VAHBOI LEH A TEHPI

Thinglhang kho khat a hin Vahboi kiti, mou thah melhoi tah leh mipha tah khat hi ana um in, ajipa leh atehpi toh in khata hin acheng khom uve. A tehpi chu toh akitoh lhon tapon, a deidan leh a lunggel lhon jong chu achuom cheh ahi jin ahi. Vahboi chun phat sottah achen khom thei diu jong chu a gingcha tapon. Genthei a kisah thu leh a lungkhamnaho ajipa komah lhut ji jongleh, aphachom deh pon, athoh ham ham jin ahi.

Vahboi chun genthei kisah lheh jongleh bolthei dang aneilou jeh chun, athoh joulou nikho leh dalhah jeng di ti chu a kigellhahna umsun leh lampi umsun chu ahi tai. Mouthah ding chun tehpi phunse, seisetna ding jengbou hol leh lunglhai joulou chu genthei jong um mong in tin, ajinei masang ho chu ngai ji lheh nan te.

Khatvei hi Vahboi chun a tehpi phunset val leh han nom jing chu haisah ding dan a ngaituo tan… A nungah laiya apa guolpa, a khouva mipa ching tah leh tahsan thei taha kisei Palet koma chun aga che in, a thusim jouse ahil in, a tehpi chu gu(poison) ham thina thei lou(damdoi) khat peh a thisah ding dan ngaituo in panpina aga thum jeng tai. Palet chun Vahboi umdan leh a dinmun chu mipa ching ti tahin aman them pai tan, “Vahboi, na hahsatna hi sulhap peh ding ka nuom lheh in, ka suhlhap thei ding jong ka gingcha e. Hijongleh, ka thusei na ngaija, na jui ngaiyin te…” tiin Palet chun aseipeh tai.

Vahboi chun thanom tahin, “Pu Palet, na sei jouse ka pom ding, jui jong ka jui tei ding ahi.” tiin a donbut in. Palet chu pindana chun alut in, chomkhat jou chun ahung pot pai kit tan, “Vahboi, na tehpi hi gu i donsah ham i peh ham ahileh thi pai jeng ding ahin, hijeh chun miin athi nunga jong i tha lhon ahi ti ahetdoh louna din damdoi hi na pe ing tin, niseha a anneh ding na siempeh ding, a an laha chu hiche damdoi hi na lhah ji di ahi. Olcha chan a hinna kemsuh in tin, a chaina leh a thipi ding ahi tai. Hijongleh, kino thei ahipoi ti hi hen lang, lha nga sung niseh na nu hi pha taha na vetkol jing ding, a thusei jouse na niel lou ding, aki akoiya na jop soh kei ding ahi. Chuteng lha nga jou leh ipi hunglhung em ti na het di ahi tai.” tiin Palet chun damdoi chu ape tan ahi.

Ajing jingkah apatin Vahboi chun a natoh thah chu thanom tah leh ginngai tahin atong pan tai. A tehpi in a seiset jongleh nui heu pumin kamdam sel leh awnem tahin adonbut jin. A tehpi chu ahan jao jao jongleh imachan agelpeh nuom tapon, khoto tahin a vekol ji tan ahi.

Phat leh niho chu ahung chal chal in, chutia a mounu kipah tah leh mai lhaisel a niseh agah mu jing chu a tehpi jong a kipah lheh jin ahi. ‘Tun vang ka mounu hin ei ngailut tah tah hi tangei in tin, anu bang banga ei mu hi tan te; ken jong ka ngailut ding, ka chanu, ka sunga pieng bang banga ka lungset di ahi tai’ tiin a tehpi chun a lunggel akhel tan ahi. ‘Vahboi banga moupha leh ching hi leisetah um tapon te. Ama tobanga ei ngailu leh ei lungset ding leiset a numei lahah hin pieng tapon te.’ tiin a loiho leh a inheng louhengho komah asei le le tan ahi.

Vahboi jipa chun, ajinu leh a tehpi kikaha thil umdan kikhel danglam jeng leh kipana lhagao lhun dan chu a detmah lheh in, a lungthim sunggil a chun a kipah lheh jeng e. Vahboi jong chun kidang asah lheh in, a detmah hel tan ahi. A chanu dihtah bang banga a ngailut ahi ti ahetdoh phat chun, nikhat chu Palet koma chun a gache kit in, “Pu Palet, ka nu(tehpi) lou i peh chu tha kit dan um in tem? Ka tehpi hin a chanu, asunga pieng bang bangin ei gelin, ei ngailu tai. Ka nu hi athi ding ka phal tapoi. Lungsetin ka nu thina dia lou i nehsa chu athana ding lou joh nei pe kit tan.” tiin mitlhi luong pum leh kisih pumin aga tao tai.

Palet chun nuiheu chan, “Vahboi, ima lungkhamna ding leh kichatna ding aum poi. Lou ka peh chu, thina ding hilouvin na nu damthei johna leh a damsot johna dia vitamin ka peh joh na he. Na lunggel leh na nu chunga na lungput dan joh chu ahi gu(poison) chu. Hijongleh, tun vang na gu nei jong siltheng soh ahi tan, tua pat vang nu-cha nuomsa pen leh kipah theipen na hi lhon di ahi tai. Midangho chunga lungthim phalou leh gitlouna lungthim i put louva ahileh midanghon jong ei chungah lungthim phalou leh thil se agel ji pouve. Migilou pen jong a chunga phatna na vetsah nah nah a ahileh na chungah gilou ngai ponte… Na nu thina ding gu chu na ngailutna in a soptheng soh tai. Kipah tahin kile jeng tan.” tiin a donbut in. Hitichun, Vahboi chu kipah tahin a inlang u jon chun kihot lap lap in a kile tan ahi…

“Miin iti na bol leh na dei em, hitobang chun midang chungah bol in.”

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: