Hinkhoa hin…

I kum a tam dungjuia kiletsahna jong hao cheh cheh ding i tam un. Pha a i kigelna lai tah hi i phatlouna chu ana hi jin, midang hil dinga kigel hi hil ngaicha joh ana kihi nom ji e.

Hi doh hi louvin hin doh joh hi kichoisang hen lang,
Nei tam hi louvin hin tam hi kingailu jo hen lang,
Hina hi louvin tohdoh joh hi lolhinna tena hi hen lang,
Dan-a dih hi louvin dihna dan joh hi thutanin pang hen lang,
Setna sel mang ngamna hi louvin setna dalhah ngamna joh hi hansan vetsahna hi hen lang,
Mi khup-a kingaia mi tabanga kigel sangin eima keng manga dindoh ding hi kilheng ngam ta ngei leh, hinkhoa buoina thimpi tam tahho hi kihoh chuom tei in te.

Zalenna laigil chu lungsunga hansanna hi ahi in, mi meisan a zalen ngai poi.

Mi mitveta pha hi louvin, eima ngaidana dih leh pha hia i het ho joh hi hangsan tahin hinpi ngam hi tin,
Eima dei dan ei pompi louho pom dan jahpeh thei din kihong tahin um hi tin,
Polama mi lunghol ding deina jeha kithununna hi louvin sunggila eima deilhenna manga kithununna ngei hi i zalenna pansahna hi hen lang,
Mi setna mu masa hi louvin eima setna mu masa kihi hen lang;
Eima setna mudoha i dalhah thei teng, eima phatna sei le le hi louvin mi phatna phongdoh kihi in tin, phatna kol ni hung vah pan tan te.

Ningnoh hi hahsatna ahi pon, mabana suhtup ding nei mai mai a kihi joi.
Nungtol hi hatmona ahi pon, panmun semphatna ahi joi.
Mansah hi manna a hi pon, tonna kalbi ahi joi.
Kipal lhuh hi thina ahi pon, thodoh kitna ahi joi.
Penthah tena chu, eima sanga genthei leh nem jo ho, hatlou leh lhasam jo ho, ngailut leh khoto taha i vet dan leh bol dan ho hi ahi joi.

I tao teng thumna sangin vahchoina awgin ging jo hen lang, lampi jang bouva pui hi louvin, lam koi a hung lhun kom jongle ei pui jang din tao ngam le hen, lhagaomi chu kihi tan te.

Lungthima hansanna chemjam chu, midang ngaidana kingam louva, eima se le pha hetna dih tah chemkunga mangin vat ngim ngam le hen, phat ding go louvin kipha jeng tan te.

16999149_1093723874072615_9117093949965214536_n

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: