TEHSE HINKHO

16684336_1077710805673922_6790412600047597287_n

Sepai pension ka hi in. Ka jinu’n ei muolliem san nung chun kumkho adia ka in uva kana gel ji chu damsung adin luo thei nama jong leng, changkhatpua khosah jeng ding chu ka gel thei ta poi. Ka chapa, ji le cha nei ta chun amaho koma cheng khom dinga ei tepna chu ka sang in, a kom uva chun ka kichon lut tan ahi.

Ka chapa jinu, ka mounu chu jilkung ahi e. Ka chapa chun pindan nom tah khat chu ei sempeh in. Lupna nom tah leh touna kilep thei chu toh, lekhabu phachom tah a um kit chu, ka lung a lhai ta ngei e.

Sunle chun ka tute chu school a kai jiuvin, sun-an neh phat teng ka mounu chu a hung kile jin, sun-an ei hung sempeh ji e. Ka lekhabu sim nom ho chu ka sim in, nom taha imu pumin nilhah lam Thuso kana ngah ji in. Nilhah teng ka tute school hung kikhen chun ja tahin chibai ei hung boh ji uvin, homework ho kibol din ei dalha pai kit ji ta uve.

Nilhah-an neh jou tengle chun ka tute’n ei kai ji in, ka dinga kikoi ong touna tumbeh achun ei tousah ji uve. Kai ngaicha vang chu ka hi deh pon, a khut neo cha cha ho ka tuh theina kilem umsun ahi kit e. Nilhah-an neh jou tengle chun ka tupa’n school lama a thil tuo nuijatum leh totna ho chu a sei ji in, ka kipapi lheh ji e. Amavang, ka mounu chun, “Pute koma chapang khalah lou ding ahi,” tiin a phoh ji e. Chutia nilhah anneh kichai nungle chun ka chapate nupa chu toh sitting room langah ka tou khom ji uvin. Ka mounu chun TV a ve in, sei ding tam tah nei ji nama jongleng, ka chapa chun Thuso simin a mai a sel mang ji in. Chomkhat jou tengle chun ka chapa chun, “Hepa, kichol jeng le chun pha hilou ham?” a hin ti in, imut soh lou pum pumin ka pindan lang chu ka jon ji tai.

Kum a hung thah in, ka tute jong chun class sang jo a kai ta uve. Masang sangin a boi cheh uvin, school apata a hung kile uva chibai ei boh jou jou nungle chun homework bolin a simlai u chu a kunpi chah kheh ji ta uvin. Ka niseh phat mandan chu angai ngai ahi jeng e. Jing-an ka neh uva pat ei dalhah nung u, pungkah ni bep nungle chun ka gil a kel lheh ji ta in. Sunle chun nehthei johna dukan neo cha, ka in uva pata gamlha beh louva chun ka ga kichoh ji in. Ka gilkel chu thuchom ahi in, chuche nehthei johpa chu ka kihoulimpi thei umsun ahi in, hichu nom ka sah ji ahi.

Khatvei chu, ka kum kibahpi tehse phabep toh ka kimuto uvin, nilhum kei chun ka kiloi uvin, nom ka sa lheh uve. Nilhah-an ne din abon u chun ka kou in. Ka mounu koma chun, anneh sem be a hahsat leh hahsat lou thu chu ka dong in. Ama jong chun a sem be thei ding thuin ei donbut in, an jong chu tui leh kipah tahin ka ne khom tauve. Jana ei dalhah nung u chun ka chapa’n, “Sei masa louva hitobanga an ne dinga mi na hin kou hi, an hon be angai in, ka jinu hi a chol lheh ji in, tu nungle vang hitobang hi lhun da ta leh pha in te” a ti ta in. Ka lungthimin, ‘lhung ta hih beh in te’ ka ti e.

Nilhah khat chu, ka nehthei chohna ji dukan neipa chun, paisa bang ei le ding chu ka mounu school hung kikhen chu a hin thot ta in. Nehthei ka choh ji a het doh phat chun, “Na duchat leh ngaichat ho chu seiin lang, ka ngaito peh ding hi chula em! Hitobanga na choh jing leh miin ka vetkol jou lou u ham tia a gel khah diu ahi” a ti tai.

Ka hinkho man dan chu ka ningkihel lheh jeng in, lekhabu ka sim jing thei ta pon, ka awbom jong chu a manna ding a hah lheh jeng e. Ka ning a kitel lheh in, ka chao lheh in, tha ka nei pon, ka dang a go jing jeng kit e. Ka mounu chun ka umdan chu a hethem in, doctor kivetsah dingin ei ti in. Ka ga kivetsah phat chun, junlhum nei jing chu kana hi e. Ka chapa chun, “Neh le chah kichihthei in ka ti peh peh, tehse ho tah hi, hil thei jong na hi pouve” a ti in, ka donbut poi.

Nikhat chu, ginchat lou behin ka melhet lui, tehse vetkolna muna um khat hi ka hin mu kha ta in. Vekol ding a nei tah lou jeha khopia solkal nuoia tehse vetkolna muna um ta chu ana hi e. Ka kihoulim lim lhon in, a chungchang thu ho chu ka dong in. Ama chun, “A nom lheh e. Ka kihoulim lim jiuvin, eima don ding cha jong keima hon ka kiom uvin, ka changlhah duchat ho jong ka kikan uvin, i nop leh dukana sem sa ka kichoh uvin, a nopmona ima a um hih na e. A hahsa pen chu, ka dilhah to jing u ahi. Hi jong chula eiho tehseho hinkhoa thil lhung ding mong khat ahi in,” tiin ei donbut in. “Ahileh hung um ding hi ta leng, hi thei in tem?” tia ka doh chu, “Hi thei e, pindan ong a um lai nga ngai in tin, a on phot leh ahi thei ahi jeng e. Hinlah, nang hi, vekol ding chapa na nei in, na chapa komah umin lang hinkhonom mang tang em,” ei ti in. Ka lungthim chun, ‘Hinkhonom ong! Kum thum sung hinkhonom ka hin mang tan, a pha khop set tai,’ ka ti e.

Ka chadon ding ka kiom theina, ka changlhah duchat ka kisem theina, ka kum kibahpi ho ka kihoulimpi theina mun chu ka jot ding ahi. Mun ong a um lou tah jong leh, a um masang sea ana ngana ding hotel-a gena kham sum jong ka nei nai!

Ka kile in, jan chun ka kigo ta in. Ka dokhanga chun lekhajih khat ka nuse in. Ka chapa chenna in, kum thum sung hinkhonom ka hin manna mun chu dalha in, hotel lang chu ka jon tan ahi.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: