KUKITE LEH TULAI INTERNET KHANG

Kuki khata hung pen lo man in Kuki society sunga ka pohnatna themkhat hin sei tem inge.

KIPUMKHATNA
I neolaia thuchih hung kisimdoh masapen khat chu, ‘kipumkhat chu hatna ahi’; sapkangte paova, ‘unity is strength’ kiti ahi. Ei ute hi i vet leh changval-a koima noiya um jong i um pouvin, mi bolthei khat bolmo ding jong i hi deh pouve. Thepna chihna lama jong mi phah leh het chan phalou leh helou jong i hi pouvin; koima ging loute, ipu ipa khang apata gal masanga jong jam ngai louva thi chan geia pang ngam te ina hi peh uve. Amavang, vangsetum tahin ‘society’ thu a kisei ji teng, ‘zero’ i lha pai pai ji tauve. Koiman ana ngaiset da tan tin, mi gin le ja jong i chang jou pouvin, gin leh ja thei din jong i um kit sam pouve. Hitiho hi ipijeh ham iti leh, society sunga kilungkhatna leh kipumkhatna a lhahsam jeh ahi.

Ei society sunga vei pha lou tah le gangchela pailhah dinga deium khat chu, phung le chang thu sut i thanop ban uva kho le veng kisan san phung bahkai minpua i kisah kit u hi ahi. Ipi ngaitona a, Haokip veng, Khongsai veng, Kipgen veng, Chonghang veng, Mate colony, etc. kiti ho hi ana kisem hi tan tem o? Ole, miin ka phung min he hih kha kha’n te tina ahi dem? A sunga chengho chu Haokip ngan ham, Khongsai ngan ham ana hi tah jongleh, Vengnom ham, Lhangkichoi ham; ahilou jongleh, Chamna veng, Lungkhat veng, Damthei veng, etc. tia sah mo hilou hel ahi. Koima’n jong, ‘O! Khuchete pi khu a kingailu lheh uve’ tia a gel ding jong ginchat aum deh poi. Hitiho hi society sunga thilpha sanga lungthim phalou hung kipatna khat ahi in. Hitiho hin society sungah nat phalou tah a ching in, hiche nat chu ‘kibungkhen’ ahi. Nam ching leh khangtou jousen a kinaipi leh a sopi ding a kihol be be laiya kibungkhen ding dei jing hon hoilang kipumkhatna ba i kilah diu ham!

Koi toh tekahna thua kisei hi pon tin, sopi Mizote khu changvalin koima het val he leh bol thei jong ahi deh pouvin, amavang tribal society laha Mizo society sanga kitup leh hat ding aum pon ahi. Ipi jehin em? A kilungkhat thei uvin; a kiseingai uvin; a kija to del del uvin; lamkai ja je ahe uvin; society a ngailu cheh uvin, ‘ka gam le ka nam adin’ tiin a pangkhom thei uvin ahi. Midang umchan leh lungthim phalou cha cha i vetton sang u hin, i sopite akon khun kihilna thei atam lheh in ahi. Kilungkhata thakhat taha pan khom hi angai mong mong in ahi.

HAM LE PAO
Nam khat, mihem khat i hi kihetna poimo pen khat chu i pao ahi. Nam pilhing leh khantou jousen ama ama pao a gelkhoh cheh ahi. Lekhathem leh sappao them tah tah amavang ei paova thujih khat jong jih theilou i tam val tauve. Facebook leh Whatsapp dunga khangthah pil mel tah tah, melhoi leh ‘bright’ mel tah tah eipao jih dih theilou, adih a man ding lam jong gel phalou leh khohsah lou, eima pao kop kima jih hi mitmona taha gel jeng tobang jong mu ding a tam lheh e. Kimkhat vang chun a phungmin ‘sap sitile’ taha jih tei ding a go kit un; phungmin jah khah lou leh kidang tah tah mu ding a tam lheh tan ahi.

Pao hi mang thei ahi ti jong i het phah lou u khat ham? UNESCO mithem hon pao kimansah ho a jilna uva chun, “Media-a i pao i mandan” jong hi ajeh khat hi in asei uve. Hijeh chun na jat le nam ngailu mi na hi leh media chom chom laha – Facebook, Whatsapp, etc. dunga na pao mandan chu na gelkhoh angai e. Pao hi kichepna ding ahi pon, hetbe a, semphat a, khantousah a, chintup ding joh ahi. Eimite hi sappao them kivat I hi pouvin, eipao them kivat i hiuve. Lekha thema eima pao mandan leh jihdan theplou hi khantouna ahi pon, mitmona joh ahi.

KUKITE LAMKAIHO : Politics leh adang dang
Kuki politician ho lah-ah nam ngailu tah tah um pon te! Election-a lhinna ding leh hoilai hamkhata sum muna ding ahi phot leh a jat leh nam kijoh mang ding ngan ahi bou uve. Nampi ngailutna nei puma politics bol theilou tina um khat ham?

Kuki Inpi hi inpi lhinga kigel ahi mong leh a mite a hoitup jou angai e. Nampi kingaina ahi he jing pumin, mi ja leh gin thei din na tong hen lang vai hom hen. Society sunga semtoh leh suhtoh ding a tam val jeng tai. Amin mai mai tobanga Kuki chate I kiti nah nah vang uvin, ham le pao, chon le khan, kho le veng kivaipoh dan, etc. etc. nam khat chi khat adin a kilom ta poi. Kuki chanu chapa jouse a nungthoa pang di’n itihlaiin jong a kium jinge ti he hen lang, pan ha tahin hin la thah kit leh dei aum lheh e.

KSO hin tua sanga hat jo leh machal joa simlai ho makho, ham le pao, nam chon le khan, etc. ho hi a khohsah leh semphat thei ding kinep aum e.

Kiloikhomna ho hi a thah thah sembe be angai pon, aum saho tosota suhat ding joh ngaito ding ahi.

THADOU-KUKI
Kuki society ngailua kigel Thadou leh Kuki thu sei jing jeng ho hi, nampi sunga ‘cancer’ vei tobang, jen dam theilou ahi uve. Thadou leh Kuki thu hi bailam taha seilhah thei hileh kum 60 val jen a hung kisei ding ginchat aum poi. Sei sei sangin a taha pohdoh pha jon te!

Tunia i gel dinga pha pen chu, ka pao le ham kibahpi, ka tuineh khompi, ka min kibahpi, khosung leh gamsung khata ka chenkhompi chu ka sopi ahi tia pomchah kheha ngailut tah puma thakhat leh lungkhata pan lahkhom ding ahi jeng e. Nang ute, kei ute, khuchete i kiti ti laise’n kilungkhatna leh kipumkhatna kineppi khoh khoh angai poi.

HOUBUNG
Houin pulpit hi eimite dinga platform sangpen ahi ti het apha e. Sap le lengin jong pulpit akona thu kisei hi uhpoh louva angai ji ahi. Hijeh chun Kuki society semphatna din hou natong leh pastor ho hin panmun poimo tah a luo uve. Pathen thu hi a heta het tho sanga jui thei dinga kihil angai e. Ipijeha society sunga ‘moral’ hitobang taha hi lha nem hitam? Pathen tahsanchate’n kitha leh kimat, nehguh, chaga gentheite khotona neilou, kichangngailut, kiseiset leh kidemto, etc. kitiho hi hole bale jong i ti tapouve. Christianity-in gamtin leh namtin a kikhelsah laiya ipi ati leh ei nam bouseh kikhel lou hin tem? Gampam leh gamdang danga missionary i sol sol sang uva, thinglhangkuna cheng i sopiho koma khu mission school ho joh sema, hetna thepna lama puihoi joh pha hilou ham?

KIJAHMATNA LHASAM
Ei ute society sunga hin kijahmattona jong a lhasam lheh in ahi. Mihem hi i lunggel leh thil ngaito ho a kibah louva thusei lasah a chetoh lou teng kivaihom jong a chehchao in, a machal ding bangin a machal thei pon ahi. Tulai internet khanga hin social media ho hi eiho dinga ‘Van akona Manna’ tobanga gel thei khop set ahi. Facebook, Whatsapp, etc. kitiho hi ‘mai mai’ ti ding ahi pon, i manchah them uva ahi leh leiset kolning li sung, i umna cheh uva kona lungthim leh lunggel ho seikhomna leh kijahmatna thei manchah lhingset ahi mong in ahi.

Mizo society hatna thuguh khat chu, kho le veng, houbung leh social organisation jouse tobang khun ama ama Thuthot (Newsletter) a nei soh kei uvin, kijahmatna a lhasam ngai pon ahi. Eihon imacha louva i gel u, Facebook leh Whatsapp ho jeng jong hi i sopi Mizote khun kihettona bailam pen leh gang penin agel uvin, phatchomna nei taha a man jing u ahi. Mizo lekhathem leh officer len tah tah Facebook group dunga thujih pha tah tah jih jing jong mi tamtah aum in ahi. A ngaicha lou ding hon bon khubang taha a gel poimo leh a manchah thei khat, eihon a man je jong helou banga, thi deh duh leh nang deh duh, thei dang beia kinelna leh kidemtona bouva i man u hi a phamo lheh jengin ahi.

Tu peta eiho dinga hiche kijahmattona lhahsamna (communication gap) suhlhapna thei pha pen leh bailam pen chu social media, adeha, Facebook leh Whatsapp ho hi ahi. Lekhathem leh lunggel thei hon a lunggelho ahin sei uva, chuteng mipi’n het dinga lomho chu i het uva, chutobang lunggel pha tah tah chu japi laha a min tengle, kilungkhatna, kipumkhatna, kithakhatna leh kiseingaina jong hung pung cheh ding tina ahi. Chuti louva, khat le ni hetna leh lunggel mai maia i madon cheh uva i kivaipoh lai se leh lunggelho i kijahmatto lou kah sea tohma chal lou ding, tohlhah pen jong um lou ding, I nangkang cheh cheh diu tina ahi.

Society chungchanga lunggel leh ngaitoho seikhoma kijahmatto jinga i society makho hi semphat angai mong mong tai ti hi a lhasam penin jong kipona ahi. A vaigei ma hin i society lhu ding kon hi sempha kit tau hite!

16003042_1053848664726803_6563099018475340539_n

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑