MICHINGPA LEH A BONGPI

Malai chun khol gamlha tah khata hin Chinese michingpa leh a seijui hi ana um in. Nikhat chu a kholjinna lhonah loubuh se thim tah hi galkhat akonin amu lhon in. Hiche buh chu aga vet lhon phat chun, se lheh jongleh mihem chenna ahi ti chu a mu doh lhon tai.

Chutobang mun gamlha leh thip, anche louhing leh thingphung keh kiti mu ding umlouna muna chun nupa khat leh a chate thum banah bongpi gop leh gong chet khat hi ana khosa uvin ahi.

A gilkel val lhon jeh chun michingpa leh a seijui chu hiche muna chun a choldo lhon in, in neite jong chun a bol thei kham kham uvin kipah tahin ana lem uve.

Hichun Chinese michingpa chun insung mipa koma chun thudoh a dong tai…
“Hilai mun hi mun hahsa, mun dang apat gamlha tah ahi in, iti na khosah thei u ham?”
“Hiche bong khu na mu em? Hiche khu ka kihinsona u ahi. Bongnoi ei pe uvin, hichu ka don ji uvin, themkhat chu cheese siem nan ka mang kit ji uvin. A val a um teng khopiah ka che uvin, bongnoi leh cheese chuleh thil dang nehding leh insung ngaichat dang chohnan ka joh ji uve. Hitia chu ka kihinso ham ham u ahi,” tiin a donbut e.

Michingpa leh a seijui chu chomkhat a choldo nung lhon chun, inneite komah kipathu a sei lhon in ache kit lhon tai.

Lam kon masapen aphah lhon phat chun michingpa chun a seijui komah…
“Kile kit in lang, bongpi chu ga kai in lang, i masang lhona kolpanga khun ga son lha in,” a ti tai.
A seijui chun a pu thupeh chu kidang a sah lheh in. “Pu, chutobang thil chu ka bol ngam poi! I chung lhona a phat u chutoh, na kipa lou ham? Bongpi chu a gou neisun u ahi. Kolpanga ka sot lhah leh iti kihinso diu hi tam? A bong u umlouva thi gam tei diu ahi tai,” tiin a pu thusei chu a nel tai.

Miching tehsepu chu a hainem in, “Chen lang, bongpi chu ga son lha in!” tiin thupeh chu a pe kit tai.

A toh dinga chun lunglhai hihbeh jongleh seijui chun a pu thusei chu a jui tei chula angai kit e.

Hitichun seijui jong loubuh lam jon chun a kile kit in. Bong chu koima hetlouvin a kai doh in, kolpanga chun a son lha in, bong jong chu a thi tai.

Kum sot tah nungin jong hiche seijui lungthima kithemmona a nei chu amang thei ta poi. Khal lai khat hi ama leh ama kithemmona nasa tah chu a thoh jou ta pon, a pu dalha in, kum tamtah masanga a choldona lhon loubuh lam jon chun a che tai. Iti khosah tauvin tem ti chu a het nom lheh in. Kithopi a ngaichat u jongleh kithopi jeng ding, ngaidam thuma amaho toh kicham ding chu a dei ahi.

Lam kon aga lhun phat chun a thil mu chu a ginchat lou beh ana hi tai. Loubuh neocha leh se dih deh umna muna chun in loupi leh hoi tah khat ana kisa in, thingphung tam tahin ana um kimvel tai. Tui jena ‘swimming pool’ leh car hoi tah tah ho jong ana um in. Thil jat chuom chuom thupi leh mantam tah tah ho ana dimset tan. A chate thum leh a nu leh pa ho chun a haosatna u chu ana mang khom tauve.

Seijui lungthim chu kiphatlamna in a dim in. Chuchete inko chu iti khosah u hi tan tem? Vaichat val jeha a chenna mun u chu a kijoh doh u hi tei in tin, hoilai khopi lampang khata khutdo a um hi tauvin te, ti ho chun a lungthim in a gel e.

Hiche in loupi tah lang jona a che lai chun lampia chun mikhat hi a kitopi in. Hiche a kitopi koma chun in lientah kisahna muna ana chengte inko chungchang chu a dong jeng tai.

“Amaho ma ma chu ahi,” tiin a kitopi pa chun a donbut in. Detmah leh tahsan hahsa sah pum chun seijui chu in kelkot sunga chun aga lut in. Kum tamtah cheta a inneipa mel chu a gah mu pai tai. A mel chu ana kikhel beh pon, hijongleh masanga sangin a damthei mel in, ama kitahsanna in a dim jo e ti chu a mu thei e. A jinu leh chate jong a kipah thei lheh uvin, a mel u chu lunglhai nan adim e.

Detmah thim tah chun mipa lam chu a nai phei in. “Ipi thil lhung hi tam? Kum tamtah cheta chun ka pu toh hilai muna hin ka hung kicholdo lhon in. Mun hahsa leh genthei tah chu ana hi in. Imacha umlouna mun chu ipi tia na dinmun u hi hibang loma hi hung kikhel jeng hitam?” tiin a dong tai.

In neipa’n seijui chu a ve in, nui heo cha’n, “Kihinsona ding bongpi khat kana nei uvin. Ama chu ka gou neisun u, kivahna leh kingaina pena kana nei u ahi. Hijongleh, kolpangah ana kitang lha kha tan. Kivahna ding nei talou chu, gilkel a ka thilouna diu, kihinsona ding thil dang ka ngaito u angai tan. Hetna leh thepna ka neiho u, kana hetdoh vah lou ho u chu ka manchah u ahung ngai tan. Hitichun, ka inchen u siemphatna din malam jona kalson angai phat chun hindan thah thah ka podoh uvin, lolhinna leh machalna chun ei hin jui u ahi tai,” tiin a donbut e.

Kihilna: Thil ipiham, neocha ham thupi tah ham kingaina tah i nei ji uvin. Hiche i kingaina ham i tahsan det ham chu i machalna ding lampi doudal in ana pang thei e. Na hinkho sugenthei, na machalna lampi doudala pang ‘bongpi’ (mihem, ngaidan det, lungput leh thil chepi jing khat, etc.) chin leh vop na nei em?

Kol ah son lha ngam in!!

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: