JESU TOH KILOI JI AHI!

Kum tam a che nai pon, Oklahoma khopi pam langa kho neocha khata hin pasal chapang Andy kiti hi ana um in. Insung vaicha tah akona hung seilen hi jongleh a inkote ha pan jalin pawl li jen a sim tan, niseh keng in a school lampia chun a kihot lap lap jin ahi.

Lamlien(national highway) a pel tei angai in, chapang din gari lhai ham vut vut lah chu tijat um tah ahi. Lamlien a galkai jou teng chuleh lamchom(short-cut) a chun a che in, houin a jotpa in, chuteng a school chu aga lhung bep jin ahi.

Hiche houin a phah teng chuleh Andy chu a che pai ngai pon, niseh houina chun a lut in a tao tei tei jin ahi. Hiche houin Pastorpa chun pha tahin Andy umchan chu ana ve lha jing in, chapang lungthim theng tah hinkho man dan chu kidang a sah lheh e.

Pastor chun, “Chibai Andy, na dam dam hi nam?” tiin ana hou jin.

“Ka dam na e Pastor Thompson, nangla na dam hi nam?” tiin kipah leh mailhai selin Andy chun a donbut jin ahi.

Andy lampi ho a ngaito teng Pastor chun a khohsah lheh in. Nikhat chu, “School apat na hung kile teng na changin lamlien hi galkai ji ta hih in. Houin na hin phah phat leh nei hin hil jin lang, ka galkaipi ji ding na hi. Chutileh dam selin in na lhung nai tia ka lung mong ding ahi,” tiin a seipeh e.

“Ka kipah e Pastor Thompson…” tiin chapang chun a donbut e.

“School kikhen teng ipi jeha houina hi na hung kibanpa tei ji ham? Ipi jeha in na jot pai ji lou ham?” tiin pastor chun a dong kit in.

Andy chun, “Ka golpha Jesu hi kihoulimpi ka nop ji jeh ahi” tiin a donbut e.

Hitichun, pastor in jong maicham koma chun chapang chu tao din a dalha tai.

Khatvei hi Andy chun ipi mong mong a sei ham tiin maicham nunga chun ana ngailhi in…
“Ih na, tuni ka exam chu ka bol hoimo val e, ahinvang midanga ka copy poi. Ka tou khompi pa vang chun a copy nasa lheh e… Chuleh, tukum chu ka pa hi a loubolna lamah a lolhing beh pon, nehding jong ka hao beh pouve. Hijongleh changlhah ka ne jin, tui ka don ji tai. Hitiho jal chun ka kipah e! Mengnou lungset um tah khat ka mu in, a gilkel toh lheh jeh chun ka changlhah themkhat chu ka pe in, kidang tahin ka gil jong a kel beh ta poi.

“Chuleh na, hiche tailou hi kengkoh dang ka nei ta pon, hapta kit apat vang keng keova school ka kai ngai tan te… Gah ve mong mong teh, kao doh gam ta hi! Hijongleh school ka lhun thei phot leh khoh ka sa poi.

“Mi hon tukum hi lousoh phalou ding ahi ati uvin, ka kaikhompi phabep jong school kai thei talouvin lou lama a inkote ho a kithopi u angai tan, lungset tahin school a kai kit theina diuvin panpi tei tei tang, aw Jesu!

“Chuleh na, ka pa in ei voh kit in tin, a nat dan chu… hijongleh a nat chu dam pai tan te… pa ka nei jehin ka kipah thou thouve, ei vohna hi na vet nom em? Na suhdam thei chu na… hilai tah hi ahe, hilai jong… Ve teh! thi nalai hija hi aw. Nangin jong na het sohkei hilou ham na? Lungsetin ka pa chunga vang lunghang hih tang aw, a natoh thachol leh a lunggim toh, school ka kai angai kit jeh ho ahi bouve. Nangin vang nei lungset jing jeng e ti ka he thouve. Ka hina bang banga nei kivoppi nom jehin ka kipah e, ka golpha pen na hi mong mong e!

“Hey, na birthday lhunna ding hapta khat bep a um tai! Na tha nom val talou ham ong? Lhung loi loi leh ka ti val e. Ih na, thilpeh ding khat ka nei a… ahinvang ka sei doh nom nai poi. Na dei tah ahi ding jong ka kinem e. Oh, ka che phat ahi kit tai. Bye!”

Hiti chun niseh in houina lutpa ding chu a haimil ngai poi. Pastor Thompson jong chun Andy thusim chu a sermon ho ah a sei jing in. Chubang taha tahsanna leh kingaina dih tah nei a, genthei leh hahsat laiya jong kipah thei chu a he kha pon ahi.
Christmas masang ni chun Pastor Thompson chu ahung dammo tan, louin ah a polut tauve. Houin chu pro-pastor khuta aum angai tan ahi. Pro-pastor chu nel um lou tah, nui beh lou leh chapang ngaina beh lou khat hi ana hi e. Christmas ni chun a pindana jan lama sermon ding a kigot lai chun Andy chu khohelou tahin houina chun ahung lut in. Lungnavah thim tah hin houin kota ahung lut lut chun, “Hi, Jesu!” tiin ahin sam pai tai.

“Koi na him, hichea hi chapang in ipi na hung bol ham?” tiin pro-pastor chun ana housal tai.

Andy jong chu a kin lap in, “Pastor Thompson hoiya um ham? Lamlien ei galkaipi jing ji ahi… chuleh Jesu jong ka houpi nom in, A birthday thilpeh ding jong ka hin choi ahi e.”

A sangkhol nuoiya a thilchun a lah doh got lai chun pro-pastor chun, “Nei suboi hih in, ka sermon ding ka kigot lai ahi. Chuleh na hung kit phat leh, houin ja je he dom in,” tiin a sangkhol nunga chun a manin a sot doh tho tan ahi.

Hiche chapang ding chun a changa lamlien galkai tilou bolthei dang aum ta poi. A galkai lai tah chun, bus khat hat tahin a hung lhai in. Andy chun Jesu dinga a thilpeh kichun chu a sangkhol nuoiya a thun phat lai ahi kit in, lamlien vet ding lam ana he pha ta poi. Lamkoi lai tah ana hi khah khel khel kit chu toh, phat chu a chom lheh jeng e. A muna chun peng doh man louvin a thi pai tan ahi.

Mipi chun chuche chapang lungset um tah hinna nei talou chu a um kimvel uvin. Phulou helouvin pasal sang thim tah, sangkhol leh toka bang set kichen, a mel chu khotona dim leh nunnem tah, lungset melpu tah khat hi a mita mitlhi luong jin jen pumin a hung in. Lamlien lai taha chapang kijam den chu a pom doh in, a kap jah jeng tan ahi.

A koma ding mikhat chun, “Pu, nei hethem in lang, chapangpa insungmi hi na hi ham? Na het khah mi ham?” tiin a dong in.

Von kanga kivon pa, lhaset leh ngui tah melpu chun, “Ka golpha pen ana hi e…” ima dang a sei jom thei ta poi. Thilpeh newspaper lui a kitup taha chapang in ana chun chu a ladoh in, a op toh a sip beh in, chapangpa chu a dom kang in a chemang pai tai. Mipi chun kidang a sah lheh jeng uve.

Kumthah masang nia Pastor Thompson hung pot doh phat chun chuche thu a jah jah chun Andy nu leh pate chu a ga vil pai in, miin thuthanga a sei gimnei, von bang seta kivon pa chungchang jong chu a dong tan ahi.

“Na chapa u thi chu iti na het lhon ham?”
“Von kanga kivon pasal khatin ahung thah ahi,” kap jah pumin Andy nu chun ahin ti in.
“Thu sei a nei em?”

Andy pa chun, “Ima beh a sei poi. A lhisoh soh jeng e. Koi ahi ka he pouvin, ahinvang ka chapa thi chu a it lheh jeng in, a hetchen lheh hi tei in te. Hijongleh a chunga chun sei doh theilou lhamuonna tah khat hi aum e. Ka chapa ei peh jou chun ngai lheh bangin a dalha in. Ka chapa sam chu a jut jut in, a chalpang ah a chop in, hichun olcha hin a hung pao doh in….”

“Ipi a sei ham?” tiin Pastor chun a dong pai in.

Andy pa chun, “Ka chapa koma chun.., ‘Na thilpeh jalin ka kipah lheh e. I kimuto vah ding ahi tan, ka koma na um ding ahi tai’, tiin a sei e.” Andy pa chun a sei be in, “Thil kidang tah khat chu, insung um dan chu lungmon aum lheh jeng in, ka lungthim sung hi ngailutna’n a lo dim ahi jeng e. Sei je dan jong ka he jou poi. Ka chapa chu tu hin vangam ah a um e ti vang ka hechen lheh in, kipana johin ka dim in ahi… Thu khat na dong ing e. Koiham Andy in niseh houina a kivoppi ji chu? Nang hi a hechen pen ding na hi. A thi nikho tilouva chu na um jing ji hi lou ham?”

Pastor Thompson mit akon chun mitlhi ahung luong lha jen jun in, a ding det jou ta pon, nuhbing pum chun olcha in, “JESU TOH KIHOULIM JI AHI”.

12647081_802634226514916_5579372502483961081_n

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: