong hi haosatna jat chuom cheh chu ahi.

*Mi huona anche chu hing chuomin a kimu ji e. Midang ho hinkho chu nop chuom danin a kigel jin, chutobang chun midang in jong ei hinkho chu nuom chuom din ana gel jin; hinkho ei kilhe pi nom tamtah jong ana um ji e.

*Letna ho, lalna ho, lolhinna ho, leh hoasatna kiti ho hi i kimvelah a dimset e. Tua na tohna/simna muna chu na lolhin jou louva ahileh hoilai muna jong lolhing jou deh pon na tin, tua na mopohna chu na suhbulhit jou louva ahileh asanga phajo leh lenjo iti na poh jou mong ding ham? Na umna muna chun kipanin lang, na kho le na veng, na loi le pai, leh na sopi adin mipha, tahsan leh kineppi thei hi masan chutileh na nam adia jong mi mantam leh manchah thei na hi tei ding ahi. Na natohna chu itobangin neo in tin len hita jongleh, gutchu tah leh kitah tahin tong le chun lolhinna’n aban banin na’n jui tei in te.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: