PASAL HO TILKHOUNA

12373371_782225931889079_2585974843137286667_n

Insung jemhoi leh sunuom chu numei ho hi ahi uvin, numei umlouna insung chu a nuom tah tah thei poi. Amavang numei ho hinkho kipa sah leh genthei sah thei chu pasal ho hi a kihi jehin, i kamcheng khat bouseh in jong a hinkho a gentheisah thei in, lungthim na taha koi thei jong a kihi kit e. Kipah taha um ding na dei leh kipa sah dan na thep angai lheh e. Lungthim genthei taha i koi jeha lunglhai lou mel a put teng jongleh lhase thei i hi pon, lunghang thei chuom jong i hi poi. A lunglhai louna chu thoidam peh ding joh i hi uve. A damthei a, a kipa thei phot leh a mel u mu jong a nuom in, a hinkhoman u a nuom chuom in, a kom uva um jong a nuom e ti i he soh kei uve.

Pasal hon i thoh jou lou ding lungthim natna tam tah a thoh thei jeh uvin hahsatna jouse thoh jou jing din gel dan. Na lung lhai thiem phot leh nangma jong na kipa ding, na lungset chana a sang jo cheha nan lungset tei ding ahi. Na seiset lai chana na chenpi numei chun nan le seiset ding ahi. A lhinlelna na hol jing leh na lhinlelna ding a hin mudoh cheh cheh ding ahi. A lhinlelna na kihetmosah ji teng nang lhinlelna jong kihetmosah ding ahi. Kamdam aw nema na houpi leh a kampao ngaihah sah ngai pon na te, seiset theia na umlou phot leh. A dam leh damlou ho na khohsaha na doh jing leh nan le khohsah jo cheh ding ahi. Numei ho hi a vekol leh a chenpi ho mihina toh kilhon in a kihei toh thei uvin, hijeh chun na mihina a set leh phat juia na umdan banga a hung uma a umchan chu na deilou leh dem jeng dan lang, nangma joh chu kisiem pha masan.

A natoh thilbol na vetda leh seise pai hih in. Seiset sangin seiphat hin a hatsah vah in, kisempha gang jon te. Ahinvang, a hilouna leh dihlou taha thil a bol teng pahchat dan. A hilounaa kijon pachat ahi ti hen tin, na jachat sah joh ding ahi. Kilom taha thil a bol teng pahchat tei tei ding go in. Na chai vah lheh e; na sutheng lheh e; na siemtui lheh e; hiche chu na kilom lheh e; na hoi chuom e; na nui leh na rasi a kikap lah lah e; na kamdam aw nem tah hi ka ngainom ji lheh e; na tong val tai lel lheh tan na te, kichol tan… ga ti le chun na kamcheng khat bouseh jong chun hatna, thohhatna, thanopna sang tah a peh ding, a masa sanga nasa jo cheha pan a lah got ding ahi. Na mit veta thol din na deidan banga thil bol jing gotna nei tan te. A lungthima um sei doh nom a nei ho ngailhah peh hin kipana nasa tah a pe jiuve, a sei jouse jop in pom cheh cheh hih jong lehen.

Na khosah dan phalou leh a thet tah, nangma tundoh insung sukeh thei ding khopa a deilou lam thilbol na nei leh a vaigei masanga hai san loi ding ngaito in. Nangma jeng bon na kithemchan thei louna thil chu le bol kit dan. Na kipana ding chu numei dang dang laha bou a um poi. Na jinu akonin na mu thei soh kei e! Hiche kipana muna ding chun mundang leh midang kineppia jot ding leh hol ding gel hih in. Semthu kipana chamkim lou ding chu lhangai da tan.

Na jinu koma um hahsa na sah ham? A koma um hahsa dinga na na koi masat joh hilou ham? Nang le nang kidong tem in, a donbutna chu hethei tan na te. Numei deium tah koma na um a, a deiumna kilang doh theilou dia na koi joh ham?… tiho hi ei le ei kikholchil cheh din deisahna ka hin lhan uve!

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: