Sempa Pathen

Ka pung bu lai hi Titan ahi in, a man lhom pen loi hin te. Hijongleh, phat hi a ching dih lheh in. Koi sem ahi lam ka he pha pon, a sem lai jong ka mu deh poi. Amavang, hiche ka pung hi a sem khat aum tei ding ka tahsan in, ama leh ama hung kisem(evolve) ahi ding ka tahsan thei ngai poi.

I tahsa, lungthim leh hinkho ho hi i ngaito to teng, a sem khat um louva hung umdoh jeng ahi ding tahsan aum thei poi. I nu oi sunga sem i hi lai leh sem i hi dan i mu pha pon, het jong i he chuom poi. Hinlah, mihem khat i hidan hi a loupi lheh jeng in, sempa loupi tah aum ngei e ti tahsan aum in, eini tabang mihem sanga loupi jo leh thil bol thei ahi ti jong a kichen lheh in, PATHEN tiin i he ji uve.

Kineisah tahin, “ka tahsa, ka khut, ka keng, ka lu, etc.” tiin sei ji nama jongle hen, natna hon ei hin lhun khum phat teng i tahsa chunga natna neo khat jong i thoidam thei poi ti i he uve. Chuleh i tahsa chunga hin ei sangin natna hit hon thu a nei joi ti a kichen lheh e. Eimaa i hi lou dan i hetna hin ei neipa dih tah chu Pathen ahi dan ei hetsah in, Ama ma ma chu i tahsa, lungthim, leh lhagao ho jong chingtup thei pen ahi ding tahsan aum e.

Neolai apatin eima lungdeilam a kinei jin, lungtup nei in lekha i hin sim tou peh in. Hijongleh, i hi got lou lam tah i hung hi kit tai. I hinkho lampia hin eima sanga thunei aum e ti a kihechen cheh cheh in, ei pui jing um ahi dan jong tahsan aum cheh cheh e. I hinkho lam lhunga ei pui chu Pathen ahi ti i tahsan uvin, i ma lama jong Ama chun ei pui jom jing peh leh dei aum lheh e.

Lampi jouse hin Imphal a jon poi ti i he uvin, Imphal khopia lut ding i nop leh Imphal jotna lampi dih tah chu jot angai e. Vangam lhunna ding leh Pathen kom lhung din jong lampi tam tah aum ding tahsan aum poi.

“Keima hi lampi leh thutah chuleh hinna chu ka hi. Keia kona che lou chu koima Pa kom a lhung thei poi” tipa Jesu Christa hi mijou leh jou le nal sei ahi ding tahsan aum pon, lungthim buoi ahi ding jong tahsan aum chuom poi. A sei bang hin Pathen kom leh Vangam lhun theina lampi umsun ahi ding tahsan aum e. Ama bou hi i hinkho lamkai din lheng hi tin, lheng kit jing u te!

17203180_1102883589823310_108320479963652988_n

 

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: