Hinkho hi…

Janni(janhi) vela mi khat, ‘hoilah mihing ima jong he lou, a ngol sam e’ na ti pa chu; kum phabep masanga gari accident-a a lu kisuhkhah, a hina ding bang pha jou ta lou ahi e.

Khatvei masania numei khat, ‘a thao val e’ tia na nuisat nu chun, na thusei chu ana gal-jah phah in, tun vang hoimacha-a jong a vahdoh ngam ta pon, a duchat khat jong a ne ngam ta pon, a tahsa’n a thohlel lo tan ahi.

Lha masa lah khata lajilna a gollhang khat, a lasah thep lou jeha na nuisat sat chun, nang banga aw pha tah nei chu a nom lheh e. Amavang, a lolboh kiatna lamah a aw bom ana suhkhah peh uvin, a awso a dih thei jou ta poi. Hijongleh, aw phalou pum pumin jong Pathen vahchoi ding a nom lheh in. Hinlah, tun vang a kiphatlam val tan, lasah ding jong a go ta pon, lajilna a jong a hung kha ta pon ahi.

Hapta masa laha numei chapang kum 16 mi bep, a nao kipom lai musit taha, “aphat achang louva cha nei” tia na sei nu chu, a nop jeha cha nei ahi deh poi. Kum 15 mi bep ahi laiin suhset ana tuoh in; nao a hin vop kha tan, a hinkho jong genthei a kisa lheh jeng tan ahi.

Masang jepa gollhang khat, kisem chop deh duh leh AIDS vei, “drug addict mai mai” tia noise taha na hou chun, tuni nilhah lam chun hi leiseta um jing dinga lomin jong a kigel ta pon, ama le ama hinkho ana kilah lo tan ahi. Lainat aum lheh jeng e.

Tunia bazara gollhang khat pahcha boh choi puma mitlhi luong jen jun, ‘chepa jong chu a nop val e, pahcha choi puma a ka hen hun’ tia na lungthima na gel pa chu, a nu le pa lhana koi ding pahcha choi ahi ti na het phah lou hin te.

Gollhang khat, ‘chepa jong hi nen deh duh leh kisem chop jing jeng’ tia na nuisat thim kei chu, nangma banga theng sit seta kisem a, von mantam leh nal tah tah kiah a nom lheh nai. Amavang, a nu damlou vetkolna’n niseh mi noia sum kiloa chol taha na a toh jing angai in, a sum le pai neiin a to lou banah theng sit seta kisemna man phat jong a nei lou ahi e.

Khatveinia mi kichenna-a nungah kul khat, ‘world cup jong som vei beh ve tan te’ tia nuija taha mi laha na tot le le chu, ‘dai thei na hilou ham’ na ti khah ding a kichat jeha nui ham ham ahi e. Sunggil tahin vang nopmo a sah lheh in, na a sah lheh jeng e. Ji pha tah nei chu a nom lheh in, nei ding jong a go jing nai. Hinlah, a jiholpa chun accident-na ah ana dalha kha tan, tuni chanin mi khat din kitah tahin aum jing e. Pakai anga a kimuto kit lhon kahsea midang kop ding a got lou ahi te.

Hinkho hi dolna chunga tui vei bang bep, chomcha vei ding bou ahi e. Midang seisetna leh noisena ding, kivetda leh kitaitomna ding phat aum pon ahi. Hi lesieta hin koimacha chamkim dinga peng i um lou bang hin, i hindan leh hina ho, i kivondan leh deidan ho chanin koima chamkim i um pouve. Koima hi kinoisea kivetda thei tah tah i um pouvin, i kampao leh i umchan ho hi i chihthei angai lheh jeng e. Eini’n i kipapia i nuipi jah jah chu koihamkhat dinga jachatna tah leh lungthim natna tah ana hi thei ahi ti sumil poute.

Mihem, koi hi hen lang, itobang mi hita hen lang; miphamo pen leh mipha pen ho, haosa leh vaichate jong, melhoi hen hoi hih jongleh, i kisemna hoi hen hoi hih jongleh, i boncha uva hi Pathenin kibang cheta a ngailut, a chapa changkhat Jesu Christa thisena ei lhatdam u ahi e. Midangho hahsatna pehbe hi louvin, a hahsatna ngai jangpeh ding go jo hi tin, mi jouse chunga phatbol ding go jing u hi te. I damlai ni phat chomcha kah, phaimei hung kilanga kihoh pai jeng tobang hi, itih phat leh thina lhankhuh sunga sot lhaha i um ding ham ti koiman i he pouve.

I vanglaini chomcha kah sung hi midang seisetna leh vetdana ho, midang toh kinah leh kilungnopmona hoa mang louvin; nitin hinkho lampi i jot jing lai hin, i umchan leh i kampao suodoh jousea hin mihon amu nom pen Jesu Christa mel hoi leh deium chu kilang jing hen lang pahdoh jing leh, hichun midang ho dinga hinkho nom leh hinkho pha, damna leh phattheina a chan tei ding ahi e.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: