MANGPHA MAI TAN AW!

Mangpha hin ti angai tah jeng vang hi, janmang din jong mangpha vang hi sam pon te. Ijat vei na nuisah jongleng, na kipana la ka hi jou tapon; henge, achai chaina leh a kichaina chu a lhung ji mong e.

Kamdam sela kimangphat kit tahlou dia ka hin mangphat ding na hi te. Imut nop deisah jal jong hilouva mangpha hin ti jeng ding hi a hahsa lheh jeng e. Hijongleh, itobangin kinai jongle hen i kigamlhat val lhon hi tan te.

Achaina dinga kithahpat kit ding dei jing hijongleng, a kilem ta poi. Nang umlouva um jing jeng chu, nang umlouva um ding lam kana ngaito ngai pon; hahsa lheh tan te.

Ka chunga kiphatlam puma na kipa lhon jan leh, kikhen ding da pum puma na kivop lhon jan chun, kikhen nungin na chunga kiphatlam tah pum pumin kana kap e. Nangni chu na kingai lhonin, kei vang chu nang ngai mai mai kana hi tai.

Ka mu nom tahlou vangin khoilaiya mi vahle ho laha chun guhthim in kana hol le le’n; na komah ka um nom tapoi kana tiin, ka koma umho chu nang hileh chun ka ti ji lheh e. Na aw ka jah nom tapoi ana ti ta jongleng, ka phone gin ho chun na aw jah ding ei kinepsah kit ji e.

Thil tamtah peh doh ding ka phal jing in, nangma tah vang midang koma ka lhan ding kana gel pha poi. Itih phat hamkhat leh midang na jot ding he nama jongleng, itih phatleh itih chu a hunglhun ding kana ngaito phah lou seh ahi pon, tuhi hi in te ti dehset chu kana ginchat phah lou ahe.

I thusim lhon jih dinga a lhanggol che ding dan i sutkhom jan chun, a chaina chu Pathen khutah i ngam lhon in; ahinlah, keima changin kana chel kha te.

Lha chu leiset din a kitah jingin; ve teh! a hung vah pan kit te. Nang vang chun planet lien leh hip hatjo ho lah ah nei hatmo sah tan ahe.

Det taha pom dinga eina tem nangma tahin midang na pom tan, ka koma na nuimel mu kit talou din na koma konin ka kikhin kang te. Masang chun na kipana din thil ka bol jin, tun vang na kipana din thil ka bol lou ahung ngai tai.

Keima jehin na kimuto lhon in; keima jehin vang kikhen hihbeh lhon o. I thusim lhon hi thusim toh a kilou val e. A bung thaha vang a kimvalaiya tan kit talou din jih jom tang ka te.

Ih na, kilhanna panglou lungsetna nei lhan apat chun, deilhen ding dang umlouva ka deilhen angai tan. Ka hatlou pum pumin ka nop ka dan ka hinkho hi mitlhi toh go thet in nei mansah te. Na ngaimah neocha jong anat khop set laiyin, lungthim na taha ka ngai angai kit te.

Setna toh ka min na jih tha tah jehin minsetna toh laitol ka leng in. Ei khoto ngailou hon khoto tahin ei hin ve tauvin; musitna mit bou ka mu ji tan ahe.

Na ngainat ka hi lai chun nang ngaina a ka nat ding ka ngaito ngai pon; nang tobang bang ho ka mu ji teng kan geldoh jing jin, nang ka mu ji teng nang tobang bang ho chu ka haimil mang ji tan; na hethem pha poi.

Lunghel jehin ka khosah dan a hel jou tan. Nei mangmil dan hi ka mang hisah ding ka ti jin; hichu la atah, alhem dinga ka dei ma ma ahi ji te.

Nang toh jalen taha i jalai len ho ka ngai lheh e. Tun la ka ngainat jeh mai maia ngainat ngam jong na hi ta pon, ka ngainatna jeh chun ka nat lo bep ji te.

Hiti hin ka ngaito ji e, leiseta hin pieng kit lhon hi tin, kimuto kit hi tin, hinlah kikhen tapo hi te, tiin. Tu tah hin na lunglhaina chu ka lunglhaimona pen ahe ti he pha nan na tem aw?

Ka lunghel kinepna na hilai chun, ka lung helsah ding bep hung hin na te ti kana gel thiem pon. Nang ngaichat louna chu ka ngaichat pen ahung hi ding ana he masa taleng aw!

Ka lungthim hi a kisatkah jin, tui lah hi chonin ka ding in; nang dalhah hahsa ding ha, na lungthim kot hon joh chu? tiin ka ngaito ji e. Thullhuhna siem thei louva ka um sotval jeh jong hin tin, tun nei dalha doh te. Nei dalhah ding thou thou leh nei hin nai hih in, kana ti tei tei lou jeh chu ham?

Na message ahi leh, ‘ka chol e’ ti bouseh jong kana kithadopi lheh ji laiyin, na message laha ‘nei hin call o’ na ti ji chu ngei ka sah pen ahi lam kana hethiem poi. Tun vang nei houpi leh ka le ngai kit in, nei houpi lou jongleh ngailou thei la na hi kit pon… Ih na, ka gel jing jeng lai ho hin, na gel kit ta pong e, tiin kana kigel kit ji e.

Na nat jeha ka ka lai chun nui le chun ka ti lheh jin; tu hin na nui jeha ka ka teng kap le chun ka ti kit lheh e. Lungsetna jeh vang hi sam pon te na?

Na che tah phat in, ka kiheina lam lamah kiheikhum ka chang in; ka vetna lam jouseah vetda ka chang in; ka dei ho kideisah nan ka um in, ka nai jousen ei dalse te. Ka ngaichat pen chu koima ngaicha louva um hi ahi tai.

Pathen hi vetda thei louvin, kicha lheh jongleng, a vetda ka chan hitam ka ti ji e. Lunghelna ho hi jan lhavah emsel nuoi ho, mun thip leh gamlha tah ho, pahcha hoi tah umna ho, vacha ham jat jat kijahna mun hoa um ham kana ti jin, na um louna mun jousea ana um joh ahi e.

AIDS natna in aphah ho natna neocha cha jong a dou joulou bang hin, kei jong nang ngainan ei phah tah jeh ham, lunghelna neocha cha ho jong ka dou jou tapoi.

Mi vangse hi dinga mi vangpha kana hi lai ho, kana toh dinga ka nui lai ho chun, kile kitna ding umlou lam sao jot ka hi lam jong kana kihet pon. Lungdonna ding bep kana lunggimpi lai chun, ka kapi ding hi kana nuipi chu ahi tan. Ei dalha thou thou ding chu kana jon go tei ji in, ahilou ding hisah tei kana gel jing ji e.

Go ka thoh jeha ka natding na tijat dan ho; ka khut ka kiat khah jingkaha nei khoto dan ho; lam tou khata ka kal tou laia ka thachol ding na tijat dan ho; nei mutsan masah jana ka lunghel ding na tijat dan dan ho chun, nangma jeha genthei thoh ka hilou vang chun, nei khohsah in nei ngaito lheh e. Tun lah nangma jehin ka na cheh cheh in, na thip mangjel kit te.

Ih na, na kipa kom leh ka haimil bangin gelin lang; amavang, ka haimil hisah hihbeh tang aw!

Umlou dinga i umna u leiseta hin,
Kihaimil din i kihe uvin,
Kikhen kit din i kimuto ji uve.
Kivetda din i kingai uvin,
Kidalha kit din i kilungset ji uvin;
Kihe ngai lou bangin i um ji ta uve!
Nun lui adin nun thah i siem uvin,
Lam lui adin lam thah i sat ji uvin;
I kana dia ina nui ji u ahi bouve!

Huilhi noiya van lam vea na kingaito lai chun na lungthima ka kilah ding ka gingcha in; chollha vah nuoiya kipa la saa nunlui ho gela na lunghel lai chun, hoilai hamkhata ka pan ding ka gingcha e. Na nunlui ngaiya selung hela na mao lai ni’n jong, a ning khat beha ka pan ding ka gingcha e. Lekhabu keova na themjil jan ho; hetlou na nei kom leh dohding na ngaichat ni hon jong, guhthim cha a nei hin geldoh ding ka gingcha e.
Natna leh lungkhamna jeha panpi ding leh loi na ngaichat ni in jong, kiphatlam taha nei geldoh gingcha’n; chutobanga nei ngai dia ka ginchat bang hin nangin jong kei ginchat banga nei ginchat ka gingcha e.

Ih na…
Ka kipana na hin, nei lhaset sah jing jin,
Ei nuisah na hin, nei sukap jing kit e.
Houpi nom ka sah pen in, ka houda pen jong na hi e.
Ka imut sunom na hin, nei imutmo sah jing kit e.
Ka mu nom pen na hin, na koma konin ka kisel kit ji e.
Na koma um chu nom ka sah pen in, na koma konin ka che mang tei go kit ji e.
Ka jaumna na hi laiyin, nei jachat sah jing kit ji e.
Na chungchangthu sei nom ka sah pen in, ka im tam pen jong ahi kit e.
Dam jing ding nei lhangai sah in, thi ding chan nei ngaito sah in,
A tobang bep ka hi jing laiyin, ka danglam lheh jeng te.

Na lungthim kana lo in, nei nodoh tan. Nang le kei thusima hin kei le nang hi pang khom kit tapon tin; ‘mangpha’ neina ti tah jeh chu hin te, ‘mangpha’ nei ti khah tahlou hi. Nang jong, mangpha mai tan aw!

12650996_803586453086360_5028253080384719216_n

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: