LUNGSETNA, KINEPNA, LEH TAHSANNA

Ipi pen bol ding ham ti jong chu a hethei tapon, bol ding jong a go ta poi. A bolthei jouse jong bolin a kigel tai. Thip behin polama kihuilha pumin achang sehin a tou in, a hinkhoa thil lhung jat chuom chuom ho chu a gah ngaito in, phat khat komleh kitim jou louvin ahung nui doh ji e. Hijongleh ngaitona thuh tah nei ahi chu a mel achun a kilang thei e.

12342506_777453309033008_6912961101878967090_n

A lungset tah, a kichenpi thei tahlou dinga a het leh a kikhenpi hita chun a lungthim chu a lo dim soh tan. A phat chesa lhon ho bou chun a kipa sah jing ahi ti chu a hechen pen hi tei in te. Ama din vang makho ding gel chu hahsa lheh in tin, thanop umlou tah hi tei in te.

A gah ngaito jin, a deipen jong a hethei ta poi. Hung kile kit ding hi taleh masanga ana kikhenpi tobang bang chu ana hi jing nalai dem? Ahilouleh hin sang thei kit nan tem, ti ho chu a di’n thudoh hahsa tah a chang jou tan, kinepna kiti him him a nei thei tapon ahi.

A mel mu kit ding a nop tahlou vang chun a lhalel lheh kit in, a limlah jeng jong a vetnom lou lai chun kimaitoa vet chim ding a nom lheh e. A koma sei ding imacha nei talou hi jongleh houpi ding a nom lheh kit in, a um louva kipah taha a um ding a ginchat lai chun kipah taha um mong hi nam ti chu photchen a nom lheh e.

Ama jengin jong ipi pen chu a dei ham ti a hekhen thei ta pon. Lungset jing banga a kihet lai chun a kikhenna lhon jeh ho chu a ngaito in, a lungsetna chang thei din a kigel lha jou kit poi. A di’n vang um ding dan a hahsa lheh jeng e.

A lekhasimna lam a ngaito in, sim ding a hao dan leh gutchu a ngai dan ho, kihambol a ngai dan leh kilhakang man ahi lou dan a hechen lheh in. Ama changa um ahi vang chun bing hen hun bangin a um e.

A inkote kithopi man louva a um jong phamo a sah laiya a lunggim jeha kipa mel a put thei lou chun masang sangin a inkote chu lungkhamin a koi gam tan, a hinkho chu genthei a kisah cheh kit tai. Ki-imut mang chu ama dinga phapen ahi laiyin, a imut so lou seh ahi pon, imut ngaichatna him him a nei thei kit poi. Taona thilboltheina ana hetchen chun a hinkho chu ichan hamkhatin vang lungolna a pe e.

Pathen thilsiem loupi dan ho, mihem chihna a san chana chihna pepa loupi dan ho; a thilgon hetthiem a hahsat dan a hetna ho, ama sanga chan se jo leh genthei hahsa tamtah um ahi ti a hetna ho chun, dampi ding nei jing ahi dan ho chu a geldoh sah kit e. Hiche ngaitona chun lungthim thah ahin pe in, a het jing sa thu chu a lungsung ah ahung ging in, Pathenin a dinga phalou di’n vai hom pon te ti chu ahin geldoh tai. Ama tah ngeiin a lungset chunga thilphalou lhun ding a phal louva ahileh Pathen vangin a phal louhel ding ahin, vel tam tahin mihemte hi ei ngailu uve ti chu a tahsan dol ana hi e.

A hinkho bing hen hun chu ahung kihoh in. Kinepna thah chutoh ama het kham kham chun kipathu seina leh a ngaitona ho Pathen koma lhut in a tao in; lungthim kipah, hetnom tam tah nei jing pum chun jalkhun lang chu a jon tai…

Hichu lungsetna… kinepna… leh tahsanna chu ahi. Thildang jouse lhaso ta jongle chun, na tahsanna vang lhaso hih hel in!!!

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: