PASAL CHAPANG LEH APPLE PHUNG

Malai chun apple phung lien tah khat hi ana um in, hiche apple phung chu pasal chapang khat hin ana dei lheh in, niseh in a vel ho achun a kichem jin ahi. A phung achun a kaldoh jin aga ho chu a ne jin, sun nisat teng a nuoiya lim achun a kichol jin, a imu den jin ahi.
Chuche thingphung chu angai lheh jeng in, thingphung jong chun angai lheh e. Phat ahung chal chal in, pasal chapang jong chu a hung khang len tan, thingphung koma chun niseh in a kichem ngai ta pon ahi.

11083590_810262849050539_4021092252231715108_n

Nikhat chu lhase tahin chapangpa chu thingphung koma chun a hung in…
“Ka koma hin hung kichem o!” tiin thingphung chun a hin kou e.
“Chapang neo ka hi tapoi, thingphung velah ka kichem ji tapoi” tiin chapangpa chun a donbut in, “Toys ka deije, achohna ding sum ka ngaicha e” tiin a sei tai.
Hiche apple phung chun, “A khoh lheh jeng e, a chohna ding sum peh jeng ding la ka nei pon, hijongleh, ka gaho hi kilo in lang, joh in lang, chuteng toys chohna ding sum chu na nei thei ding ahi” tiin a seipeh tai.
Pasal chapangpa chu a thanom lheh in, apple ga jouse chu a dei jat jat chu a kilo in, thanom tahin a dalha tan ahi. Hiche apat chun a hung kile ngai tapon, thingphung chu a lunghel in, angai lheh jeng e.

Nikhat kit chu chapangpa, tua pilhing ta chu, a hung kile kit in, thingphung jong chu a kipah lheh jeng e.
“Ka koma hin hung kichem o” tiin a hin kou kit tan.
“Kichepna phat ka nei ta poi. Ka ji leh ka chate din natoh ka ngai e. Khosahna leh kicholna din inn ka ngaicha in, nei kithopi thei ding ham?” tiin a tao kit tai.
Apple phung chun, “A khoh lheh jeng e, in leh lou peh ding ka nei jou poi, hijongleh, ka bahho hi kisat in lang, in sah nan mang jeng in” tiin a seipeh kit e.
Hitichun, a bah jouse chu a kisat chai hel in, kipah tahin a kile kit tai. Chuche pa kipa mel a mu chun thingphung chu a kipah sah lheh jeng e. Hijongleh, chu apat chun a hung kile ngai ta pon, angai ngai bang chun apple phung chu a lunghel in, a lung lengvai lheh tan ahi.

Khal gamgot lai hin, mipa chu khatvei a hung kile kit in, thingphung chu ana kipah lheh jeng e.
“Ka vel a hin hung kichem o” tiin a tem kit in.
“Tun vang kana teh tan, dam taha kichol ding ka ngaichat ahi, kicholdo nan tuipia kholjin ding ka nom in, kuong innei nei peh thei ding ham?” tiin a thum kit tai.
“Ka tum ho hi kuong sahna dinga pha tah ahi, mang in lang, gamlha tah tuipia chu na khuoljin thei ding, na tha kido ding, na kipa ding ahi” tiin a seipeh e.

Hitichun, chuche pa chun apple thing chu a tan bong in, kuong-innei a siem in, tuipi achun a jin le le tan, phat sot tah sung chu a hung kile kit ta pon ahi.

Achai chaina chun, kum sot tah nungin a hung kile kit tan…
“A khoh lheh jeng e, tun vang imacha peh ding ka nei ta poi. Apple ga peh ding jong ka nei ta poi” tiin apple phung chu a kiphatlam lheh e.
“A khoh hih e, a nehna ding ha jong ka nei ta poi” tiin mipa chun a hin donbut e.
“Ka chunga na kalna din bah leh tum jong ka nei tapoi” ati kit in,
“Hitobang ding chun ka teh val tai” tiin hichepa chun adonbut kit e.
“Tun vang imacha peh ding leh peh thei ka nei tapon, ka neisun chu ka jung go leh thi kigo bou hi ahi tai” tiin lhisoh pum chun thingphung chun a seipeh tai.
“Tun vang imacha ngaichat dang jong ka nei ta pon, kicholdona ding bouseh ka dei ahi. Kum hijat nung hin ka tahsa ho hi a hung lhasam lheh tai” tiin mipa chun a donbut e.
“Apha e, thingjung teh leh go sa hi kingaia choldo nan a pha lheh e, ka koma hin hung touvin lang, kicholdo tan” tiin a seipeh tai.
Hitichun, hichepa chu a touvin, thingphung jong chu kipah tahin, kipana jala mitlhi luong pum chun a nui siu seu tan ahi.

Hiche thusim hi i bon uva ding ahi. Thingphung hi i NU leh PA ho tobang ahi. I neolai chun, i nu leh pate koma kichep chu nuom ina sah ji uvin. I hung khang lien jep uvin, i gamlhat jep jep uvin, i dalha ji tauvin; hahsatna i to kom ham, ngaichat i nei komle bou i jon un, a kom uvah i ga che ji uvin ahi. Itobang tahin um jongle hen, ei ngailu jingho ahi uvin, eiho din aum jing uvin, i kipana din imajouse thoh din a kiphal uvin, ei kithopi din a da ngai pouvin ahi.

Pasal chapang hi thingphung chunga hin a khanse e ina ti maithei ahi, hijongleh hiche hi i nu leh pate i boldan u chu ahi. I deidan leh kipana bou i ngaito uvin, eiho dinga a thohna u leh a thilbol jouse chu i na he ji ta pouvin. Achaina leh ana vaigei kha ji tan ahi.

Na nu leh pate ngailut tahin vekol in… annehna dokhanga a touna ong na mu tengle a manlut je na het bep ding ahi. Nu le pa i hung hi a, i hung pilhin masangin itobanga ei ngailut u ham ti hi kihethem pon tin, hijeh chun lungset tahin vekol phot leu hen phapen in te…!

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: